އިންޑިއާގެ ފިލްމީ ތަރިން ކަމަށްވާ ވިކީ ކޯޝަލް އާއި ރަޝްމިކާ މަންދަންނާ އެކީގައި އަލަށް ސްކްރީނުން ފެންނާނެ ފިލްމު "ޗާވާ" އަންނަ އަހަރުގެ ފެބްރުއަރީ މަހު ރިލީޒްކުރާނެކަން އިއުލާނުކޮށްފިއެވެ.
މި ފިލްމުގެ ފެބްރުއަރީ މަހުގެ 14 ވަނަ ދުވަހު ރިލީޒްކުރާނެކަން އިއުލާނުކޮށްފައި ވަނީ އަންނަ އަހަރަށް ފިލްމު ފަސްކުރެވުނުކަން މިދިޔަ އާދީއްތަ ދުވަހު ހާމަކޮށްފައިވަނިކޮށެވެ. ފިލްމު "ޗާވާ" ރިލީޒް ކުރާނެ ތާރީޚު އިއުލާނުކުރުމުގެ ކުރިން މި ތާރީޚުގައި ސިނަމާތަކަށް ގެންނަން ނިންމާފައި ވަނީ ޝާހިދު ކަޕޫރު އަދި ބަތަލާ ޕޫޖާ ހެގްޅޭގެ ފިލްމު "ދޭވާ"އެވެ.
ނަމަވެސް އިއްޔެގެ ވަގުތެއްގައި އެ ފިލްމު ގެނެސްދޭ ކުންފުނިން ވަނީ ފިލްމު ސިނަމާތަކަށް ގެންނަ ތާރީޚު އަވަސްކޮށްފައިވާކަމަށް ބުނެފައެވެ.
ވިކީ ފިލްމު 'ޗާވާ'ގެ މަންޒަރެއްގައި--ފޮޓޯ/ބޮލީވުޑްހަންގާމާ
އެހެންކަމުން ފުރުސަތުގެ ބޭނުންކޮށް މެޑްޑޮކް ފިލްމްސްއިން މިވަނީ އަންނަ އަހަރު ފާހަގަކުރާ ލޯބިވެރިންގެ ދުވަހާ ދިމާކޮށް ވިކީގެ ފިލްމު ބެލުންތެރިންނަށް ގެނެސްދިނުމަށް ނިންމާފައެވެ. ފިލްމު "ޗާވާ" ރިލީޒްކުރުން ފަސްކުރެވުނީ މި އަހަރުގެ ޑިސެމްބަރު މަހު ބޮޑު ބަޖެޓަކުން އުފައްދާފައިވާ ފިލްމު "ޕުޝްޕާ 2" އެއް ތާރީޚެއްގައި ރިލީޒްކުރާތީ ދުވަސް ފުށުއެރުމާ ވިދިގެންނެވެ.
ޕްރޮޑިއުސަރު ދިނޭޝް ވީޖަންގެ "ޗާވާ"އަކީ މެޑޮކް ފިލްމްސްއިން އުފައްދާ ތާރީޚީ ފިލްމެކެވެ. ފިލްމުގައި ވިކީ ކުޅެފައިވަނީ އިންޑިއާގެ ކުރީގެ ހަނގުރާމަވެރިއެއް ކަމަށްވާ ޗަތުރަޕަތީ ސަބާޖީގެ ރޯލެވެ.
ވިކީ އާއި ރަޝްމިކާގެ އިތުރުން މި ފިލްމުގެ ވަރަށް މުހިއްމު ރޯލްއިން ކުރީގެ އެކްޓަރު އަކްޝަޔޭ ކަންނާ ވެސް ފެންނާނެއެވެ. މިއީ ފިލްމު "ދްރިޝްޔަމް 2"އަށްފަހު އަކްޝަޔޭ ކަންނާ ބެލުންތެރިންނާ ބައްދަލުކުރާނެ ފުރަތަމަ ފިލްމެވެ.