ޣައްޒާ (21 ނޮވެންބަރު 2024): ޣައްޒާގެ ދެ އަވަށެއްކަމަށްވާ ބައިތު ލާހިޔާ އާއި ޝައިޚް ރިޟްވާން އަވަށަށް އިސްރާއީލުގެ އަސްކަރީ ޖެޓްތަކުން ރޭ ފަތިހު ހަމަލާދީ ޣައްޒާގެ އާންމުންގެ 88 މީހަކު ޝަހީދުކޮށްލާފައިވާއިރު ޔަހޫދީ މަހުޖަނުން ކޮންޓްރޯލް ކުރާ ހުޅަނގުގެ މެއިންސްޓްރީމް މީޑީއާއިން މި ފަދަ ޚަބަރުތައް ގެނެސް ނުދޭކަމަށް އިިނގިރޭސި ޑޮކްޓަރެއްކަމަށްވާ ޑރ. ނިޒާމު މަހުމޫދު ވިދާޅުވެއްޖެއެވެ.
ޣައްޒާގެ ހޮސްޕިޓްލްތަކުގައި މަސައްކަތްކުުރުމަށްފަހު އެނބުރި ގައުމަށް އައި އަރަބި ދަރިކޮޅުގެ އިނގިރޭސި ޑޮކްޓަރެއްކަމަށްވާ ނިޒާމު މަހުމޫދު ވިދާޅުވީ އިނގިރޭސިވިލާތުގެ އިތުރުން އެމެރިކާއާއި ޔޫރަޕްގެ މީޑިއާތަކުންވެސް ޣައްޒާގެ އާންމުންނާ ދެކޮޅަށް އިސްރާއީލު ހިންގާ ގަތުލުއާންމުތައް ފޮރުވުމަށް މަސައްކަތް ކުރާ ކަމަށެވެ.
އަލްޖަޒީރާ ބުނާގޮތުން ޝައިޚް ރިޟްވާން އަވަށަށް އިސްރާއީލުގެ އަސްކަރީ ޖެޓްތަކުން ވަނީ ރޭ ފަތިހު ހަމަލާދީ ޣައްޒާގެ އާންމުންގެ 88 މީހަކު ޝަހީދުކޮށް، އިތުރު 100 މީހަކު ޒަޚަމްކޮށްފައެވެ. މިއީ ކޮންމެ ދުވަހަކު ޣައްޒާގެ އާންމުންނާ ދެކޮޅަށް އިސްރާއީލު ސިފައިން ހިންގާ ގަތުލުއާންމުތަކުގެ ތެރެއިން ކުޑަ މިންވަރެކެވެ.
އިއްޔެވެސް ޣައްޒާގެ އުތުރުގައި އާންމުން ދިރިއުޅޭ ފޭލިގެތަކަށް އިސްރާއީލުން ހަމަލާދީ 100 އަށް ވުރެ ގިނަ މީހުން ވަނީ ޝަހީދުކޮށްލާފައެވެ. މީގެއިތުރުން އިސްރާއީލު ގެންދަނީ ޣައްޒާގެ އުތުރުގައިވާ ސިއްހީ މަރުކަޒުތަކަށާއި ކަމާލް އަދަވާން ހޮސްޕިޓަލަށްވެސް ހަމަލާތައް ދެމުންނެވެ. މި ހަމަލާތަކާ ގުޅިގެން އެ ހޮސްޕިޓަލްގެ ބޮޑު ބައެއްވަނީ ފުނޑުފުނޑުވެފައެވެ. ޣައްޒާގެ ހޮސްޕިޓަލްތަކާއި ސިއްހީ މަރުކަޒުތަކުގެ ތެރެއިން 99 އިންސައްތަ ތަންތަނަށް އިސްރާއީލުން ހަމަލާދީ އެތަންތަންވަނީ ހަލާކުކޮށްލާފައެވެ.
ޣައްޒާގެ އުތުރުގެ ހޮސްޕިޓަލެއްގައި ދުވަސްތަކެއް ވަންދެން މަސައްކަތްކުރުމަށްފަހު އިނގިރޭސިވިލާތަށް އެނބުރި ދިޔަ އަރަބި ދަރިކޮޅުގެ އިނގިރޭސި ޑޮކްޓަރެއްކަމަށްވާ ޑރ. ނިޒާމު މަހުމޫދު އިއްޔެ އިނގިރޭސި ޕާލަމެންޓްގެ ހައުސް އޮފް ކޮމަންސްގެ ކޮމިޓީއެއްގައިވަނީ ޣައްޒާގެ އާންމުން (ޚާއްސަކޮށް ކުޑަކުދިންނާއި އަންހެނުން) މެރުމަށް ޚާއްސަކޮށްގެން އިސްރާއީލު ސިފައިން ދޭ ހަމަލާތަކުގެ ހިތްދަތި އަދި ހިތްފަޅައިގެން ދާ އެތަށް ވާހަކަތަކެއް ކިޔައިދެއްވާފައެވެ.
