ކޮރަޕްޝަނާ ދެކޮޅަށް ކުރާ މަސައްކަތުގައި އައި އީޖާދުތަކާއި ޓެކްނޮލޮޖީއަކީ މުހިންމު ވަސީލަތެއް ކަމަށް ހޯމްލޭންޑް މިނިސްޓަރު އަލީ އިހުސާން ވިދާޅުވެއްޖެއެވެ.
މިނިސްޓަރު މިހެން ވިދާޅުވީ އެންޓި ކޮރަޕްޝަން ލޯ އެންފޯސްމަންޓު އޭޖެންސީޒް އިން ދަ އޯއައިސީ މެންބަރު ސްޓޭޓްސްގެ ދެވަނަ މިނިސްޓަރުންގެ ބައްދަލުވުމުގައެވެ.
މިނިސްޓަރުގެ ވާހަކައިގައިވަނީ ކޮރަޕްޝަނާ ދެކޮޅަށް ކުރާ މަސައްކަތުގައި އައު އީޖާދުތަކާ ޓެކްނޮލޮޖީއަކީ މުހިންމު ވަސީލަތެއްކަން ފާހަގަ ކުރައްވައިފައެވެ.
އަދި ޑިޖިޓަލް ޓްރާންސްޕޭރެންސީ ނިޒާމުތަކާއި، އީ-ގަވަނަންސް ޕްލެޓްފޯމްތަކާއި، ސަރުކާރު ޖަވާބުދާރީ ކުރުވުމުގެ ނިޒާމުގެ ސަބަބުން ކޮރަޕްޝަންގެ ފުރުސަތުތައް ކުޑަކުރެވޭނެ ކަމަށް ވެސް ވިދާޅުވިއެވެ.
މީގެ އިތުރުން އިހުސާން ވިދާޅުވީ، ކޮރަޕްޝަނާ ދެކޮޅަށް ކުރާ މަސައްކަތްތަކާ އެއްވަރަށް އެ ކަމުގައި ޒުވާނުން އަދައިކުރާ ދައުރު މުހިންމުކަމަށެވެ. އެ ގޮތުން ރަނގަޅު މުޖުތަމައެއް ބިނާކުރެވޭނީ ޒުވާން ޖީލުގައި ނަޒާހަތްތެރިކަމާއި އިންސާފުވެރިކަމުގެ ސިފަތައް އަށަގަންނުވައިގެންކަން ފާހަގަކުރެއްވިއެވެ.
ކޮރަޕްޝަނުގެ ސަބަބުން މުޖުތަމައުގެ އިޖުތިމާއީ ފޭރާން ވީދި، ތަރައްގީއަށް ހުރަސްއެޅުމުގެ އިތުރުން ވެރިކަން ބަލިކަށިވެގެންދާކަން ފާހަގަކުރައްވައި، އިހުސާން ވިދާޅުވީ މުސްލިމު ގައުމުތައް އިސްލާމީ އަގީދާއިން ލާޒިމުކުރާ ގޮތަށް ހާމަކަން ބޮޑު، އަދުލު އިންސާފުވެރިކަމާއި އިތުބާރުގެ މައްޗަށް އުސޫލުތައް ދެމެހެއްޓުމަކީ ވާޖިބެއްކަމަށެވެ.
އެގޮތުން ހުރިހާ ފަންތިއެއްގައި ވެސް ކޮރަޕްޝަނާ ދެކޮޅަށް މަސައްކަތް ކުރުން މަތީ ރާއްޖޭން ދެމި އޮތް ކަމަށް ވިދާޅުވިއެވެ.، އެހެން ނަމަވެސް ގައުމުތަކުގެ މެދުގައި ހަރުދަނާ ގޮތެއްގައި އެއްބާރުލުން ނުލިބި، މި މަސައްކަތް ކާމިޔާބު ނުކުރެވޭނެ ކަމަށް އިހުސާން ވިދާޅުވިއެވެ.
މީގެ އިތުރުން މިނިސްޓަރު ވަނީ، ކޮރަޕްޝަނާ ދެކޮޅަށް އެއްބައިވަންތަ ކަމާއެކު މަސައްކަތް ކުރުމާއި ބެސްޓް ޕްރެކްޓިސްގެ އުސޫލުތައް ހިއްސާ ކުރުމަށް އޯއައިސީން ވަރުގަދަ ޕްލެޓްފޯމެއް ފަހިކޮށްދޭކަން ފާހަގަކުރެއްވިއެވެ. މި ކަމުގެ ސަބަބުން ސަރަހައްދީ ގުޅުންތައް އުފެދި، މުއައްސަސާތައް ހަރުދަނާކޮށް، ކޮރަޕްޝަން ހުއްޓުވުމަށް ހުރި ގޮންޖެހުންތަކަށް ހައްލު ލިބިގެންދާނެ ކަމަށް ވިދާޅުވިއެވެ.
އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ)ގެ މި އަހަރުގެ މިނިސްޓަރުންގެ ދެވަނަ ބައްދަލުވުން އޮތީ ގަތަރުގެ ވެރިރަށް ދޯހާގައެވެ.