އޮސްޓްރޭލިއާ ސަރުކާރުން 16 އަހަރުން ދަށުގެ ކުދިންނަށް ސޯޝަލް މީޑިއާ ބޭނުންކުރުން މަނާކުރަން ހުށަހަޅާފައިވާ ބިލު ލަސްކުރަން ގޫގުލްއާއި މެޓާއިން އެ ގައުމުގެ ސަރުކާރަށް ގޮވާލައިފިއެވެ.
ދެ ކުންފުނިން ބުނެފައިވަނީ މި ބިލުގެ ސަބަބުން ކުރާނެ އަސަރުތައް ދެނެގަތުމަށް އިތުރު ވަގުތު ބޭނުންވާ ކަމަށެވެ.
ބިލު ހުށަހެޅީ ވޭތުވެދިޔަ ހަފުތާގައެވެ. މި ބިލާ ގުޅޭގޮތުން ޚިޔާލު ހުށަހެޅުމަށް ދީފައިވަނީ އެންމެ ދުވަހެކެވެ. ބިލު ފާސްކުރުމުގެ ކުރިން އުމުރު ކަށަވަރުކުރުމުގެ ނިޒާމެއް ތަޖުރިބާކުރުމަށް ފަހު، އޭގެ ނަތީޖާ ބެލުމަށް ގޫގުލްއާއި މެޓާއިން ވަނީ ހުށަހަޅާފައެވެ. މި ނިޒާމުގައި ބަޔޯމެޓްރިކްސް ނުވަތަ ސަރުކާރުގެ އައިޑީ ބޭނުންކޮށްގެން އުމުރު ކަށަވަރުކުރުން ހިމެނިދާނެއެވެ.
މެޓާއިން ބުނެފައިވަނީ މިފަދަ ނަތީޖާތަކެއް ނެތި، މި ބިލުން ލާޒިމުކުރާ އުމުރު ކަށަވަރުކުރުމުގެ ނިޒާމުގެ ބާވަތާއި މިންވަރު އަދި އޮސްޓްރޭލިއާގެ ރައްޔިތުންނަށް މީގެ ސަބަބުން ކުރާނެ އަސަރު އެއްވެސް ފަރާތަކަށް ނޭނގޭނެ ކަމަށެވެ. އަދި، މިހާރު އޮތް ގޮތުން މި ބިލަކީ ފުށުއަރާ އަދި ނާކާމިޔާބު ބިލެއް ކަމަށް މެޓާއިން ބުނެފައިވެއެވެ.
އެންތަނީ އަލްބަނީޒްގެ ސަރުކާރުން މި ބިލު ބުރާސްފަތި ދުވަހުގެ ނިޔަލަށް ފާސްކުރަން ބޭނުންވެއެވެ. މި ބިލު ފާސްވެއްޖެނަމަ، ކުޑަކުދިން ސޯޝަލް މީޑިއާ ބޭނުންކުރުމާ ގުޅޭގޮތުން ގައުމަކުން މިހާތަނަށް ހަދާފައިވާ އެންމެ ހަރުކަށި ގަވާއިދުތަކުގެ ތެރޭގައި މި ގަވާއިދު ހިމެނޭނެއެވެ.
މި ބިލުގެ ދަށުން، ކުޑަކުދިންނާއި ބެލެނިވެރިންގެ ބަދަލުގައި ސޯޝަލް މީޑިއާ ޕްލެޓްފޯމްތަކުން އުމުރު ކަށަވަރުކުރުމުގެ ނިޒާމްތައް ގާއިމުކުރަން އެކަށީގެންވާ ފިޔަވަޅުތައް އަޅަން ޖެހޭނެއެވެ. މި ގާނޫނާ ޚިލާފުވާ ކުންފުނިތަކަށް 49.5 މިލިއަން އޮސްޓްރޭލިއަން ޑޮލަރު (32 މިލިއަން އެމެރިކާ ޑޮލަރު) އަށް ވުރެ ބޮޑު ޖޫރިމަނާއެއް ކުރެވޭނެއެވެ.
އޮސްޓްރޭލިއާ ސަރުކާރުގެ އިދިކޮޅު ޕާޓީ ކަމުގައިވާ ލިބަރަލް ޕާޓީން މި ބިލަށް ތާއީދުކުރާނެ ކަމަށް ބެލެވެއެވެ. ނަމަވެސް، ބައެއް މިނިވަން މެންބަރުން ބުނެފައިވަނީ ސަރުކާރުން މުޅި މަސައްކަތް އަވަސް އަރުވާލައިގެން ކުރަމުންދާ ކަމަށެވެ.
މުވާސަލާތާ ބެހޭ ގާނޫނުތަކާ ގުޅޭ ސެނެޓް ކޮމިޓީން މި މައްސަލައާ ގުޅޭ ރިޕޯޓެއް އަންގާރަ ދުވަހު ނެރުމަށް ވަނީ ހަމަޖެހިފައެވެ.
ޓިކްޓޮކްއިން ބުނެފައިވަނީ ތަޖުރިބާކާރުންނާއި، ސޯޝަލް މީޑިއާ ޕްލެޓްފޯމްތަކާއި، ނަފުސާނީ ޞިއްޙަތާ ބެހޭ ޖަމްޢިއްޔާތަކާއި އަދި ޒުވާނުންނާ މަޝްވަރާކުރުމާނުލައި މި ބިލު ފާސްކުރަން ސަރުކާރުން ރާވާފައިވާތީ އެ ކަމާ "ބޮޑެތި ކަންބޮޑުވުންތަކެއް" ހުރި ކަމަށެވެ.
އެލޮން މަސްކްގެ އެކްސްއިން ފާހަގަކޮށްފައިވަނީ މި ބިލުގެ ސަބަބުން ކުޑަކުދިންނާއި ޒުވާނުންގެ އިންސާނީ ޙައްޤުތަކަށް ނޭދެވޭ އަސަރުކުރާނެ ކަމަށެވެ. މީގެ ތެރޭގައި އެ ފަރާތްތަކުގެ ޚިޔާލުފާޅުކުރުމުގެ މިނިވަންކަމާއި މަޢުލޫމާތު ލިބިގަތުމުގެ ޙައްޤު ހިމެނެއެވެ.
ވާހަކަދެއްކުމުގެ މިނިވަންކަމުގެ ޙައްޤުގެ ދިފާޢުގައި މަސައްކަތްކުރާ ފަރާތެއްގެ ގޮތުގައި އަމިއްލައަށް ބުނަމުންދާ އެލޮން މަސްކް ވަނީ މިދިޔަ ހަފުތާގައި އޮސްޓްރޭލިއާ ސަރުކާރަށް ފާޑުކިޔައި، މި ބިލަކީ އިންޓަނެޓް ބޭނުންކުރުން ކޮންޓްރޯލްކުރުމަށް އޮޅުވާލައިގެން ގެނެވޭ ގޮތެއް ކަމަށް ބުނެފައެވެ.