ރާއްޖޭގައި ހުރި ހުރިހައި ނިޒާމެއް، ލާމަރުކަޒީ ނިޒާމަށް ފަހިވެފައި އަދި ނެތް ކަމަށް ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވަޒީރު އާދަމް ޝަރީފު އުމަރު އިއްޔެ ވިދާޅުވެއްޖެއްވެ.
އެ މަނިކުފާނު މިފަދައިން ވިދާޅުވީ މަތިވެރި ކައުންސިލުން ހިންގި މާލީ ބަޔާން ތައްޔާރުކުރާނެ ގޮތުގެ ތަމްރީނު ޕްރޮގްރާމް ނިންމުމަށް ބޭއްވި ރަސްމިއްޔާތު ޝަރަފުވެރިކޮށްދެއްވާ ވާހަކަ ދައްކަވަމުންނެވެ.
މި ރަސްމިއްޔަތުގައި އޮޑިޓާ ޖެނަރަލް ހުސައިން ނިޔާޒީއާއި، އއ. އަތޮޅު ކައުންސިލްގެ ރައީސާއި، މަތިވެރި ކައުސިލް މެމްބަރުންގެ އިތުރުން މިނިސްޓްރީގެ ސްޓޭޓް މިނިސްޓަރު މުޙައްމަދު މާހިރާއި މިނިސްޓްރީގެ ބޭފުޅުން ބައިވެރިވެ ވަޑައިގެންނެވިއެވެ.
މި ރަސްމިއްޔަތުގައި ވަޒީރު ވިދާޅުވީ، ތަނެއް އޮޑިޓްކުރާ ވާހަކަ ބުނެފި ނަމަ އެ ތަނެއްގައި އުޅޭ ބަޔަކު މީގެ ކުރިން ބިރުގަންނަ ކަމަށެވެ. ނަމަވެސް، އޮޑިޓްކުރުމަކީ ނުވަތަ އޮޑިޓް ރިޕޯޓެއް ނެރުމަކީ ތަނެއްގައި ގޯހުން ކަމެއް ދާނަމަ އެ ކަމެއް ރަނގަޅުކުރުމަށް އެހީތެރިވެދީ އެ ކަމެއް ރަނގަޅުކުރާނެ ގޮތް ބުނެދިނުން ކަމަށް ވަޒީރު ވިދާޅުވިއެވެ.
މި ރަސްމިއްޔާތުގައި ވަޒީރު އާދަމް ޝަރީފު ދެއްކެވި ވާހަކަފުޅުގައި ތަމްރީނު ޕްރޮގްރާމުތަކަކީ ނުވަތަ ޕޮރޮފެޝަނަލް ޑިވޮލޮޕްމެންޓް ޕްރޮގްރާމުތަކަކީ ނުހަނު ބޭނުންތެރި އޭގެ ސަބަބުން ގިނަގުނަ ފައިދާތަކެއް މުއައްސަސާތަކަށް ލިބިގެންދާނެ ކަމެއްކަމަށް ވިދާޅުވިއެވެ. އަދި ކުރިއަށް އޮތްތަނުގައި މި ފަދަ ޕްރޮގްރާމުތައް ރާއްޖޭގެ ތަފާތު ކަންކޮޅުތަކުގައި ހިންގުމަށް އިސްކަންދެއްވާނެ ކަމަށް ވިދާޅުވިއެވެ.
މީގެ އިތުރުން، އޮޑިޓާ ޖެނަރަލް އޮފީހަކީ، ދައުލަތުގެ މާލިއްޔާތަށް އަދި ރައްޔިތުންގެ މުދަލަށް ވަރަށް ބޮޑަށް ހުޝިޔާރުވެގެން މަސައްކަތްކުރާ މުއައްސަސާއެއް ކަމަށް ވެސް އޭނާ ވިދާޅުވިއެވެ.
އެނގިގެން ކުރާ މަސައްކަތްތަކާ ނޭނގި ކުރާ މަސައްކަތްތަކުގައި ބޮޑެތި ތަފާތުތަކެއް ހުންނަކަން ފާހަގަކުރައްވައި ވަޒީރު ވިދާޅުވީ، އެނގިގެން މަސައްކަތްކުރުމަކީ ކުރާ މަސައްކަތް އިތުރަށް ހަލުއިވެގެންދާ ކަމެއް ކަމަށެވެ.
ވަޒީރު މިފަދައިން ވިދާޅުވެފައި ވާއިރު، މި ސަރުކާރުން ލާމަރުކަޒީ ނިޒާމާ ދެކޮޅަށް މަސައްކަތް ކުރާކަމަށް އިދިކޮޅު އެމްޑީޕީން ދަނީ ބޮޑެތި ތުހުމަތުތަކެއް ކުރަމުންނެވެ.