ޓެލްއަވީވު (26 ނޮވެންބަރު 2024) : އިސްރާއީލުން ފަލަސްތީނުގެ މިނިވަންކަމަށް ހުރަސްއަޅައި ޣައްޒާގެ އާންމުންނާ ދެކޮޅަށް ހިންގާ ގަތުލު އާންމުތައް ކުށްވެރިކޮށް ޚަބަރާއި މައުލޫމާތު ގެނަސްދޭ އިސްރާއީލުގެ ނޫހެއްކަމަށްވާ "ހާއާރެޓްސް" އާ ދެކޮޅަށް އިސްރާއީލު ސަރުކާރުން ފިޔަވަޅު އަޅައިފިއެވެ.
އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އިއްޔެ ނިންމާފައިވަނީ އިސްރާއީލު ސަރުކާރުގެ ރަސްމީ އެއްވެސް އިއުލާނެއް އަދި ލިޔުމެއް "ހާއާރެޓްސް" ނޫހަށް ނުދިނުމަށާއި އިސްރާއީލުގެ މަސްއޫލުވެރިން ބާއްވާ ނޫސްވެރިންގެ ބައްދަލުވުންތަކަށް ދިޔުމުގެ ހުއްދަވެސް އެ ނޫހަށް ނުދިނުމަށެވެ.
މީގެ އިތުރުން އިސްރާއީލު ސަރުކާރުން ނޫސްވެރިންނަށް ދޭ އެއްވެސް ފަސޭހައެއް "ހާއާރެޓްސް" އަށް ނުލިބޭގޮތަށް ވެސް ނަތަންޔާހޫ ވަނީ ނިންމާފައެވެ.
އިސްރާއީލަކީ ނޫސްވެރިކަމުގެ މިނިވަންކަން އޮތް ގަމެއްކަމަށް އަޑުއެރުވިނަމަވެސް މިނިވަން ނޫސްވެރިން އެންމެ ގިނައިން މެރުމުގެ ރެކޯޑު ދުނިޔޭގައި އޮތް ގައުމަކީ އިސްރާއީލެވެ. އިސްރާއީލު ވަނީ ޣައްޒާގައި އިސްރާއީލުން ހިންގާ ގަތުލުއާންމުތަކާއި ލާއިންސާނީ ޖަރީމާތަކުގެ ޚަބަރުތައް ކަވަރު ކުރާ ފަލަސްތީނުގެ ނޫސްވެރިންނާއި އަލްޖަޒީރާގެ ނޫސްވެރިން ގިނަ އަދަދަކަށް މަަރައި މީގެ އިތުރުން ހުޅަނގުގެ ބައެއް ނޫސްވެރިން ވެސް މަރާފައެވެ.
އަދި އިސްރާއީލުން ވަނީ ފަލަސްތީނުގެ އެތައް ނޫސްވެރިއަކާއި އަލްޖަޒީރާގެ އެތައް ނޫސްވެރިއެއް މަރާލާފައެވެ. އަދި ބައެއް ނޫސްވެރިންނަށް ހަމަލާދީ އެ މީހުން ޒަޚަމްކޮށްފައި އެ މީހުންގެ މައިންބަފައިންނާއި އެ މީހުންގެ ދަރިންނާއި އާއިލާގެ އެތައް މެންބަރަކަށްވެސް ހަމަލާދީ ގޯނާކޮށް އަދި މަރާލާފައިވެއެވެ.
ޣައްޒާގެ ހަނގުރާމައިގެ ކުރިން އިސްރާއީލުން ވަނީ ފަލަސްތީނުގެ ހުޅަނގު އައްސޭރީގައި ހުންނެވި އަލްޖަޒީރާ ސީިނިއާ މުރާސިލު ޝީރީން އަބޫ އަގީލާގެ ގަޔަށްވެސް ބަޑިޖަހައި މަރާލާފައެވެ. މި ޖަރީމާއަށްވެސް ފުރަތަމަ އިސްރާއީލުން ކުރީ އިންކާރެވެ. ނަމަވެސް ފަހުން އިސްރާއީލުގެ ސިފައިން ވަނީ މިޖަރީމާ ހިންގިކަމަށް އަމިއްލައަށް އެއްބަސްވެފައެވެ.
އިސްރާއީލުން ނޫސްވެރިންނާ ދެކޮޅަށް ތަކުރާރުކޮށް ހިންގާ މިފަދަ އެތައް ޖަރީމާތަކަކާ ގުޅިގެން ނޫސްވެރިކަމުގެ މިނިވަންކަމަށް މަސައްކަތްކުރާ ޖަމާއަތެއްކަމަށްވާ "ރިޕޯޓާސް ވިތައުޓް ބޯޑާސް" އިން ވަނީ ދުނިޔޭގައި އެންމެ ގިނައިން ނޫސްވެރިން މަރާ ގައުމަކީ އަދި ނޫސްވެރިންނަށް ހަތިތާރުން ބިރުދައްކާ ގައުމަކީ އިސްރާއީލު ކަމަށް ކަނޑައަޅާފައެވެ.
