ދުނިޔޭގެ އެންމެ ބޮޑު ސީޕްލޭން ފްލީޓް، ޓްރާންސް މޯލްޑިވިއަން އެއާވޭސް (ޓީއެމްއޭ)އިން މި އަހަރުގެ ވޯލްޑް ލީޑިން ސީޕްލޭން އޮޕަރޭޓަރުގެ މަގާމު ހޯދައިފިއެވެ.
އިއްޔެ ޕޯޗުގަލްގައި ބޭއްވި އެނުއަލް ޓްރެވަލް އެވޯޑްސްގައި ޓީއެމްއޭއަށްވަނީ ވޯލްޑް ލީޑިން ސީޕްލޭން އޮޕަރޭޓާ 2024ގެ އިތުރުން، އިންޑިއަން އޯޝަންސް ލީޑިން ސީޕްލޭން އޮޕަރޭޓާ 2024ގެ އެވޯޑުގެ ވެސް ލިބިފައެވެ. މިއީ އެ ކުންފުނިން މި މަގާމު ވިދިވިދިގެން ހޯދި 10ވަނަ ފަހަރެވެ.
މި ކާމިޔާބީއާ ގުޅިގެން ޓީއެމްއޭގެ ސީއީއޯ، އޭޔޫއެމް ފައުޒީ ވިދާޅުވީ ވޭތުވެދިޔަ 10 އަހަރު ވިދިވިދިގެން މި ދުނިޔޭގެ ފެންވަރުގައި އެ ކުންފުނިން ދެމުންދާ ޚިދުމަތް ފާހަގަކުރެވުމަކީ ވަރަށް ބޮޑު އުފަލެއް ކަމަށެވެ. އޭނާ ވިދާޅުވި ގޮތުގައި ޓީއެމްއޭއިން އަބަދު ވެސް މަސައްކަތް ކުރަނީ ސީޕްލޭންގެ ޚިދުމަތުގެ ފެންވަރުމަތިކޮށް، ކޮންމެ ދަތުރަކީ ވެސް ހަނދާނުގައި ބެހެއްޓޭނެ ތަޖުރިބާއަކަށް ހެދުމަށެވެ. އަދި މި ޚިދުމަތުގައި އެ ކުންފުނިން ދެމިތިބޭނެ ކަމުގެ ޔަގީންކަން އޭނާ ދެއްވިއެވެ.
ޓީއެމްއޭގެ ސީޕްލޭނެއް -- ފޮޓޯ/ ޓީއެމްއޭ
ވޯލްޑް ޓްރެވަލް އެވޯޑްސްގައި ލިބުނު ކާމިޔާބީގެ އިތުރުން، ޓީއެމްއޭއިން މި އަހަރު، ފާހަގަކޮށްލެވޭ އިތުރު ކާމިޔާބީތަކެއް ވެސް ހޯދާފައިވެއެވެ. އޭގެ ތެރޭގައި ސައުތު އޭޝިއަން ޓްރެވަލް އެވޯޑްސް (ސާޓާ) ގައި ލީޑިން ޓޫރިސްޓް ޓްރާންސްޕޯޓް ޕްރޮވައިޑާ (އެއާ)ގެ މަގާމާއި، ސެވަން ސްޓާސް ލަގްޒަރީ ހޮސްޕިޓަލިޓީ އެންޑް ލައިފްސްޓައިލް އެވޯޑްސްގައި ބެސްޓް ލަގްޒަރީ ސީޕްލޭން ލައުންޖް ފޯ އިންފިނިޓީ މަގާމު ހޯދާފައިވެއެވެ.
މީގެ އިތުރުން ވެސް ޓީއެމްއޭގެ މެއިންޓެނަންސް، ރިޕެއާ އެންޑް އޯވަހޯލް (އެމްއާރްއޯ) ފެސިލިޓީ ޑީއެޗްސީ އެންޑޯސްޑް ސާވިސް ސެންޓަރެއްގެ ގޮތުގައި ފާހަގަވެގެން ދިއުމުގެ ޝަރަފު ވެސް އެ ކުންފުންޏަށް ވަނީ ލިބިފައެވެ. ޓީއެމްއޭއަކީ މި ޝަރަފު ހޯދި ދެކުނު އޭޝިއާގެ ފުރަތަމަ އެއާލައިނެވެ.
ޓީއެމްއޭ އިން މި މުހިންމު އަހަރު ފާހަގަކުރާއިރު، އެ ކުންފުނީގެ ރިޒޯޓް ޕާޓްނަރުންނަށާއި، ލޯޔަލް ކަސްޓަމަރުން އަދި ކުންފުނީގެ މުވައްޒަފުންނަށް ވެސް ވަނީ ޝުކުރު އަދާކޮށްފައެވެ.
ޓީއެމްއޭގެ ސީޕްލޭނެއް -- ފޮޓޯ/ ޓީއެމްއޭ
ޓީއެމްއޭ އުފެދުނީ 1993ގައެވެ. އެ ކުންފުނި އުފެދުނީއްސުރެން އަންނަނީ ރާއްޖޭގައި ސީޕްލޭންގެ ޚިދުމަތް ތަރައްގީކޮށް ފުޅާކުރަމުންނެވެ.
މިހާރު ޓީއެމްއޭއިން ދަނީ ޚިދުމަތް ދިނުމަށް ޓަކައި 65 ޑީއެޗްސީ-6 ޓްވިން އޮޓާ މަތިންދާބޯޓު ބޭނުން ކުރަމުންނެވެ. މީގެ ތެރޭގައި 13 ރިސޯޓް ބްރޭންޑެޑް މަތިންދާބޯޓާއި ދެ ވީއައިޕީ ކޮންފިގާޑް މަތިންދާބޯޓު ހިމެނެއެވެ.
ރާއްޖޭގެ 16 އަތޮޅެއްގައި ހުރި ދުނިޔޭގެ ފެންވަރުގެ 80އަށްވުރެ ގިނަ ރިޒޯޓުތައް ޓީއެމްއޭގެ ވައިގެ ދަތުރުފަތުރުން ގުޅާލާފައިވާއިރު، ދުވާލެއްގެ މައްޗަށް 400އަށްވުރެ ގިނަ ދަތުރު ޓީއެމްއޭގެ ބޯޓުތަކުން ކުރެއެެވެ.
އެ ކުންފުންޏަކީ ދިވެހި ފަތުރުވެރިކަން ކުރިއެރުވުމުގައި ވެސް ވަރަށް މުހިންމު ބައިވެރިއެކެވެ.