ޝިލްޕާ ޝެޓީގެ ފިރިމީހާގެ މިލްކިއްޔާތުގައި ހުރި ބައެއް ޕްރޮޕަޓީތައް އެންފޯސްމަންޓް ޑިރެކްޓަރޭޓް (އީޑީ)އިން ރެއިޑްކުރުމާ ގުޅިގެން ޝިލްޕާ ޝެޓީއާ ބެހޭގޮތުން ދޮގު ޙަބަރު ނުފެތުރުމަށް ރާޖް މީޑިއާތަކަށް އެދެފިއެވެ.
ބަރަހަނާ ފިލްމުތައް އުފައްދާ އެފަދަ ފިލްމުތައް އޮންލައިންކޮށް ބްރޯޑްކާސްޓުކުރުމުގެ ތުހުމަތު ރާޖްގެ މައްޗަށް ކުރެވުނީ 2021 ވަނަ އަހަރުގެ ޖުލައި މަސް ތެރޭގައެވެ. މި މައްސަލައާ ގުޅިގެން އޭނާ ޖަލުގައި ބަންދު ކުރުމަށް ފަހު ދޫކޮށްލީ ކަފާލާތުގެ ދަށުންނެވެ.
މިދިޔަ ހުކުރު ދުވަހުގެ ރޭ ރާޖްގެ ބައެއް ޕްރޮޕަޓީތައް ރެއިޑްކުރުމާ ގުޅިގެން ނެރުނު ސްޓޭޓްމަންޓެއްގައި ރާޖް ބުނީ، އެ މައްސަލައާ ގުޅިގެން ކަމާބެހޭ ފަރާތްތަކަށް ބޭނުންވާ ފުރިހަމަ އެއްބާރުލުން އޭނާގެ ފަރާތުން ދޭނެ ކަމަށެވެ.
ރާޖްގެ ދެމަފިރިން ކައިވެންޏަށް ލިބިފައިވާ ދެ ކުދިންނާ އެކު--ފޮޓޯ/ޑީއެންއޭ
ރާޖްއަށް ތުހުމަތުކޮށް ބަލަމުން އަންނަ ބަރަހަނާ ވީޑިއޯ ހެދި މައްސަލައިގެ އިތުރުން މަނީ ލޯންޑްރިންގެ މައްސަލަތަކުގެ ހަގީގަތް ވަރަށް އަވަހަށް އެނގޭނެ ކަމަށާއި އޭނާއަށް އިންސާފު ލިބޭނެކަމުގެ ޔަގީންކަން އެބައޮތް ކަމަށް ރާޖް ވަނީ ބުނެފައެވެ.
މަޝްހޫރު ވިޔަފާރިވެރިޔާއާ ގުޅިގެން ފެންމަތިވާ މިފަދަ ކޮންމެ މައްސަލައަކާ އަންހެނުން ޝިލްޕާއާ ގުޅުވާ ޚަބަރުތައް ފެތުރުމަކީ ވަރަށް ޒިންމާދާރުކަން ކުޑަ އަމަލެއްގެ ގޮތުގައި ރާޖް ވަނީ ސިފަކޮށްފައެވެ.
އަންހެނުން ޝިލްޕާއާ އެއްވެސް ގުޅުމެއް ނެތް މައްސަލަތަކެއްގެ ތެރެއަށް ޝިލްޕާގެ ނަން ގެނެސް އަބުރަށް ހުތުރުވާ ގޮތަށް ޚަބަރު ނުފެތުރުމުށާއި އެ އާއިލާގެ ޕްރައިވެސީއަށް މީޑިއާތަކުން އިހުތިރާމުކުރުމަށް ރާޖް ވަނީ އެދިފައެވެ.