އަޑުބަދަލުކޮށް އައު އަޑުތައް އުފެއްދޭ މުޅިން އާ އޭއައި މޮޑެލްއެއް އެންވީޑިއާއިން ދައްކާލައިފިއެވެ.
ޓެކްނޮލޮޖީ ދުނިޔޭގެ ބޮޑު ކުންފުންޏެއް ކަމަށްވާ އެންވީޑިއާއިން 'ފުގާޓޯ' ނަމުގައި ތަޢާރަފުކޮށްފައިވާ މި މޮޑެލްއަކީ މިއުޒިކާއި އޯޑިއޯ އުފެއްދުމަށް ބޭނުންކުރެވޭނެ ޓެކްނޮލޮޖީއެކެވެ.
މި އައު ޓެކްނޮލޮޖީގެ ޒަރީއާއިން އަޑުތައް ބަދަލުކުރުމާއި އައު އަޑުތައް އުފެއްދުމުގެ ޤާބިލުކަން ލިބިގެންދާނެ ކަމަށް އެންވީޑިއާއިން ބުނެފައިވެއެވެ. މިގޮތުން މިއުޒިކް، ފިލްމު އަދި ވީޑިއޯ ގޭމް އުފައްދާ ފަރާތްތަކަށް މި ޓެކްނޮލޮޖީ އަމާޒުކުރެވިފައިވާ ކަމަށް އެ ކުންފުނިން މަޢުލޫމާތު ދީފައިވެއެވެ.
އޭއައި ސިސްޓަމްތައް އުފެއްދުމަށް ބޭނުންކުރާ ޗިޕްސްތަކާއި ސޮފްޓްވެއާ އުފައްދާ އެންމެ ބޮޑު ކުންފުނި ކަމަށްވާ އެންވީޑިއާއިން ބުނެފައިވަނީ މި ވަގުތަށް މި ޓެކްނޮލޮޖީ އާންމުކޮށް ދޫކުރުމުގެ ޕްލޭނެއް ނެތް ކަމަށެވެ.
ފުގާޓޯގެ ޚާއްޞަ ކަމަކީ މިހާރު ހުރި އޯޑިއޯތައް ބަދަލުކުރެވޭ ކަމެވެ. މިސާލަކަށް ޕިއާނޯއިން ކުޅެފައިވާ މިއުޒިކެއް އިންސާނީ އަޑަކަށް ބަދަލުކުރުމާއި، ވާހަކަދައްކާފައިވާ އަޑުގެ މޫޑު ބަދަލުކުރުމުގެ ޤާބިލުކަން މި ޓެކްނޮލޮޖީގައި ހިމެނެއެވެ.
އެންވީޑިއާގެ އެޕްލައިޑް ޑީޕް ލާނިން ރިސާޗްގެ ވައިސް ޕްރެޒިޑެންޓް ބްރަޔަން ކަޓަންޒާރޯ ވިދާޅުވެފައިވަނީ ޖެނެރޭޓިވް އޭއައި އިން މިއުޒިކް، ވީޑިއޯ ގޭމް އަދި އާންމު މީހުންނަށް އުފެއްދުންތެރި ކަންކަން ކުރުމަށް މަގުފަހި ކޮށްދޭނެ ކަމަށެވެ.
ކަޓަންޒާރޯ އިތުރަށް ވިދާޅުވެފައިވަނީ ޖެނެރޭޓިވް ޓެކްނޮލޮޖީތަކުގައި އަބަދުވެސް ރިސްކުތަކެއް ހުންނާނެ ކަމަށެވެ. އެގޮތުން މީހުން މި ޓެކްނޮލޮޖީ ބޭނުންކޮށްގެން ނާޖާއިޒު ކަންކަން އުފައްދަފާނެ ކަމަށް އޭނާ އިޝާރާތް ކުރެއްވިއެވެ. އެހެންކަމުން މިކަމާމެދު ފަރުވާތެރިވާން ޖެހޭ ކަމަށާއި، އެހެންވެ މިވަގުތު މި ޓެކްނޮލޮޖީ ދޫކުރުމުގެ ޕްލޭނެއް ނެތް ކަމަށް އޭނާ ވިދާޅުވިއެވެ.
މިފަދަ ޓެކްނޮލޮޖީގެ ނަހަމަ ބޭނުން ކުރުން ހުއްޓުވާނެ ގޮތެއް ޖެނެރޭޓިވް އޭއައި މޮޑެލްތައް އުފައްދާ ފަރާތްތަކުން އަދި ކަނޑައަޅާފައެއް ނުވެއެވެ. މިސާލަކަށް ދޮގު މަޢުލޫމާތު ފެތުރުމަށް ނުވަތަ ކޮޕީރައިޓް އޮންނަ ކެރެކްޓަރުތައް އުފެއްދުމަށް މި ޓެކްނޮލޮޖީ ބޭނުންކުރުން ހުއްޓުވާނެ ގޮތެއް އަދި މިހާތަނަށް ކަނޑައަޅާފައެއް ނުވެއެވެ.
އޯޕެން އޭއައި އާއި މެޓާއިން ވެސް އެ ކުންފުނިތަކުގެ އޯޑިއޯ ނުވަތަ ވީޑިއޯ އުފައްދާ މޮޑެލްތައް އާންމުކޮށް ދޫކުރާނެ ތާރީޚެއް އަދި ބުނެފައެއް ނުވެއެވެ.