ޔުއޭފާ ޔޫރޮޕާ ލީގުގެ ލީގު ފޭސްގައި އެއިންޓްރެކްޓް ފްރޭންކްފާޓުން މިޑްޗިލަންޑް ބަލިކޮށް، ތިންވަނައަށް ކުރިއަށް ޖެހިލައިފިއެވެ.
މިޑްޗިލަންޑްގެ ދަނޑުގައި ކުޅުނު މި މެޗު ފްރޭންކްފާޓުން ކާމިޔާބުކޮށްފައިވަނީ 2-1 އިންނެވެ.
މެޗުގެ ހަތްވަނަ މިނެޓުގައި އެ ޓީމުން އުފެއްދި ހަމަލާއެއްގައި ވަނީ މެޗުގެ ލީޑު ނަގައިފައެވެ. މި ލަނޑު އެ ޓީމަށް ކާމިޔާބުކޮށްދިނީ ހޫގޯ ލާސަނެވެ. ފުރަތަމަ ހާފުގައި އިތުރު ލަނޑެއް ނުފެނުނު ނަމަވެސް ލަނޑު ޖަހާނެ ރަނގަޅު ފުރުސަތު ދެ ޓީމަށް ވެސް ލިބުނެވެ.
ދެވަނަ ހާފު މިޑްޗިލަންޑްއިން ފެށީ އާ ހިތްވަރަކާއެކުއެވެ. ނަތީޖާއަކަށް ވެގެންދިޔައީ ދެވަނަ ހާފުގެ ކުޅުން ފެށިތާ ތިންވަނަ މިނެޓުގައި އެ ޓީމުން މެޗުގެ ނަތީޖާ ހަމަހަމަ ކުރުމެވެ. ނަމަވެސް، މި ލަނޑަކީ ފްރޭންކްފާޓްގެ ނަމްޑީ ކޮލިންސް އަތުން ބައިކޮޅަށް ވަން ލަނޑެކެވެ.
މެޗުން ފްރޭންކްފާޓް މޮޅުވި ލަނޑު މެޗުގެ 57 ވަނަ މިނެޓުގައި ލިބުނު ޕެނަލްޓީއަކުން ކާމިޔާބުކޮށްދިނީ އޮމަރު މަރްމޫޝްއެވެ.
މިމުބާރާތުގައި މިހާތަނަށް ކުޅުނު ފަސް މެޗުން ލިބިފައިވާ 13 ޕޮއިންޓާ އެކު ފްރޭންކްފާޓުން މިވަނީ އެއްވަނައާއި ދެވަނައިގައި އޮތް ލާޒިއޯއާއި އެތުލެޓިކް ބިލްބާއޯއާ ޕޮއިންޓްގެ ގޮތުން އަރާ ހަމަކޮށްފައެވެ. މިޑްޗިލަންޑް އޮތީ ހަތް ޕޮއިންޓާ އެކު 20 ވަނައިގައެވެ.
މި މުބާރާތުގައި ބްރާގާއާއި ހޯފެންހެއިމް ބައްދަލުކުރި މެޗު 3-0 އިން ކާމިޔާބުކޮށްފައިވަނީ ބްރާގާއެވެ. މެޗުގައި ބްރާގާއިން ކާމިޔާބު ކުރި ތިން ލަނޑު އެ ޓީމަށް ޖަހައިދިނީ ބްރޫމާ، ރޮޖާ ފެނާންޑެސް އަދި ކަވާލިއޯއެވެ.
މި ކާމިޔާބީއާ އެކު ބްރާގާ މިހާރު އޮތީ ހަތް ޕޮއިންޓާ އެކު 18 ވަނައިގައެވެ. ހޯފެންހެއިމް އޮތީ ފަސް ޕޮއިންޓާ އެކު 25 ވަނައިގައެވެ.