ދިވެހިރާއްޖޭގެ ޤައުމީ ޔުނިވާސިޓީ (އެމްއެންޔޫ)އާއި މެލްބަން ޔުނިވާސިޓީން ތަޢުލީމީ ދާއިރާގެ ފެންވަރު މަތިކުރުމަށާއި ދިރާސާތަކުގައި އެއްބާރުލުން ދިނުމަށް އެމްއޯޔޫއެއްގައި ސޮއިކޮށްފިއެވެ.
އެ ކަމަށްޓަކައި ބޭއްވި ރަސްމިއްޔާތުގައި އެމްއެންޔޫގެ ފަރާތުން އެމްއޯޔޫގައި ސޮއިކުރެއްވީ ވައިސް ޗާންސެލަރު ޑރ. ޢާއިޝަތު ޝެހެނާޒް އާދަމްއެވެ. އަދި، މެލްބަން ޔުނިވާސިޓީގެ ފަރާތުން ސޮއިކުރެއްވީ އެ ޔުނިވާސިޓީ ތަމުސީލުކުރައްވާ ރޮންޑާ ޑި ބައިއަސްއެވެ.
މި ރަސްމިއްޔާތުގައި އެމްއެންޔޫގެ އިސްވެރިންނާއި، ދިވެހިރާއްޖެއަށް ކަނޑައަޅުއްވާފައި ހުންނަވާ އޮސްޓްރޭލިއާގެ ހައި ކޮމިޝަނަރު ޑޭވިޑް ޖެސަޕް ވެސް ބައިވެރިވެވަޑައިގެންނެވިއެވެ.
"ދުނިޔޭގެ ފެންވަރުގައި ފާހަގަކުރެވޭ، ޝަރަފުވެރި މުއައްސަސާއެއް ކަމުގައިވާ މެލްބޯން ޔުނިވާސިޓީއާ އެކު ގުޅިގެން މަސައްކަތްކުރުމަކީ، އެމްއެންޔޫގެ ލަނޑުދަނޑިތަކާއި އަމާޒުތައް ހާސިލުކުރުމުގެ ޤާބިލުކަން ވަރަށް ބޮޑަށް އިތުރުވެގެންދާނެ ކަމެއް،" ޝެހެނާޒް އާދަމް ވިދާޅުވިއެވެ.
މި އެއްބަސްވުމަކީ ދުނިޔެއަށް ކުރިމަތިވެފައިވާ ގޮންޖެހުންތަކަށް ހައްލު ހޯދުމަށާއި، ދެމެހެއްޓެނިވި ތަރައްގީ ކުރިއެރުވުމަށާއި، ތަޢުލީމީ އަދި ދިރާސާގެ ފެންވަރު މަތިކުރުމަށް ދެ ޔުނިވާސިޓީން ވެފައިވާ އެއްބަސްވުމުގެ ދަލީލެއް ކަމަށް އެމްއެންޔޫއިން ބުނެއެވެ.
މި ބައިވެރިވުމުގެ ސަބަބުން ގުޅިގެން ދިރާސާކުރުމަށާއި، ތަޢުލީމީ ދަރިވަރުން ބަދަލުކުރުމުގެ ޕްރޮގްރާމްތަކަށާއި، އާ އީޖާދީ މަޝްރޫޢުތަކަށް މަގުފަހިވެގެންދާނެއެވެ. މީގެ ސަބަބުން ދަރިވަރުންނަށާއި، މުދައްރިސުންނަށާއި، އަދި ދެ ޔުނިވާސިޓީން ޚިދުމަތް ހޯދާ އެންމެންނަށް ފައިދާކުރާނެ ކަމަށް އެމްއެންޔޫއިން ބުނެއެވެ.