އިސްރާއީލުގެ އަސްދޫދު ސިޓީގައި ހުރި ކަނޑުގެ ސިފައިންގެ މަރުކަޒަކަށް ހަމަލާދީ، އެންމެ ފަހުގެ ހަތިޔާރު ބޭނުންކޮށްގެން އަސްކަރީ މަރުކަޒަކާ ދެކޮޅަށް އޮޕަރޭޝަން ހިންގާފައިވާ ކަމަށް އީރާނުގެ ތާއީދު އޮންނަ ލުބުނާނުގެ ހަތިޔާރު އެޅި ޖަމާއަތް ހިޒްބުﷲ އިން ބުނެފިއެވެ.
އިސްރާއީލުގެ އަސްކަރިއްޔާއިން ރިޕޯޓްކޮށްފައިވާ ގޮތުގައި ތެލް އަވީވް ހިމެނޭ ގޮތަށް އިސްރާއީލުގެ މެދުތެރެއާއި އުތުރުގެ ސަރަހައްދުތަކުގައި ވައިގެ ހަމަލާތަކުގެ އަޑު އިވިފައިވެއެވެ.
އިސްރާއީލުގެ އުތުރަށް ފޮނުވާލި ގިނަ އަދަދެއްގެ މިސައިލް ހުއްޓުވާފައިވާ ކަމަށް އަސްކަރިއްޔާއިން ބުނެފައިވާއިރު، ލުބުނާނުން 250 މިސައިލް ފޮނުވާލާފައިވާ ކަމަށް ވެސް އަސްކަރިއްޔާއިން ބުނެއެވެ.
ފަހުން އިސްރާއީލު ސިފައިންގެ ރޭޑިއޯއިން ރިޕޯޓްކޮށްފައިވާ ގޮތުގައި ލުބުނާނުން 340 މިސައިލް ފޮނުވާލާފައިވެއެވެ.
އެ ހަމަލާތަކުގައި ގާތްގަޑަކަށް 11 މީހަކު ޒަޚަމްވެފައިވާއިރު، އޭގެ ތެރޭގައި ހާލު ސީރިއަސް މީހަކުވެސް ހިމެނޭ ކަމަށް މެޑިކަލް އެޖެންސީތަކުން ބުނެއެވެ.
ހިޒްބުﷲ އިން އެ ހަމަލާ ދީފައި ވަނީ ލުބުނާނުގެ ވެރިރަށް ބެއިރޫތުގެ މެދު ތެރެއަށް އިސްރާއީލުން ދިން ހަމަލާއެއްގައި ގާތްގަޑަކަށް 29 މީހުން މަރުވިތާ އެއް ދުވަސް ފަހުންނެވެ. ލުބުނާނުގެ މިނިސްޓްރީ އޮފް ޕަބްލިކް ހެލްތުން ބުނާ ގޮތުގައި އެ ހަމަލާތަކުގައި އިތުރު 66 މީހަކު ޒަޚަމްވެފައިވެއެވެ.
ލުބުނާނުގެ ބޮޑުވަޒީރު ނަޖީބް މިކާޓީ ވަނީ އެއީ އެމެރިކާ އިސްވެ އޮވެ ކުރަމުންދާ ހަނގުރާމަ ހުއްޓާލުމުގެ މަސައްކަތްތަކަށް ދިން ހަމަލާއެއްގެ ގޮތުގައި ސިފަކުރައްވައި އެކަން ކުށްވެރިކުރައްވާފައެވެ.
މީގެ އިތުރުން ޔޫރަޕިއަން ޔޫނިއަންގެ އެންމެ އިސް ޑިޕްލޮމެޓް ވަނީ އިސްރާއީލާއި ހިޒްބުﷲ އަށް ވެސް ހަނގުރާމަ ހުއްޓާލުމުގެ އެއްބަސްވުމަކަށް އައުމަށް އިތުރު ޕްރެޝާ ކުރުމަށް ގޮވާލާފައެވެ.
އިސްރާއީލުން ލުބުނާނަށް ވައިގެ ހަމަލާތައް ދޭން ފެށީ ސެޕްޓެމްބަރު 23 ވަނަ ދުވަހެވެ. އޭގެ ހަފްތާއެއް ފަހުން އެއްގަމު މަގުން ލުބުނާނުގެ ދެކުނަށް ހަމަލާތައް ދޭން ފަށާފައިވެއެވެ.
ރައްދުގައި ހިޒަބުﷲ އިން ވެސް ހަމަލާތައް ދެމުން އަންނައިރު، ހަމަލާތައް ދިނުން ހުއްޓާލާނީ ޣައްޒާއަށް ހަމަލާދިނުން ހުއްޓާލުމުން ކަމަށް ހިޒްބުﷲއިން ވަނީ ބުނެފައެވެ.
އިސްރާއީލުން ދިން ހަމަލާތަކުގައި ލުބުނާނުގައި 3،500 އަށް ވުރެ ގިނަ މީހުން މަރުވެފައިވާއިރު، ހަނގުރާމައިގެ ސަބަބުން ގާތްގަނޑަކަށް 1.2 މިލިއަން މީހުން ނުވަތަ ލުބުނާނުގެ އާބާދީގެ ތިންބައިކުޅަ އެއްބައި މީހުން ވަނީ ގެދޮރު ދޫކޮށް ގޮސްފައެވެ.