ހަތް އަހަރުގެ ކުއްޖަކަށް ރަޝިޔާގެ އައިޓީ ކުންފުންޏަކުން ވަޒީފާއެއް

ރަޝިޔާގެ ސޮފްޓްވެއާ ކުންފުންޏަކުން އުމުރުން ހަތް އަހަރުގެ ކުއްޖަކަށް ވަޒީފާއެއް ހުށަހަޅައިފިއެވެ.

އެ ކުންފުނިން ހުށަހެޅި ވަޒީފާ, މުސާރަ ލިބޭ ވަޒީފާއެއް އަދާކުރާ އުމުރަށް އެޅުމުން އެކުއްޖާއަށް ލިބޭގޮތަށް ވަނީ ހަމަޖައްސާފައެވެ.

ރަޝިޔާގެ ސެއިންޓް ޕީޓާސްބާގްއަށް އުފަން ސާގޭ ކިޔާ އެ ކުއްޖާ ވަނީ އުމުރުން ފަސް އަހަރުން ފެށިގެން ސޮފްޓްވެއާ ލިޔާނެ ގޮތް ބަޔާންކޮށްދޭ ވީޑިއޯތައް އަޕްލޯޑްކޮށްފައެވެ.

ބީބީސީން ރިޕޯޓުކޮށްފައިވާ ގޮތުގައި އެ ވީޑިއޯތައް ފެނި އިންފޮމޭޝަން ސެކިއުރިޓީ ކުންފުނި ޕްރޯ32 އިން ވަނީ ސާގޭއަށް ލިޔުމުން ވަޒީފާގެ ހުށަހެޅުމެއް ފޮނުވާފައެވެ. ކުންފުނިން ސާގޭއަށް ހުށަހަޅާފައި ވަނީ ކޯޕަރޭޓް ޓްރެއިނިންގެ ހެޑްގެ މަގާމެވެ.

ރަޝިޔާގެ ގާނޫނުގެ ދަށުން ސާގޭއަށް އުމުރުން 14 އަހަރު ނުވަނީސް އެއްވެސް މުސާރަ ލިބޭ މަގާމެއް އަދައެއްނުކުރެވޭނެއެވެ.

ނަމަވެސް ޕްރޯ32ގެ ޗީފް އެގްޒެކެޓިވް އިގޯ މަންޑިކް ބީބީސީ ވޯލްޑް ސާވިސްއަށް ބުނީ ދެ ފަރާތުގެ ދެމެދުގައި އެއްބާރުލުން ދޭނެ ގޮތްތައް ހޯދުމާ ބެހޭ ގޮތުން ސާގޭގެ މައިންބަފައިންނާ ވާހަކަ ދައްކާފައިވާ ކަމަށެވެ.

"އޭނާގެ ބައްޕަ ކިރިލް ހުރީ ވަރަށް ހައިރާންވެފައި. އެ މީހުން ތިބީ ހަގީގަތުގައި ވެސް އުފާވެފައި. އަދި ސާގޭއަށް ކުންފުންޏާ ގުޅެވޭނެ ވަގުތަކަށް އިންތިޒާރުގައި ތިބީ." މަންޑިކް ވިދާޅުވިއެވެ.

ސާގޭގެ ޔޫޓިއުބް ޗެނަލްގައި ޕްރޮގްރާމިން ލޭންގުއޭޖް ޕައިތަން އަދި ޔުނިޓީ ދަސްކުރުމަށް ޝައުގުވެރިވާ ނުވަތަ އާޓިފިޝަލް އިންޓެލިޖެންސްގެ ގިނަ ޓޫލްތަކަށް ޝައުގުވެރިވާ 3،500 އަށް ވުރެ ގިނަ ސަބްސްކްރައިބަރުން ތިބެއެވެ.