ޗައިނާގެ ޓެކްނޮލޮޖީ ކުންފުނި "ޑީޖޭއައި"އިން އެ ކުންފުނީގެ އެންމެ ލުއި މައިކްރޯފޯން ކަމަށްވާ "މައިކް މިނީ" ބާޒާރަށް ނެރެފިއެވެ.
ޑީޖޭއައި މައިކް މިނީއަކީ އާންމު މައިކްރޯފޯނުތަކާ އަޅައިބަލާއިރު ވަރަށް ކުޑަ އަދި ލުއި މައިކްރޯފޯނެކެވެ. މި މައިކްރޯފޯނުގެ ބަރުދަނަކީ އެންމެ 10 ގްރާމެވެ.
މި މައިކްރޯފޯނަކީ 48 ގަޑިއިރު ޗާޖު ހިފަހައްޓާ، ގިނަ ކަންކަމަށް ބޭނުންކުރެވޭ ގޮތަށް ފަރުމާކޮށްފައިވާ މައިކްރޯފޯނެކެވެ.
ޑީޖޭއައި މައިކް މިނީ، ކެމެރާތަކުގެ އިތުރުން ސްމާޓްފޯނާއި ކޮމްޕިއުޓަރާއި ޓެބްލެޓްތަކާ ވެސް ގުޅުވޭނެއެވެ. އަދި އެ ކުންފުނީގެ ކެމެރާތައް ކަމަށްވާ އޮސްމޯ އެކްޝަން އާއި ޕޮކެޓް ސީރީޒްގެ އާލާތްތަކާވެސް ގުޅުވޭނެއެވެ.
މި މައިކްރޯފޯނު ލުއި ކަމުން، ގަމީހުގެ ގިރުވާނު ފަދަ ތަނެއްގައި، އުނދަގޫ ނުވާނެ ގޮތަކަށް ހަރުކުރެވޭނެއެވެ. އެގޮތުން މި މައިކްރޯފޯނު ކްލިޕްކޮށްގެން ނުވަތަ މެގްނެޓް ބޭނުންކޮށްގެން ނުވަތަ ވާކޮޅަކުން ކަރުގައި އަޅުވައިގެން ވެސް ބޭނުންކުރެވޭނެއެވެ.
ޑީޖޭއައިއަކީ ޑްރޯން އުފެއްދުމަށް މަޝްހޫރު ކުންފުންޏެކެވެ. ނަމަވެސް އެ ކުންފުނިން އުފައްދަނީ ހަމައެކަނި ޑްރޯނެއް ނޫނެވެ. އެ ކުންފުނިން ވަނީ ފަހަކަށް އައިސް ޑީޖޭއައި އެއަރ 3އެސް އޯލްރައުންޑަރ ޑްރޯން އާއި ގޮގަލް އެން3 އާއި އޮސްމޯ އެކްޝަން 5 ޕްރޯ ފަދަ އުފެއްދުންތައް ބާޒާރަށް ނެރެފައެވެ.
ޑީޖޭއައި މައިކް މިނީ -- ފޮޓޯ: ޑީޖޭއައި
ޑީޖޭއައި މައިކް މިނީގެ މުހިންމު ސިފަތައް:
ބެޓެރީ: ޗާޖިން ކޭސްގައި ރިސީވަރާއި ޓްރާންސްމިޓަރުތައް ހިމެނޭއިރު، ފުރިހަމައަށް ޗާޖުކުރުމުން 48 ގަޑިއިރަށް ބޭނުންކުރެވޭނެއެވެ. އަދި އެންމެ ފަސް މިނިޓަށް ޗާޖުކުރުމުން އިތުރު އެއް ގަޑިއިރަށް ބޭނުންކުރެވޭނެއެވެ. ނަމަވެސް ރިސީވަރު ފުރިހަމައަށް ޗާޖުވާން 100 މިނިޓު، އަދި ޓްރާންސްމިޓަރު ޗާޖުވާން 90 މިނިޓު ނަގާނެއެވެ.
ދެ ފެންވަރެއްގެ ނޮއިސް ކެންސަލިން: އަޑުމަޑު މާހައުލުތަކުގައި 'ބޭސިކް މޯޑް' އަދި އަޑުގަދަ މާހައުލުތަކުގައި ހަމައެކަނި ދައްކާ ވާހަކައަށް ފޯކަސް ކުރެވޭ ގޮތަށް، އިތުރު އަޑުތައް މަޑުކޮށްދޭ 'ސްޓްރޯންގް މޯޑް' ބޭނުންކުރެވޭނެއެވެ.
ވިންޑްސްކްރީން: ބޭރުގައި ރެކޯޑުކުރާއިރު ވައިގެ އަޑު މަދުކޮށްދޭނެއެވެ.
އޮޓޮމެޓިކް ލިމިޓިން: އަޑުގެ އިންޕުޓް މާ ބާރުވެއްޖެނަމަ އަޑު މަޑުކޮށްދޭނެއެވެ. މީގެ ސަބަބުން ކްލިޕިން އާއި ޑިސްޓޯޝަން ހުއްޓުވައިދޭނެއެވެ.
