މޮސްކޯ (23 ނޮވެންބަރު 2024) : ރަޝިއާއިން ޔުކްރެއިން އާ ދެކޮޅަށް ހައިޕާ ސޮނިކް އައު މިސައިލެއް ތަޖުރިބާ ކުރުމަށްފަހު, ފަހުގެ ތާރީޚެއްގައި ރަޝިއާއަށް ކުރިމަތިނުވާފަދަ ނުރައްކާތަކެއް ހުޅަނގުގެ ފަރާތުން މިހާރު ކުރިމަތިވަމުންދާ ކަމަށް ވިދާޅުވެ ރަޝިއާގެ ރައީސް ވްލަދިމިޔާ ޕޫޓިން ވާހަކަފުޅު ދައްކަވައިފިއެވެ.
ރަޝިއާއާ ދެކޮޅަށް ބޭނުންކުރުމަށް އެމެރިކާއިން ޔުކްރެއިންއަށް ދީފައިވާ "އަޓަކަމްސް" މަރުކާގެ ދުރުރާސްތާގެ މިސައިލް ބޭނުންކޮށްގެން ފުރަތަމަ ފަހަރަށް ޔުކްރެއިނުން ރަޝިއާއަށް ހަމަލާދިނުމުން އޭގެ ރައްދުގައި ރަޝިއާއިން ވަނީ އެ ގައުމުން އަލަށް އުފެއްދި ހައިޕާސޮނިކް މިސައިލެއް ކަމަށްވާ "އޮރެޝްނިކް" މަރުކާގެ ފުރަތަމަ ތަޖުރިބާ ޔުކްރެއިން އާ ދެކޮޅަށް އިއްޔެ ކޮށްފައެވެ.
މިއީ އެމެރިކާގެ ކޮންމެތަނަކަށްވެސް ބޭނުންވަގުތަކު ހަމަލާދެވޭ ވަރުގެ ދުރުރާސްތާގެ އިންޓަކޮންޓިނެންޓަލް ބަލިސްޓިކް މިސައިލް އެކެވެ. މި މިސައިލް އަމާޒުކުރީ ޔުކްރެއިންގެ ސިނާއީ އަދި އަސްކަރީ ކާރުޚާނާތަކެއް ހުންނަ ބޮޑު އެކުވެންޏަކަށެވެ.
މި ހަމަލާގެ ސަބަބުން މި އެކުވެނި އެއްކޮށްވަނީ ހަލާކުވެ ފުނޑުފުނޑުވެފައިކަމަށް ނުރަސްމީ ރިޕޯޓްތައް ބުނެއެވެ. ރަޝިއާއިން ވަނީ މިއެކުވެނި އެއްކޮށް ފުނޑުފުނޑުކޮށް ލެވުނުކަން ކަށަވަރުކޮށްދީފައެވެ.
ޕޫޓިން މިދާޅުވިގޮތުގައި މި މިސައިލް ތަޖުރިބާއަކީ އިންޒާރެެއް ކަމަށް ބަލާ ފަރާތްތަކުން އެގޮތަށް ބަލަންވީއެވެ. "އޮރެޝްނިކް" މަރުކާގެ ހައިޕާސޮނިކް މިސައިލް ވައްޓާލެވޭނެ އެއްވެސް ދިފާއީ ޓެކްނޮލޮޖީ ދުނިޔޭގެ އެއްވެސް ގައުމެއްގައި ނުހުންނާނެ ކަމަށާއި އަދި އެ މިސައިލަށް ހުރަސްއެޅޭފަދަ ދިފާއީ ނިޒާމެއް މިހާތަނަށް އެއްވެސް ގައުމަކަށް އުފެއްދިފައިނުވާ ކަމަށް ޕޫޓިން ވިދާޅުވިއެވެ. އެހެންކަމުން މިއީ ރަޝިއާގެ އަމަނަށް ނުރައްކާކުރާ ހުޅަނގުގެ ބާރުތަކަށް ރަޝިއާ ދިން އިންޒާރުގެ ހަމަލާއެއްކަމަށް މުހައްލިލުން ސިފަކުރައްވައެވެ.
