އިސްރާއީލާއި ލުބުނާނުގެ ހަތިޔާރުއެޅި ޖަމާއަތް ހިޒްބުﷲއާ ދެމެދު ކުރަމުންދާ ހަނގުރާމަ މެދުކަނޑާލުމުގެ އެއްބަސްވުމަށް އަމަލުކުރަން ފަށައިފިއެވެ.
އެއްބަސްވުމަށް އަމަލު ކުރަން ފަށާފައިވާއިރު، އަހަރަކަށްވުރެ ގިނަ ދުވަސްވެފައިވާ އެ ހަނގުރާމައިގައި އެތައް ހާސް ބަޔަކު ވަނީ މަރުވެފައެވެ.
އިސްރާއީލުގެ ކެބިނެޓުން ހަނގުރާމަ ހުއްޓާލުމަށް ރުހުން ދީފައި ވަނީ އެތަނުގެ ގަޑިން ފަތިހު 4:00 (ރާއްޖެ ގަޑިން ހެނދުނު 7:00) އިން ފެށިގެންނެވެ.
ހަނގުރާމަ މެދުކަނޑައިލުމަށް ނިންމާފައި ވަނީ ދެ މަސްދުވަހަށެވެ.
އެމެރިކާގެ ރައީސް ޖޯ ބައިޑަން ވިދާޅުވި ގޮތުގައި އިސްރާއީލާއި ހިޒްބުاللهއާ ދެމެދު ވެވުނު އެއްބަސްވުމުގައި އިސްރާއީލުގެ ސިފައިން 60 ދުވަހުގެ ތެރޭގައި ލުބުނާނުން ފައިބާނެއެވެ. ނަމަވެސް ހިޒްބުاللهއިން އަލުން ހަނގުރާމައަށް ތައްޔާރުވެދާނެތީ ލުބުނާނުގެ އަސްކަރިއްޔާއިން އެގައުމުގެ ދެކުނުގެ ސަރަހައްދުތައް ކޮންޓްރޯލް ކުރާނެއެވެ.
ހަނގުރާމަ ހުއްޓާލި ނަމަވެސް އިސްރާއީލުގެ އަސްކަރިއްޔާ (އައިޑީއެފް) އިންވެސް އެއްބަސްވުމުގެ މާއްދާތަކަށް ބިނާކޮށް، އަދިވެސް ލުބުނާނުގެ ދެކުނުގައި ތިބޭނެ ކަމަށް ސިފައިންގެ ތަރުޖަމާނު އަވިޗައި އަދްރޭ އެކްސްގައި ކުރެއްވި ޕޯސްޓެއްގައި ވިދާޅުވިއެވެ. އަދި އައިޑީއެފް އިން ހުސްކުރަން އަންގާފައިވާ ސަރަހައްދުތަކަށް އާންމުން ދިއުން ވަނީ މަނާކޮށްފައެވެ.
އެމެރިކާ އާއި ފަރަންސޭސިވިލާތުން ވަނީ އެ އެއްބަސްވުން ފުރިހަމައަށް ތަންފީޒު ކުރުމަށް އިސްރާއީލާއި ލުބުނާނާ ގުޅިގެން މަސައްކަތް ކުރާނެ ކަމަށް ވައުދުވެފައި ކަމަށް ބައިޑަން ވިދާޅުވިއެވެ.
ލުބުނާނުގައި ހަނގުރާމަ ހުއްޓާލުމަކީ، މިދިޔަ އަހަރުގެ އޮކްޓޯބަރު މަހުން ފެށިގެން އެމީހުން ހަމަލާތައް ދެމުން އަންނަ ފަލަސްތީނުގެ ޣައްޒާއަށް ބޮޑަށް ފޯކަސް ކުރެވިގެންދާނެ ކަމެއް ކަމަށް ލުބްނާނު ހަނގުރާމަ ހުއްޓާލުމަށް އެއްބަސްވުމުގެ ކުރިން އިސްރާއީލުގެ ބޮޑު ވަޒީރު ނަތަންޔާހޫ ވަނީ ވިދާޅުވެފައެވެ. އަދި ޣައްޒާއަށް ދޭ ހަމަލާތައް ވަރުގަދަކުރާނެ ކަމަށް ނަތަންޔަހޫ ވަނީ ވިދާޅުވެފައެވެ.
"ހިޒްބުﷲ މަންޒަރުން ބޭރުވީމާ ހަމާސް އޮތީ ހަނގުރާމައިގައި އެކަނި. އެކަމަށް އަހަރެމެން ޕްރެޝަރު އިތުރުކުރާނަން،" ނަތަންޔާހޫ ވިދާޅުވިއެވެ.
"ހަނގުރާމަ ހުއްޓާލުމުން އީރާނުގެ ނުރައްކަލަށް ފޯކަސް ކުރެވޭނެ."
މިދިޔަ އަހަރު އޮކްޓޫބަރު މަހު އިސްރާއީލުން ލުބުނާނަށް ހަމަލާދޭން ފެށިފަހުން މިހާތަނަށް 3،823 މީހުން ވަނީ ހަމަލާތަކުގައި މަރުވެފައެވެ. އޭގެތެރެއިން ގިނަ މީހުން މަރުވެފައިވަނީ ފާއިތުވެދިޔަ މަސްތަކުގައި ދިން ހަމަލާތަކުގައެވެ.
ހަމަލާތަކުގައި 15،600އަށް ވުރެ ގިނަ މީހުން ޒަހަމްވެފައިވާއިރު، އެއް މިލިއަނަށް ވުރެ ގިނަ މީހުން ވަނީ ގެދޮރު ދޫކޮށް ދާން މަޖުބޫރުވެފައެވެ.