އެޖަސްޓަބަލް ގެއިން: ރިސީވަރުގެ ޑަޔަލް ބޭނުންކޮށްގެން އަޑު ނަގައިދޭ މިންވަރު ބަދަލުކުރެވޭނެއެވެ. އެގޮތުން ފަސް ލެވެލްއެއް ޚިޔާރު ކުރެވެން ހުންނާނެއެވެ.
އޮޓޮމެޓިކް ޕަވާ މެނޭޖްމަންޓް: ސިގްނަލް ނުލިބޭ ވަގުތުތަކުގައި ޓްރާންސްމިޓަރު ސްލީޕް މޯޑަށް ދާނެއެވެ. އަދި ޑީޖޭއައިގެ މިމޯ އެޕް މެދުވެރިކޮށް އޮޓޮމެޓިކުން ޑިވައިސް ނިވޭ ގޮތަށް ޓައިމަރެއް ސެޓްކުރެވޭނެއެވެ.
ޑީޖޭއައި މައިކް މިނީ -- ފޮޓޯ: ޑީޖޭއައި
އަޑުގެ ފެންވަރު:
އޮމްނިޑައިރެކްޝަނަލް އޯޑިއޯ ރެކޯޑިން: ހުރިހާ ދިމާލަކުން އަންނަ އަޑު ރެކޯޑުކުރެވޭނެއެވެ.
ދެ ޓްރާންސްމިޓަރު ގުޅުވުން: ރިސީވަރަށް އެއްފަހަރާ ދެ ޓްރާންސްމިޓަރު ގުޅުވޭނެއެވެ. މިއިން ގިނަ ތަންތަނުން އަޑު ރެކޯޑުކުރެވޭނެއެވެ.
ދެ ޗެނަލުން ރެކޯޑުކުރުން: މޮނޯ އަދި ސްޓީރިއޯ މޯޑަށް ވެސް ސަޕޯޓުކުރެއެވެ.
ޓްރާންސްމިޝަން ރޭންޖް: ބައެއް ހާލަތްތަކުގައި 400 މީޓަރު ދުރަށް އަޑު ފޮނުވައިދޭނެއެވެ.
ސޭފްޓީ ޓްރެކް: ޑީޖޭއައި މެމޯ އެޕް މެދުވެރިކޮށް އަސްލު ޓްރެކަށްވުރެ 6 ޑެސިބަލް ދަށް އަޑެއްގައި ބެކަޕް ޓްރެކެއް ރެކޯޑުކުރެވޭނެއެވެ. މިއިން ކްލިޕިން ފަދަ އަޑުގެ މައްސަލަތަކުން ސަލާމަތްވެވޭނެއެވެ.
މައިކް މިނީ ބޭނުންކުރުން -- ފޮޓޯ: ޑީޖޭއައި
މައިކް މިނީ މިހާރު ޑީޖޭއައި ސްޓޯރުންނާއި ހުއްދަ ލިބިފައިވާ ވިޔަފާރިތަކުން އޯޑަރުކުރެވޭނެއެވެ. އަދި މިހާރު މައިކް މިނީތައް ޝިޕްކުރަން ވެސް ވަނީ ފަށައިފައެވެ.
މައިކް މިނީ ޓްރާންސްމިޓަރު (އިންފިނިޓީ ބްލެކް) އަދި މައިކް މިނީ ޓްރާންސްމިޓަރު (އާކްޓިކް ވައިޓް) ވަކިވަކިން 178.18 ޑޮލަރު (2,752 ރުފިޔާ)އަށް ގަނެވޭނެއެވެ. މައިކް މިނީ ޗާޖިން ކޭސްގެ އަގަކީ 57.02 ޑޮލަރު (880.81 ރުފިޔާ) އެވެ.
މައިކް މިނީ ޕެކޭޖުގައި ހިމެނޭ ތަކެތި -- ފޮޓޯ: ޑީޖޭއައި
ޑީޖޭއައި މައިކް މިނީ މެދުވެރިކޮށް ޕޮޑްކާސްޓް، ލައިވް ސްޓްރީމް، އަދި ވީޑިއޯ ޕްރޮޖެކްޓްތަކަށް ފަސޭހަކޮށް، ރަނގަޅު ފެންވަރުގެ އަޑު ރެކޯޑުކުރެވޭނެއެވެ.
ޑީޖޭއައިގެ ވެބްސައިޓުގައި ވަނީ، މި ކުޑަ އަދި ބޭނުންކުރަން ފަސޭހަ މައިކްރޯފޯނަކީ އުނދަގޫ ސެޓަޕްތައް ހެދުމަކާ ނުލައި ޕްރޮފެޝަނަލް ފެންވަރުގެ އަޑު ބޭނުންވާ ކްރިއޭޓަރުންނަށް އިތުބާރު ކުރެވޭނެ ޑިވައިސްއަކަށް ވާނެ ކަމުގެ ޔަގީންކަން ދީފައެވެ.