ޑރ. ނިޒާމު މަހުމޫދު ހައުސް އޮފް ކޮމަންސްގެ ކޮމިޓީއަކަށް ކިޔައި ދެއްވި ގޮތުގައި އިސްރާއީލުގެ ފައިޓާ ޖެޓްތަކުން ރެފިއުޖީންގެ ފޮތި ފޭލިގެތަކަށް ހަމަލާދީ އާންމުން މެރުމުގެ އިތުރުން މީހުން މެރުމަށް ޚާއްސަކޮށްފައިވާ އިސްރާއީލުގެ ދެ ބާވަތެއްގެ ޑްރޯންތައް ބޭނުންކޮށްގެންވެސް އިސްރާއީލުން ކޮންމެ ދުވަހަކު ޣައްޒާއިން އެތައް ބަޔަކު މަރަމުން ގެންދެއެވެ.
އޭނާ ވިދާޅުވި ގޮތުގައި އިސްރާއީލުގެ ޖެޓްތަކުން ފޭލިގެތަކަށް ބޮންއެޅުމަށްފަހު ދެންއެތަނަށް ފޮނުވަނީ އޮޓަމެޓިކް ކޮށް ބަޑިޖެހޭގޮތަށް ބަޑި ހަރުކޮށްފައިވާ ޑްރޯންތަކެވެ. އެ ޑްރޯންތަކުން ޣައްޒާގެ ކުޑަކުދިންގެ ގަޔަށް ބަޑިޖަހައި އެކުދިން މަރައި އަދި ޒަޚަމް ކުރަމުން ގެންދިޔަ މަންޒަރު އޭނާގެ ދެ ލޮލުން އެތަށް ފަހަރަކު ދުށްކަމަށާއި ކުށެއްނެތް ކުޑަކުދިން މަރުވެގެން ބިންމައްޗަށް ވެއްޓި ލެޔާ ތަތްތެޅޭ މަންޒަރުތައް ފެނުމުން ހިތްފަޅައިގެންގޮސް އޭނާ އަށް އަޑުންއަޑު ނަގައި ރޮވުނުކަމަށް ވިދާޅުވިއެވެ.
ޑްރޯންތަކުގެ ހަމަލާތަކުން ސަލާމަތް ވުމަށް ކުޑަކުދިންނާއި އަންހެނުން ދުވާ މަންޒަރަކީވެސް ބަލަން އިންސާނެއްގެ ހިތަށް ކެތްވާ މަންޒަރެއް ނޫންކަމަށް ޑރ. ނިޒާމު މަހުމޫދު ވިދާޅުވިއެވެ.
އޭނާ އިތުރަށް ވިދާޅުވިގޮތުގައި ޣައްޒާގެ އުތުރުގެ ކަމާލް އަދަވާން ހޮސްޕިޓަލުގައި ޑިއުޓީ އަދާކުރުމަށްފަހު އެތަނުން އޭނާ އޭނާގެ ރަހްމަތްތެރި އަންހެން ނަރުހަކާއެކު ބޭރަށް ނުކުތްވަގުތު ކުރިން މިދެންނެވި މީހުން މަރާ އިސްރާއީލު ގެ ޑްރޯން ދިޔައީ އެތާ ކުރިމަތީގައިވާ ފޭލިގެއަކަށް އޮޓަމެޓިކް ބަޑިން ހަމަލާތައް ދެމުންނެވެ. އޭރު ކުޑަކުދިންނާއި އަންހެނުންތައް އެ ޑްރޯންގެ ހަމަލާތަކުން ސަލާމަތްވުމަށް ރޮމުން އެކިކަންކޮޅުތަކަށް ދުވަނީއެެވެ.
ހައިރާންވެ އެތަން ބަލަން ހުއްޓައި އެޑްރޯން ކުއްލިއަކަށް އޭނާއާ ދިމާއަށް އައިސް ހަމަލާތައް ދޭންފެށިކަމަށާ ނަމަވެސް އެތާނަގައިވާ ވެއްޓިފައިވާ އިމާރާތެއްގެ ދަށަށް އަވަސް އަވަހަށް ވަދެގެން އޭނާގެ ފުރާނަ ސަލާމަތްވީ ކިރިޔާއެވެ. ނަމަވެސް އޭނާގެ ރަހްމަތްތެރި ނަރުސް އަންހެން މީހާގެ ގަޔަށް އެ ޑްރޯންގެ ވަޒަންތައް އަރައި އެމީހާ ވަރަށް ބޮޑަށް ޒަޚަމްވިކަމުގައެވެ.
