މާލޭގެ ކެފޭތަކެއް ބަލާފާސްކޮށް، ގަވައިދާ ޚިލާފަށް އުޅޭ އަށް ބިދެސީއަކު އިމިގްރޭޝަނުން އިއްޔެ އަތުލައިގެންފިއެވެ.
އިމިގްރޭޝަނުން އަންނަނީ ގަވައިދާ ޚިލާފަށް އުޅޭ ބިދޭސީން ހޯދަން އޮޕަރޭޝަންތައް ހިންގަމުންނެވެ.
މިގޮތުން، އިއްޔެ ހިންގި އޮޕަރޭޝަނެއްގައި އަށް ކެފޭއެއް ބަލާ ފާސްކޮށްފައިވާ ކަމަށާއި އެތަންތަނުގައި މަސައްކަތް ކުރަމުން ދިޔަ ތިން ބިދޭސީއަކު އަތުލައިގެންފައިވާ ކަމަށެވެ.
މި މަހު 19ވަނަ ދުވަހު އިމިގްރޭޝަން ވަނީ މަސް މާރުކޭޓް ސަރަހައްދު ބަަލައި ފާސްކޮށް ގަވާއިދާ ޚިލާފަށް އުޅުނު 39 ބިދޭސީއަކު އިމިގްރޭޝަނުގެ ބެލުމުގެ ދަށަށް ގެންގޮސްފައެވެ.
މީގެއިތުރުން، މި ސަރުކާރުން ވެރިކަމަށް އައި ފަހުން ރާއްޖޭގައި ގަވާއިދާ ޚިލާފަށް އުޅޭ 5،000 އެއްހައި ބިދޭސީން ޑީޕޯޓުކޮށްފައިވާ ކަމަށް ހޯމް މިނިސްޓަރު އަލީ އިހުސާން ވަނީ ވިދާޅުވެފައެވެ.
އިހުސާން ވަނީ ގަވާއިދާ ޚިލާފަށް އުޅޭ ބިދޭސީންގެ މައްސަލަ ހައްލުކުރުމަށް މުޅި ރާއްޖޭގައި މިހާރު 138 ރަށެއްގައި ބަޔޮމެޓްރިކް ޑާޓާ ނެގުމުގެ މަސައްކަތް ކުރިއަށް ގެންދާ ކަމަށާއި އޭގެ ތެރެއިން 10،000 އަށްވުރެ ގިނަ މީހުންގެ ބަޔޮމެޓްރިކްސް ނަގައިފައިވާކަން ފާހަގަކުރައްވާފައެވެ.