ދިވެހިރާއްޖޭގެ އަމާންކަމާއި ދިވެހީންގެ އެކުވެރިކަމާއި ޚުލްގު ހެޔޮކަން މި ގައުމަށް އަންނަ ކޮންމެ ފަތުރުވެރިއަކަށް އަމަލީ ގޮތުން ދައްކަން ޖެހޭކަމަށް ރައީސުލް ޖުމްހޫރިއްޔާގެ ނައިބު ޙުސައިން މުޙައްމަދު ލަތީފް މިއަދު ވިދާޅުވެއްޖެއެވެ.
ނައިބު ރައީސް މިފަދައިން ވިދާޅުވެފައި ވަނީ ދިވެހި ގައުމިއްޔަތުގެ އިސްވަރުގެ ފުރަތަމަ މަހާސިންތާ، "ކަޅުއޮށްފުންމި - ދިވެހި ގައުމިއްޔަތުގެ ދަރުބާރު" ހުޅުވުމަށް އިސްލާމިކް ޔުނިވާސިޓީގައި މިއަދު ބޭއްވި ރަސްމިއްޔާތު ޝަރަފުވެރިކޮށްދެއްވައި ދެއްކެވި ވާހަކަފުޅުގައެވެ.
ނައިބު ރައީސް ވިދާޅުވީ ދިވެހި ގައުމިއްޔަތާމެދު މަޝްވަރާކޮށް މައުލޫމާތު ބަދަލުކުރުމަށް މި ފަހުގެ ތާރީޚެއްގައި މިފަދަ ދަރުބާރެއް ބާއްވައިފައި ނުވާކަމަށާއި ދިވެހީންގެ ގައުމިއްޔަތާއި އަމިއްލަ ވަންތަކަން ރައްކާތެރިކުރުމަށާއި އެކަމަށް ހޭލުންތެރިކަން އިތުރުކުރުމަށް ގައުމިއްޔަތުގެ ދަރުބާރަކީ ވަރަށް ހަރުދަނާ އީޖާދީ ފިޔަވަޅެއް ކަމަށެވެ.
އެ މަނިކުފާނު ވިދާޅުވީ މިނިވަން އަދި ތަހުޒީބީ ގައުމެއްގެ ގޮތުގައި އެތައް ހާސް އަހަރަކަށް ރާއްޖެ ދެމިއޮތުމަށް ބޭނުންވާނޭ އެންމެ މުހިންމު ކަމަކީ ދިވެހި ގައުމިއްޔަތު ނެގެހެއްޓުން ކަމަށެވެ. އަދި ދިވެހި ގައުމިއްޔަތާމެދު ފަޚުރުވެރިވާ ބަޔަކަށް ހުރިހާ ދިވެހީންވެސް ވާނެ ޖެހޭ ކަމަށް ނައިބު ރައީސް ވަނީ ވިދާޅުވެފައެވެ.
"މިއަދު މިފެށޭ ދަރުބާރުގައި ދިވެހި ގައުމިއްޔަތާ ގުޅުންހުރި، ދިވެހީންގެ އަމިއްލަ ވަންތަކަމާ ގުޅުންހުރި ވަރަށް މުހިންމު ދާއިރާތަކުން މައުލޫމާތު ހުށަހެޅި އިލްމީ މަޝްވަރާތަކެއް ކުރެވި އައު އީޖާދީ ވިސްނުންތަކެއް ލިބިގެންދާނެކަން ޔަގީންކުރަން،" ނައިބު ރައީސް ވިދާޅުވިއެވެ.