ނަންހާމަކުރަން ނޭދޭ ރަޝިއާގެ އަސްކަރީ މަސްއޫލުވެރިއަކު ބޭރުގެ ނޫސްތަކަށް ވިދާޅުވިގޮތުގައި މި ބާވަތުގެ މިސައިލުން އެމެރިކާގެ ކޮންމެ ތަނަކަށް ހަމަލާދިން ނަމަވެސް އެހަމަލާއެއް އެމެރިކާއަށް އެއްވެސް ވަރަކަށް ދިފާއު ނުކުރެވޭނެއެވެ. އަދި މި މަރުކާގެ ކޮންމެ މިސައިލެއް ވެސް ހުރަހަކާ ނުލައި އެމެރިކާގެ ކޮންމެ ތަނަކަށްވެސް އަރާނެއެވެ.
ޕޫޓިން އިއްޔެ ވިދާޅުވިގޮތުގައި ރަޝިއާގެ އަސްކަރީ އިންޑަސްޓްރީން މިހާރު ގެންދަނީ އައުބާވަތުގެ ވަރަށް ޒަމާނީ ހަތިޔާރުތަކެއް އުފައްދަމުންނެވެ. އަލަށް އުފައްދާ ހަތިޔާރުތައް ދެން ތަޖުރިބާކުރާނީ ޔުކްރެއިންގެ ތަންތަނަށް ހަމަލާދީގެން ކަމަށްވެސް ޕޫޓިން ވިދާޅުވިއެވެ.
ޕޫޓިން މިމޭރުމުން އިއްޔެ ވާހަކަ ދެއްކެވީ ރަޝިއާ ސިފައިންގެ އަސްކަރީ އިސްކޮމާންޑަރުންނާއި ދިފާއީ ސެކްޓަރުގެ ރެޕްރެޒެންޓެޓިވްސް އިންނާ އަދި އަސްކަރީ ސިނާއަތާބެހޭ އިސް ވެރިންނާ ކްރެމްލިންގައި ބައްދަލުކުރައްވައި ކުރެއްވި މަޝްވަރާތަކުގައެވެ.
ހުޅަނގުން ޔުކްރެއިންއަށް ދެމުން ގެންދާ ބާރުގަދަ ހަތިޔާރުތަކުން ރަޝިއާއަށް ކުރިމަތިވަމުންދާ ނުރައްކާތަކާބެހޭގޮތުން ވަރަށް ފުޅާދާއިރާއެއްގައި މި ހުރިހާ ފަރާތްތަކާ އޭނާ މަޝްވަރާ ކުރެއްވިކަމަށް ރަޝިއާގެ މީޑިއާއިން ބުނެއެވެ.
ރަޝިޔާއިން އިއްޔެ ޔުކްރެއިން އާ ދެކޮޅަށް އަލަށް ތަޖުރިބާކުރި "އޮރެޝްނިކް" މަރުކާގެ ހައިޕާސޮނިކް މިސައިލްއަކީ ނިއުކްލިޔާ ހަތިޔާރު އުފުލުމުގެ ގާބިލްކަންވެސް ލިބިފައިވާ ވަރަށް ނުރައްކާތެރި އަދި ތަންތަން ފަނާކޮށްލާ މިސައިލްއެކެވެ.
ފަންނީ މައްސަލައެއް ދިމާވެއްޖެ ހާލަތެއްގައި މެނުވީ އޭގެ އަމާޒަށް ވާސިލް ވާނެކަމުގެ ސައްތައިން ސައްތަ ޔަގީންކަން އޮތް މިސައިލްއެކެވެ. މި މިސައިލުން ހަމަލާދީގެން ޔުކްރެއިންގެ ބޮޑުބައެއް ކުޑަ ދުވަސްކޮޅެއްގެ ތެރޭގައި ފަނާކޮށްލުމުގެ ގާބިލްކަން ލިބިފައިވާ މިސައިލް އެކެވެ.