ކ. ގުޅީގައި ފާނަބަސަންދު އަދިވެސް ފެތުރޭކަމަށާއި މިހާރު ފާނަބަސަންދުގެ 24 ކޭސް އެރަށުން ފެނިފައި ވާކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭއިން) ބުނެފިއެވެ.
ގުޅީގައި ފާނަބަސަންދު ފެތުރެން ފަށައިފައިވާކަން އެ އެޖެންސީން ހާމަ ކުރީ މިދިޔަ ހުކުރު ދުވަހުއެވެ. އޭރު އެރަށުން ފެނިފައި ވަނީ 11 ކޭހެވެ. އޭރު ދެ މީހަކަށް އައިޖީއެމްއެޗުގައި ފަރުވާދިން ނަމަަވެސް، އެ ދެމީހުން މިިހާރު ދޫކޮށްލާފައިވާ ކަމަށާއި މިހާރު ފާނަބަސަންދާ ގުޅިގެން އެއްވެސް މީހަކަށް މާލޭގައި ފަރުވާ ނުދޭކަމަށް އެޗްޕީއޭއިން ބުންޏެވެ.
އެރަށުގައި ފާނަބަސަންދު ފެތުރުނު ނަމަވެސް، މިހާރު ބަލި ކޮންޓްރޯލް ކުރެވިފައި ވާކަމަށް އެޗްޕީއޭއިން ވަނީ ބުނެފައެވެ. އެގޮތުން، ގިނަ ބަޔަކު މިހާރު ވެކްސިން ވެސް ޖަހާފައި ވާކަމަށް އެޗްޕީއޭއިން ބުންޏެވެ.
އެޗްޕީއޭއިން ވަނީ ވޭތުވެދިޔަ ތިން މަހު ފާނަބަސަންދު ފެތުރިފައިވާ މިންވަރު ދައްކުވައިދޭ ތަފާސްހިސާބުތައް ހިއްސާކޮށްފައެވެ. މި ބަލި ވޭތުވެދިޔަ ތިން މަހު އެންމެ ގިނައިން ފެތުރިފައި ވަނީ މާލޭ ސަރަހައްދާއި ޅ. އަތޮޅުގައެވެ.
މިމަހުގެ މިހާތަނަށް ޅ. ނައިފަރުން ވެސް ވަނީ މި ބަލީގެ 29 ކޭސް ރިޕޯޓުކޮށްފައެވެ.
އެޗްޕީއޭއިން ބުނީ، ފާނަބަސަންދުގެ ކޭސްތައް އާންމުކޮށް ރާއްޖޭގެ އެކި ހިސާބުތަކުން ކޮންމެ އަހަރަކު ވެސް ރިޕޯޓް ކުރާ ކަމަށެވެ.
ފާނަބަސަންދުގެ އަލާމާތްތައް:
- ހުންއައުން
- ވަރުދެރަވުން
- ނޭފަތުން ފެންއައުން
- ހަމުގައި ބިހިތަކެއް ނެގުން
އެޗްޕީއޭއިން ބުނީ، ފާނަބަސަންދު ޖެހިފައިވާ މީހެއްގެ ގައިގައި ނަގާ ބިހިތައް ފެންފޮޅުތަކަކަށް ބަދަލުވާނެ ކަމަށެވެ. އަދި، އެ ބިހިތަކަކީ ވަރަށް ހިރުވާ، ފަސޭހައިން ފަޅައިގެންދާ ބިހިތަކެއް ކަމަށް އެޗްޕީއޭއިން ބުންޏެވެ. އަދި، ދެތިން ދުވަސް ތެރޭގައި ހަނށިގަނޑުގެ އެކި ތަންތާ ފެންބިހި ނަގާނެ ކަމަށް މައުލޫމާތުދިނެވެ.
ފާނަބަސަންދު ފެތުރޭ ގޮތްގޮތް:
- ބަލިޖެހިފައި ހުރި މީހަކު ކެއްސާ ކިނބިހި އަޅާ ހަދާއިރު ނޭވާލާ ނިޒާމުގެ ޒަރީއާއިން.
- ބިހި ނަގާފައި ހުރި މީހެއްގެ ގައިގައި ބީހުމުން ނުވަތަ އޭނާ ބޭނުންކޮށްފައިވާ ތުވާލި، އަންނައުނު ފަދަ ތަކެތި ބޭނުންކުރުމުން.
- ގައިގައި ހުރި ބިހިތައް އެއްކޮށް ކުރަމަގާލިލަންދެން މި ބަލި އެކަކު ގައިން އަނެކަކު ގަޔަށް ފެތުރޭނެ.