އެންޓި ކޮރަޕްޝަން ކޮމިޝަން (އޭސީސީ) ރެކްރިއޭޝަން ކްލަބުގެ އޮޑިޓުގައި މައްސަލަތަކެއް ފެންމަތިވުމުން، އެ ކްލަބުގެ ރައީސް ސަސްޕެންޑުކޮށްފިއެވެ.
އޭސީސީން ބުނީ އެ ކޮމިޝަނުގެ ރެކްރިއޭޝަން ކްލަބުގެ ހިންގާ ކޮމިޓީން މި ދައުރުގެ މާލީ ހިސާބުތަކާ ގުޅިގެން މިހާރު ތައްޔާރު ކުރަމުންދާ އޮޑިޓާގުޅިގެން، މި މަހުގެ 12ގައި ކްލަބުގެ ރައީސާ ގުޅުންހުރި ކަންތައްތަކެއް ސަމާލުކަމަށް ގެނެވިފައިވާ ކަމަށެވެ. އަދި އެ ކަމާ ގުޅިގެން އަޅަންޖެހޭ ފިޔަވަޅުތައް ވެސް އަޅައި، މައްސަލަ ބަލަމުންދާ ކަމަށް ބުނެފައިވެއެވެ.
މި މައްސަލައާ ގުޅިގެން އޭސީސީން ބުނީ، އެ މުވައްޒަފަކީ އެއްވެސް އިރެއްގައި ތަހުގީގުތަކާ ގުޅުންހުރި މަސައްކަތްކޮށްފައިވާ ފަރާތެއް ނޫން ކަމަށާއި، އެ ކޮމިޝަނުގައި އޭނާ މިހާރު އަދާކުރާ މަގާމުގެ މަސްއޫލިއްޔަތުތަކުން ދުރުކޮށް ސަސްޕެންޑުކޮށްފައިވާ ކަމަށެވެ.
އަދި މި މައްސަލައާ ގުޅިގެން ކްލަބުގެ އާންމު މެންބަރުންނަށް ހިންގާ ކޮމިޓީގެ ފަރާތުން މައުލޫމާތުދީ، ފުލުހުންގެ ސަމާލުކަމަށް މި މައްސަލަ ވަނީ ގެނެސްފައެވެ.
އޭސީސީ ރެކްރިއޭޝަން ކްލަބަކީ، އެހެން ކްލަބު ޖަމިއްޔާތަކެކޭ ވެސް އެއްގޮތަށް، ދިވެހިރާއްޖޭގެ ޖަމިއްޔާތަކުގެ ގާނޫނުގެ ދަށުން ރަޖިސްޓްރީކޮށްގެން ހިންގާ، އަދި ހަމަ އެކަނި ޖަމިއްޔާގެ ރެޖިސްޓްރާއަށް ޖަވާބުދާރީވާންޖެހޭ ކްލަބެކެވެ. އެ ގޮތުން އެއީ ކްލަބުގެ ނަމުގައި ދައުވާކުރުމާއި ދައުވާ ލިބިގަތުމުގެ ބާރު އޮންނަ ވަކި ގާނޫނީ ޝަޚުސެކެވެ. އެ ގޮތުން އުފުލޭ ނުވަތަ ނުއުފުލޭ މުދާ، ގާނޫނު ހުއްދަކުރާ ގޮތުގެ މަތީން ހޯދުމާއި ލިބިގަތުމުގެ ހައްގު އެ ކްލަބަށް ވެސް ލިބިގެންވެއެވެ.
އެއީ އެ ކްލަބުގެ މުދަލުގެ މިލްކުވެރިކަން ކްލަބުގެ މެންބަރުންނަށާއި މުއައްސިސުންނަށާއި ހިންގާ ކޮމިޓީގެ މެންބަރުންނަށް ނުލިބޭގޮތަށް ހިންގާ، ވަކިން އުފެދިފައިވާ ގާނޫނީ ގޮތުން އަމިއްލަ ޝަޚުސެކެވެ.
އޭސީސީން ބުނެފައިވަނީ އޭސީސީ ރެކްރިއޭޝަން ކްލަބަކީ މެންބަރުންގެ އަތުން ޗަންދާ ނަގައިގެން، ކޮމިޝަނުގެ މާލީ ކަންކަމާ މުޅީން ވަކިން ހިންގާ ކްލަބެއް ކަމަށެވެ.
އެ ކޮމިޝަނުން ބުނީ އެ ތަނުގެ މުވައްޒަފުންގެ ސުލޫކާ ގުޅޭ ކަންކަމުގައި ވަޒީފާއާބެހޭ ގާނޫނުގެ އިމުގެ ތެރެއިން އެޅޭނެ ފިޔަވަޅުތައް އަބަދު ވެސް އަޅަމުންދާނެ ކަމަށެވެ. އަދި މި މައްސަލައިގައި ވެސް އެ ގޮތަށް އަމަލުކުރަން ގެންދާނެ ކަމުގެ ޔަގީންކަން ވަނީ ދީފައެވެ.