މިދިޔަ ހޯމަ ދުވަހު އުރީދޫ އިން ކުރިއަށް ގެންދާ "ގްރޯ ވިތް އުރީދޫ"ގެ ސެޝަނެއް ސ. ފޭދޫގައި ބާއްވާފިއެވެ.
އިސްރަށްވެހިންނަށް ޚާއްސަކޮށް ކުރިއަށް ގެންދިޔަ މި ސެޝަނުގައި ގޭގައި ގަސް އިންދުމާއި ހެއްދުމަށް ކުރެވިދާނެ ކަންކަން ކިޔައިދީ އަމަލީ ސެޝަނެއް ވެސް ކުރިއަށް ގެންގޮސްފައިވެއެވެ.
ފޭދޫ އަވަށު އޮފީހާ ގުޅިގެން މި ސެޝަން ނަގައިދިނީ އުރީދޫގެ "ގްރޯ ވިތް އުރީދޫ" ބްރޭންޑް އެމްބެސެޑާ ރަމްޒީ ހުސައިނެވެ.
އިސްރަށްވެހިންނަށް ޚާއްސަކޮށް، ފޭދޫގައި ބޭއްވި "ގްރޯ ވިތް އުރީދޫ"ގެ ސެޝަންގެ ތެރެއިން --- ފޮޓޯ/ އުރީދޫ
މީގެއިތުރުން، މި ހަރަކާތުގައި އުމުރުން ދުވަސްވީ މުޖުތަމައުގެ ބޭނުންތަކަށް އަމާޒުކޮށްގެން އަމަލީ ސެޝަނެއް ކުރިއަށް ގެންދިޔަ ކަމަށާއި ބައިވެރިންނާ އެއްކޮށް މަޝްވަރާކޮށް، ސުވާލުތަކަށް ޖަވާބު ދިނުން ކުރިއަށް ދިޔަ ކަމަށް އުރީދޫން ބުނެފައިވެއެވެ.
އުރީދޫން ބުނި ގޮތުގައި، މި ހަރަކާތަކީ "ގްރޯ ވިތް އުރީދޫގެ" ސިލްސިލާ ހަރަކާތްތަކުގެ ތެރެއިން މިއަހަރު ބޭއްވޭ ތިން ވަނަ ހަރަކާތް ކަމަށެވެ.
މިހަރަކާތަކީ އިސްރަށްވެހިންނަށް ޚާއްސަކޮށްގެން، އިންކްލޫސިވް އިވެންޓްތައް ބޭއްވުމަށް އުރީދޫއިން ކުރަމުންދާ މަސައްކަތުގެ ދަށުން، މުޖުތަމައުގައި ހަރަކާތްތެރި ފަރާތްތަކުގެ ގޮތުގައި ދެމިތިބުމަށް ހިތްވަރުދިނުމުގެ ގޮތުން ކުރިއަށް ގެންދާ ހަރަކާތެއް ކަން އެ ކުންފުނިން ވަނީ ފާހަގަކޮށްފައެވެ.