'ކަޅުއޮށްފުންމި - ދިވެހި ގައުމިއްޔަތުގެ ދަރުބާރު' ހުޅުވުން: ނައިބު ރައީސް ވިދާޅުވީ ދިވެހީންގެ ޚުލްގު ހެޔޮކަން ރާއްޖެއަށް އަންނަ ކޮންމެ ފަތުރުވެރިއަކަށް އަމަލުން ދައްކަންޖެހޭ ކަމަށް --- ފޮޓޯ/ ޕީއެސްއެމް
އެ މަނިކުފާނު ވިދާޅުވީ ދިވެހީންގެ އަމިއްލަ ބަހަކާއި އަކުރަކާއި އަމިއްލަ ސަގާފަތެއްގެ އިތުރުން އަމިއްލަ އާދަކާދަޔާއި ފަންނުވެރިމެއް އެބައޮތް ކަމަށެވެ. މިއީ ދުނިޔޭގެ ބައެއް ގައުމުތަކަށް ލިބިފައި ނުވާ ނަސީބެއް ކަމަށާއި ރާއްޖެއަށްވުރެ ބޮޑެތި މުއްސަނދި ގައުމުތަކުގައިވެސް މިކަންކަން ފުރިހަމަ ނުވާކަމަށާއި އެހެންކަމުން ދިވެހީންނަކީ ވަރަށް ނަސީބު ރަނގަޅު ބައެއް ކަން އެމަނިކުފާނު ވަނީ ފާހަގަކުރައްވައިފައެވެ.
ނައިބު ރައީސް ވިދާޅުވީ ރާއްޖޭގެ ހިތްގައިމު ގުދުރަތީ ރީތިކަމުގެ ވާހަކަ އެންމެން ވެސް ދައްކަމުން ދާކަމަށެވެ.
"ދިވެހީންނަކީ ފަޚުރުވެރި، ތާރީޚީ، ޒަމާންވީ އާދަކާދަތަކާއި ކާބަފައިންގެ ހީވާގި ދިރިއުޅުމާއި، ދިވެހި ބަހުގެ ޗާލުކަންފަދަ އަޅުގަނޑުމެންގެ ގައުމިއްޔަތުގެ ބަހާތަކަކީ އަޅުގަނޑު ދެކޭގޮތުގައި ރާއްޖެއަށް ލިބިފައިވާ އިތުރު ޒީނަތްތެރިކަމެއްގެ ގޮތުގައި ދުނިޔެއަށް ހާމަކޮށްދޭން އެބަޖެހޭ. ރާއްޖޭގެ އަމާންކަން ދިވެހީންގެ އެކުވެރިކަން ޚުލްގު ހެޔޮކަން މި ގައުމަށް އަންނަ ކޮންމެ ފަތުރުވެރިއަކަށް އަމަލީގޮތުން ދައްކަން ޖެހޭ." ނައިބު ރައީސް ވިދާޅުވިއެވެ.
ނައިބު ރައީސް ވިދާޅުވީ ރައީސް ޑރ. މުޙައްމަދު މުއިއްޒު ސަމާލުކަން ދެއްވާ އެއްކަމަކީ ދިވެހީންގެ އަމިއްލަ ވަންތަކަމާއި ގައުމިއްޔަތު ހިމާޔަތް ކުރެއްވުން ކަމަށެވެ. ތައުލީމީ މަންހަޖުގައި ވަކި މާއްދާއެއްގެ ގޮތުގައި ގައުމިއްޔަތު ހިމެނުއްވި ސަބަބަކީ ވެސް އެއީކަމަށް އެމަނިކުފާނު ވިދާޅުވިއެވެ.
ދިވެހި ގައުމިއްޔަތުގެ އިސްވަރަކީ ދިވެހި ގައުމިއްޔަތުގެ އެކި ބަހާތައް ކިޔަވައިދޭން މި ސަރުކާރުން އުފެއްދި ކޮލެޖެކެވެ. މި ކޮލެޖުގެ ފަރާތުން، ގައުމިއްޔަތުގެ އިލްމު ފެތުރުމަށް އަހަރަކު ދެ ފަހަރު މަހާސިންތާ ބޭއްވުމަށް ވަނީ ނިންމައިފައެވެ.