ރައީސުލްޖުމްހޫރިއްޔާގެ ޓޫރިޒަމް އެޑްވައިޒަރު މުހައްމަދު ޚަލީލް އިކޮނަމިކް ކައުންސިލަށް އައްޔަން ކުރައްވައިފިއެވެ.
މިކަން ރައީސް އޮފީހުން ވަނީ "ސަން"އަށް ކަށަވަރު ކޮށްދެއްވާފައެވެ.
ޚަލީލް އިކޮނަމިކް ކައުންސިލަށް އައްޔަނު ކުރައްވާފައިވާއިރު، އޭނާ މެނޭޖިން ޑިރެކްޓަރު ކަމުގެ މަގާމު ފުރުއްވާ ޕަލްސް ކުންފުނިން ވެސް ވަނީ ޓޫރިޒަމް ދާއިރާގެ ވިޔަފާރިތަކުން ޑޮލަރު މާރުކުރަންޖެހޭ ގޮތަށް މަރުކަޒީ ބޭންކް، އެމްއެމްއޭއިން ހެދި ގަވާއިދާ ދެކޮޅު ހަދައިފައެވެ.
އެ ގަވާއިދުގެ ދަށުން ޓޫރިސްޓު ރިސޯޓުތަކުން ކޮންމެ މަހެއްގެ ތެރޭ އަންނަ ކޮންމެ ޓޫރިސްޓަކަށް 500 އެމެރިކާ ޑޮލަރުގެ ރޭޓުން އެ މަހެއްގައި އައިސްފައިވާ ޖުމުލަ ފަތުރުވެރިންނަށް ޖެހޭ އަދަދު މާރުކުރަން މަޖުބޫރުވާނެއެވެ.
އަދި ގެސްޓު ހައުސްތަކަށް އަންނަ ކޮންމެ ފަތުރުވެރިއަަކަށް 25 ޑޮލަރު މާރުކުރަންޖެހޭނެއެވެ.
ބޭރުފައިސާއާ ބެހޭ ގަވާއިދުގެ ދަށުން ރާއްޖޭގައި އޮޕަރޭޓްކުރާ އެއް ރިސޯޓު ފިޔަވައި އެހެން ހުރިހާ ރިސޯޓަކުން ރަޖިސްޓަރީ ވެފައިވާ ކަމަށް އެމްއެމްއޭއިން މީގެ ކުރިން ބުނެފައިވެއެވެ.
މި ގަވާއިދާ ގުޅިގެން ޓޫރިޒަމް ދާއިރާގެ ވިޔަފާރިވެރިން ކަންބޮޑުވުން ފާޅުކުރައްވާފައިވަނިކޮށް، ރޭ ރައީސް ޑރ. މުހައްމަދު މުއިއްޒުވަނީ އެ ގަވާއިދު ބަދަލު ނުކުރައްވާނެ ކަމަށް ތަކުރާރުކޮށް ވިދާޅުވެފައެވެ.