އިސްރާއީލުން ޣައްޒާއާ އަދި ލުބްނާނާ ދެކޮޅަށް ހިންގާ ގަތުލުއާންމު ތަކަށް ބަލާއިރުވެސް އެކަމާބެހޭ ޚަބަރުތައް ފެތުރުމުގެ ހުއްދަ އިސްރާއީލުން ދީފައި ވަނީ އިސްރާއީލު ސިފައިން ސެންސަރު ކުރުމަށްފަހު ދޭ ޚަބަރުތަކަށް އެކަންޏެވެ. ހަނގުރާމައިގެ ޚަބަރުތަކާއި މައުލޫމާތުގެ ތެރެއިން އިސްރާއީލު ސިފައިން ސެންސަރު ނުކުރާ ޚަބަރުތައް ފެތުރުން ވަނީ މަނާކޮށްފައެވެ.
ނަމަވެސް އިސްރާއީލުގައި ނޫސްވެރިކަމުގެ މިނިވަންކަން ވަކި ދާއިރާތަކެއްގައި އޮވެއެވެ. މިނިވަންކަން އޮންނަނީ އެ ގައުމުގެ ދާޚިލީ ޕޮލިޓިކްސް ގައެެވެ. ސަރުކާރާއި އިދިިކޮޅުގެ ސިޔާސީ ކޯޅުންތަކުގައެވެ. ޕާޓީތަކުގެ ޕޮލިޓިކްސްގައި ސަރުކާރާ ދެކޮޅަށް ފާޑުކިޔުމުގެ ހުއްދަ އޮވެއެވެ. ނަމަވެސް ފަލަސްތީނާ ގުޅޭ އެއްކަމެެއްގައިވެސް މިނިވަންކަމެއް ނޯވެއެވެ.
"ހާއާރެޓްސް" ނޫހަކީ އިސްރާއީލުގައި ނެރޭ ހަމައެކަނި މިނިވަން ނޫސްކަމަށް ގިނަ ބަޔަކު ދެކެއެވެ. "ހާއާރެޓްސް" ނޫހުން ދާދިފަހުންވަނީ އިސްރާއީލުން ޣައްޒާއާއި ލުބްނާނަށް ދޭ ހަމަލާތަކަކީ އާންމުން މެރުމަށް އަމާޒުކޮށްގެން ދޭ ހަމަލާތަކެއް ކަމަށް ސިފަކޮށްފައެވެ. އިސްރާއީލުން ހަތިޔާރުގެ ބޭނުންކޮށްގެން ފަލަސްތީނުގެ މިނިވަންކަމަށް ހުރަސްއަޅާ ކަމަށާއި ހަމާސް ޖަމާއަތަކީ އިސްރާއީލުގެ އަޅުވެތިކަން ނައްތާލައި ފަލަސްތީނުގެ މިނިވަންކަން ހޯދުމަށް މަސައްކަތްކުރާ "ފްރީޑަމް ފައިޓާސް" އިން ގެ ގޮތުގައިވެސް އެ ނޫހުން ސިފަކުރެއެވެ.
ތާއަބަދަށް ފަލަސްތީނުގެ ބިންތައް ގަދަބާރުން ހިފައިގެން އިސްރާއީލަށް ނޯވެވޭނެ ކަމަށާއި އިސްރާއީލަކީ އިސްތިއުމާރީ ބާރެއްކަމަށާއި އިސްރާއީލަށް އަމާންކަން ލިބޭނެ ހަމައެކަނި ގޮތަކީ ފަލަސްތީނުގެ ބިންތަކުން ފާބައި މިނިވަން ދައުލަތެއް ބިނާކުުރުމުގެ ފުރުސަތު ފަލަސްތީނަށް ދީގެންކަމަށްވެސް އެ ނޫހުން ސިފަކޮށްފައިވެއެވެ.
ޣައްޒާގައި ހަނގުރާމައިގެ ޖަރީމާ ހިންގާ ކަމުގެ ތުހުމަތުގައި އިސްރާއީލުގެ ބޮޑުވަޒީރު ހައްޔަރު ކުރުމުގެ އަމުރު ބައިނަލްއަގްވާމީ ކޯޓުން ދާދިފަހުން ނެރެމުންވެސް "ހާއާރެޓްސް" އިންވަނީ އެއަމުރަށް ތާއީދުކޮށް އާޓިކަލް ތައް ޝާއިއުކޮށްފައެވެ.
އިސްރާއީލުގެ އެހެން މީޑިއާ ތަކުން މިމައްސަލާގައިވެސް ގެންގުޅެފައިވަނީ އިސްރާއީލު ސަރުކާރުގެ ސްޓޭންޑެވެ. އެމެރިކާއާއި ޔޫރަޕްގެ މެއިންސްޓްރީން މީޑީއާ ތަކަކީ ޔަހޫދީ މަހުޖަނުން ކޮންޓްރޯލް ކުރާ މީޑީއާ ތަކަކަށްވާތީ އެމީޑީއާ ތަކުންވެސް މިމައްސަލާގައި ގެންގުޅެނީ އިސްރާއީލު ސަރުކާރުގެ ސްޓޭންޑެވެ.