ކުޑައިރުކޮޅެއްފަހުން އެއަންހެން މީހާ ހޮސްޕިޓަލަށް ވައްދައި އަވަސްގޮތަކަށް އޮޕަރޭޝަން ކުރުމުން ވަރަށް ހަނިގޮތަކަށް ފުރާނަ ސަލާމަތްވިކަމަށާ ނަމަވެސް އެމީހާ ގެ ހާލަތު ވަރަށް ސީރިޔަސްކަމަށް ޑރ. ނިޒާމު މަހުމޫދު ވިދާޅުވިއެވެ.
ޑރ. ނިޒާމުގެ އިތުރުން ވޮލަންޓިއާ ކޮށް ޣައްޒާގެ ހޮސްޕިޓަލްތަކުގައި މަސައްކަތްކުރުމަށްފަހު އެނބުރި ގައުމަށް އައި އިނގިރޭސިވިލާތުގެ ގިނަ އަދަދެއްގެ ޑޮކްޓަރުންނާއި ނަރުހުންވެސްވަނީ މިމޭރުމުން ހައުސް އޮފް ކޮމަންސްގައި އެތަށް ވާހަކައެއް ދައްކަވާފައެވެ.
ނަމަވެސް އިނގިރޭސި ބޮޑުވަޒީރު ކީރު ސްޓާމާ މިދިޔަ އަންގާރަ ދުވަހުވެސްވަނީ އިސްރާއީލުން ގަސްދުގައި ޣައްޒާގެ އާންމުން މަރަމުން ދާތަން ނުފެންނަ ކަމަށް ވިދާޅުވެ ވާހަކަ ދައްކަވާފައެވެ. ސްޓާމާ ވިދާޅުވިގޮތުގައި އިސްރާއީލުން ގަތުލުއާންމުންވެސް ނުހިންގައެވެ. މިމޭރުމުން އޭނާވަނީ އިސްރާއީލުގެ އަނިޔާވެރިކަމާއި ޓެރަރިޒަމްގެ އަމަލުތަކުގެ ދިފާއުގައި ވާހަކަ ދައްކަވާފައެވެ.
އިއްޔެ އިނގިރޭސި ހައުސް އޮފް ކޮމަންސްގެ މެންބަރަކުވަނީ އިސްރާއީލަށް ޖާސޫސުކޮށް ދިނުމަށްޓަކައި އިނގިރޭސި ސިފައިންގެ ޣައްޒާގައި ހިންގާ ޖާސޫސީ ލާއިންސާނީ ހަރަކާތްތަކާ ދެކޮޅަށްވެސް ވާހަކަ ދައްކަވާފައެވެ. އޭނާ ވިދާޅުވިގޮތުގައި ޣައްޒާއަށް އިސްރާއީލު ހަމަލާދޭން ތަންތަން ފާހަގަކޮށް އެތަންތަނުގެ މައުލޫމާތު އެމެރިކާއަށް ވުރެވެސް ގިނައިން އިސްރާއީލަށް ފޯރުކޮށްދެނީ އިނގިރޭސިވިލާތުންނެވެ. ޣައްޒާގެ މަތިން އުދުހޭ އިނގިރޭސި ސިފައިންގެ ޖާސޫސީ ޑްރޯންތަކުންނެވެ.
މިއީ ސީދާ އިސްރާއީލުގެ ޓެރަރިޒަމަށާއި ޣައްޒާގެ އާންމުންގެ ނަސްލު ނައްތާލުމަށް އިސްރާއީލު ހިންގާ ގަތުލުއާންމު ތަކުގައި އިނގިރޭސިވިލާތް ސީދާ ގޮތެއްގައި ބައިވެރި ވުންކަމަށް އޭނާ ވިދާޅުވިއެވެ. ނަމަވެސް ޔަހޫދީ މަހުޖަނުން ކޮންޓްރޯލް ކުރާ އިނގިރޭސިވިލާތުގެ ބީބީސީ އާއި އެނޫންވެސް އިނގިރޭސި މެއިން ސްޓްރީމް މީޑިއާ ތަކުން މިފަދަ ހުރިހާ ކަމެއް ފޮރުވަން މަސައްކަތްކުރާކަން އޭނާވަނީ އަސަރާއެކު ހާމަކުރައްވާފައެވެ.