ތަދުކަނޑުވަން ބޭނުންކުރާ ދެ ބޭހަކުން ނުރައްކާތެރި ދެ ކެމިކަލެއް ފެނިފައިވާތީ އެކަމަށް ސަމާލުވުމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ)އިން އިލްތިމާސްކޮށްފިއެވެ.
އެކަމާ ގުޅިގެން އެމްއެފްޑީއޭއިން ނެރުނު ބަޔާނެއްގައި ވަނީ، ނުރައްކާތެރި ކެމިކަލެއް ކަމަށްވާ ޑައިއީތަލިން ގްލައިކޯލް އަދި އީތައިލިން ގްލައިކޯލް ފެނިފައިވަނީ ޕާކިސްތާނުން އުފައްދައި މެފްނެކް ސުސްޕެންޝަންގެ 50 މިލިގްރާމް (މެފެނަމިކް އެސިޑް) އަދި މެލޭޝިއާގައި އުފައްދާ އެކްސެލް މެފެނެމިކް އެސިޑް ސަސްޕެންޝަން 125 މިލިގްރާމް (މެފެނެމިކް އެސިޑް)އިން ކަމަށެވެ.
މި ވަގުތު މި ދެ ބޭހުގެ ކޮންފަމޭޓްރީ ޓެސްޓު ހެދުމަށް ރާއްޖޭން ބޭރަށް ފޮނުވުމުގެ މަސައްކަތް ކުރަމުން ދާކަން ފާހަގަކުރައްވައި އެމްްއެފްޑީއޭއިން ބުނީ، އެ އޮތޯރިޓީން ވަކި އެއްޗެއް އަންގަން ދެން އެ ދެ ބޭހުގެ އެއްވެސް ބެޗެއް ރާއްޖެ އެތެރެކުރުމާއި ވިއްކުމާއި ބޭނުންކުރުން ވަގުތީ ގޮތުން މަނާކޮށްފައި ވާކަމަށެވެ.
އެހެންކަމުން މިވަގުތު ބޭސްފިހާރަތަކުގައި ހުރި މި ބޭހުގެ ސްޓޮކްތައް ވެސް ވަކިކޮށްފައި ބެހެއްޓުމަށް އެމްއެފްޑީއޭއިން ވަނީ އިލްތިމާސްކޮށްފައެވެ.
ރާއްޖޭގެ މާކެޓުގައި ލިބެން ހުންނަ ބޭހަކީ ފެންވަރު ރަނގަޅު، ރައްކާތެރި ބޭސްކަން ކަށަވަރު ކުރުމަށްޓަކައި އެ އޮތޯރިޓީން ގިނަގުނަ މަސައްކަތްތައް ކުރަމުން އަންނަ ކަމަށް އެމްއެފްޑީއޭއިން ވަނީ ބުނެފައެވެ.
އެގޮތުން، މާކެޓުން ބޭހުގެ ސާމްޕަލް ނަގައި ސްކްރީން ކުރުމުގެ މަސައްކަތް ވެސް މެދުނުކެނޑި ކުރިއަށްގެންދާ ކަމަށް އެމްއެފްޑީއޭއިން ބުންޏެވެ.