އޯޕަން އޭއައި އިން އާޓިފިޝަލް އިންޓެލިޖެންސް (އޭއައި) ބޭނުންކޮށްގެން އާ ވެބް ބްރައުޒަރެއް ތައްޔާރުކުރުމަށް ރާވަމުންދާ ކަމަށް ޓެކް ރިޕޯޓުތަކުން ބުނެފިއެވެ.
"ދަ އިންފޮމޭޝަން" ގެ ރިޕޯޓެއްގައި ބުނެފައިވާ ގޮތުގައި، މި އޭއައި ކުންފުނިން ގޫގުލް ކްރޯމްއާ ވާދަކުރުމަށް ބްރައުޒަރެއް ތައްޔާރުކުރުމުގެ މަސައްކަތް ފަށައިފައިވެއެވެ. އަދި މިކަމާ ގުޅޭގޮތުން ވެބްސައިޓްތަކާއި އެޕް ޑިވެލޮޕަރުންނާ މަޝްވަރާކުރަން ފަށައިފައިވާ ކަމަށް ވެސް ބުނެއެވެ.
މީގެ އިތުރުން، އޯޕަން އޭއައި އިން ސެމްސަންގާ ގުޅިގެން އެ ކުންފުނީގެ ޑިވައިސްތަކުގައި އޭއައި ފީޗާތައް ހިމެނުމަށް މަޝްވަރާކުރަމުންދާ ކަމަށްވެސް އެ ރިޕޯޓްގައި ބުނެފައިވެއެވެ.
މި އަޕްޑޭޓްތަކާއި، ފަހުން ތަޢާރަފުކުރެވުނު ސާޗްޖީޕީޓީ ފީޗާއާ އެކު، އޯޕަން އޭއައި އިން ގޫގުލްއާ ވާދަކުރުމަށް ތައްޔާރުވަމުންދާކަން އެ ރިޕޯޓްގައި ފާހަގަކޮށްފައިވެއެވެ.
އޯޕަން އޭއައި އިން މި ބްރައުޒަރު ތައްޔާރުކުރުމަށް ކޮންޑޭ ނަސްޓް، ރެޑްފިން، އިވެންޓްބްރައިޓް އަދި ޕްރައިސްލައިން ފަދަ ވެބްސައިޓް އަދި އެޕް ޑިވެލޮޕަރުންނާ މަޝްވަރާކޮށްފައިވާ ކަމަށް ރިޕޯޓުގައި ބުނެފައިވެއެވެ.
މި މަޝްވަރާތަކުގައި ދަތުރުފަތުރު، ކާބޯތަކެތި، ރިއަލް އެސްޓޭޓް އަދި ވިޔަފާރި ވެބްސައިޓްތަކަށް ސާޗް ފީޗާތައް ތަރައްޤީކުރުމާ ބެހޭގޮތުން ވެސް ވާހަކަދެކެވިފައިވާ ކަމަށް ބުނެފައި ވެއެވެ. މިއީ ސާޗްޖީޕީޓީގެ ބޭނުންތެރިކަން އިތުރުކުރުމަށް ކުރެވޭ މަސައްކަތެއް ކަމަށް ބެލެވެއެވެ.
މި އައު ބްރައުޒަރު ޗެޓްޖީޕީޓީއާ އެކީ މަސައްކަތްކުރާނެ ގޮތަށް ތައްޔާރުކުރެވި، އޭއައި ބޭނުންކޮށްގެން އައު ތަޖުރިބާއެއް ބްރައުޒިން ގެ ދުނިޔެއަށް ގެނެސްދޭނެ ކަމަށް ދިރާސާކުރާ ފަރާތްތަކުން ބުނެއެވެ.
އޯޕަން އޭއައި އަކީ 2015ވަނަ އަހަރު އުފެދުނު، އާޓިފިޝަލް އިންޓެލިޖެންސް ދާއިރާގައި ކުރިއަރަމުން އަންނަ ކުންފުންޏެކެވެ. މި ކުންފުނިން ތަރައްޤީކުރި ޗެޓްޖީޕީޓީ އަކީ ދުނިޔޭގެ ސަމާލުކަން ލިބިފައިވާ އޭއައި ޓެކްނޮލޮޖީއެކެވެ.
އިންޓަނެޓް ބްރައުޒިން ދާއިރާގައި މިހާތަނަށް ގޫގުލް ކްރޯމް ވަނީ އެންމެ މަޤްބޫލު ބްރައުޒަރުގެ ގޮތުގައި ހިމެނިފައެވެ. އެހެންނަމަވެސް، އޯޕަން އޭއައި އިން އަމިއްލަ ބްރައުޒަރެއް ތަރައްޤީކުރުމަށް މަސައްކަތްކުރަން ފެށުމާއެކު، މި ދާއިރާގައި އާ ވާދައެއް ފެށިގެންދާނެ ކަމަށް ބެލެވެއެވެ.
މި ބްރައުޒަރުގައި އޭއައި ޓެކްނޮލޮޖީ ބޭނުންކުރެވުމަކީ އިންޓަނެޓް ބޭނުންކުރާ ގޮތަށް ބޮޑު ބަދަލެއް އަތުވެދާނެ ކަމެއް ކަމުގައި ފާހަގަކުރެވެއެވެ.