މިނިސްޓްރީ އޮފް އެގްރިކަލްޗާ އެންޑް އެނިމަލް ވެލްފެއާ ހިންގުން ވަގުތީގޮތުން މިނިސްޓާ އޮފް ހަޔާ އެޑިޔުކޭޝަން، ލޭބާ އެންޑް ސްކިލްސް ޑިވެލޮޕްމަންޓް، ޑރ. މަރްޔަމް މާރިޔާއާ ހަވާލުކުރައްވައިފިއެވެ.
ސިއްހީ ހާލުކޮޅު ހުރިގޮތުން ޑރ. އައިޝަތު ރަމީލާ މިނިސްޓާ އޮފް އެގްރިކަލްޗާ އެންޑް އެނިމަލް ވެލްފެއާގެ މަޤާމުން މިއަދު ވަނީ އިސްތިއުފާ ދެއްވާފައެވެ.
ރައީސް އޮފީހުން މިރޭ ނެރުނު ބަޔާނެއްގައި ވަނީ އެމަޤާމަށް ބޭފުޅަކު އައްޔަނުކުރެވެންދެން އެ މިނިސްޓްރީގެ ހިންގެވުން ވަގުތީގޮތުން މިނިސްޓަރު މާރިޔާއާ ރައީސުލްޖުމްހޫރިއްޔާ ޑރ. މުހައްމަދު މުއިއްޒު، ހަވާލު ކުރައްވައިފައި ވާކަމަށެވެ.
މިނިސްޓަރު ރަމީލާ ގެންދެވީ ކެންސަރު ބައްޔަށް ބޭސްކުރައްވަމުންނެވެ. މިނިސްޓަރުކަމާ މިދިޔަ އަހަރުގެ 17 ނޮވެމްބަރުގައި ހަވާލުވެވަޑައިގަތުމަށް ފަހު ވެސް މި އަހަރުގެ ފެބްރުއަރީ މަހާ ޖެހެންދެން ރަމީލާ ގިނަ ދުވަސްތަކެއް ރާއްޖެއިން ބޭރުގައި ފަރުވާ ހޯއްދަވަން ހޭދަކުރެއްވިއެވެ.
ރައީސް ޑރ. މުހައްމަދު މުއިއްޒު މިއަދު ނެރުއްވި ބަޔާނެއްގައި ވަނީ، އަލާސްކަންފުޅުގައި އުޅުއްވަމުން ވެސް، ގާނޫނީ ވެރިކަން ކުރިއަރުވައި، އެންމެހައި ރައްޔިތުންނަށް ލާބައާއި ފާގަތިކަން ހޯދައިދީ، ދައުލަތުގެ ކަންތައްތައް ރަނގަޅަށް ހިންގުމުގައި ކުރައްވާފައިވާ މަސައްކަތްތަކަށް ޝުކުރު އަދާކުރައްވާފައެވެ.
"ތެދުވެރިކަމާއި ވިސްނުންތެރިކަމާ އެކު، ސަރުކާރަށް ކޮށްދެއްވި އަގުހުރި ޚިދުމަތްތަކަށްޓަކައި އަޅުގަނޑު ވަރަށް އިޚުލާޞްތެރިކަމާ އެކު ޝުކުރުއަދާކުރަމެވެ،" ރައީސްގެ ބަޔާނުގައި ވިދާޅުވެފައިވެއެވެ.
ރައީސް ވިދާޅުވީ، ރަމީލާ ފަދަ ހީވާގި، އަމާނާތްތެރި، ގާބިލު ބޭފުޅަކު ވަޒީރުންގެ މަޖިލީހުގައި ހިމެނުމަކީ އެ މަނިކުފާނަށް ލިބިފަޑައިގެން އުފަލެއް ކަމަށެވެ. އަދި، ކުރިއަށް އޮތް ތަނުގައި ރަމީލާގެ ޚިދުމަތް ގައުމަށް ލިބޭނެކަން ޔަގީންކުރާ ކަމަށް އެ މަނިކުފާނު ވަނީ ވިދާޅުވެފައެވެ.
އެ މަނިކުފާނު ވަނީ ރަމީލާއަށް ސާބިތުކަން ދެއްވައި، އަވަސް އަދި ދާއިމީ ޝިފާއެއް މިންވަރުކުރެއްވުން އެދި ދުޢާ ދަންނަވައިފައެވެ.