ފޭސްބުކް ބޭނުންކުރާ ފަރާތްތަކަށް އަންނަ މުހިންމު ބަދަލެއްގެ ގޮތުގައި، އަމިއްލަ ޕްރޮފައިލްތަކުގައި ޕަބްލިކް ފޮލޯވަރުން ބެހެއްޓުމުގެ އިޚްތިޔާރު އުވާލުމަށް ނިންމައިފިއެވެ.
މިހާރު ބޭނުންކުރެވޭ ގޮތުން، "ފޮލޯވިން" ސެޓިން ޕަބްލިކަށް ބަދަލުކޮށްގެން، ކޮންމެ މީހަކަށް ވެސް އަމިއްލަ ޕްރޮފައިލް ފޮލޯކުރެވެއެވެ. ފޭސްބުކްގެ މައުލޫމާތު ދިނުމުގައި ބަޔާންކޮށްފައިވާ ގޮތުގައި، އެހެން މީހަކު ފޮލޯ ކުރުމުން، އެމީހެއްގެ ޕޯސްޓްތައް ފީޑްގައި ފެންނާނެއެވެ. ފޭސްބުކްގައި ރައްޓެހިވެފައި ތިބޭ މީހުން އޮޓޮމެޓިކުން ފޮލޯވެގެންދާނެއެވެ. އަދި ޝައުގުވެރިވާ މީހުންގެ ޕޯސްޓްތައް ވެސް ފޮލޯ ކުރުމުގެ އިޚްތިޔާރު އޮވެއެވެ.
މި ބަދަލާއެކު، ބޭނުންކުރާ ފަރާތްތަކަށް ދެވޭ އިޚްތިޔާރުގެ ތެރޭގައި ހިމެނެނީ ޕަބްލިކް ފޮލޯވަރުން އެއްކޮށް ނައްތާލުން ނުވަތަ "ޕްރޮފެޝަނަލް މޯޑް" އަށް ބަދަލުވެ، ޕްރޮފައިލް ޕޭޖަކަށް ބަދަލުކުރުމެވެ. ފޭސްބުކް މާކެޓިން ތަޖުރިބާކާރު މާރީ ސްމިތް ހިއްސާކުރި ސްކްރީންޝޮޓެއްގައި ފެންނަ ގޮތުން، ބައެއް ޔޫޒަރުންނަށް މިހާރުވެސް މި ބަދަލާ ގުޅޭ މައުލޫމާތު ދެމުންދެއެވެ. އެގޮތުން، އެއް ފިތުމަކުން ޕަބްލިކް ފޮލޯވަރުން ނައްތާލުމުގެ އިޚްތިޔާރު ނުވަތަ ފޮލޯވަރުން ބަހައްޓައި "ޕްރޮފެޝަނަލް މޯޑް"އަށް ބަދަލުވުމުގެ އިޚްތިޔާރު ލިބިގެންދާނެއެވެ.
މި ބަދަލު ގެނައުމުގެ މައިގަނޑު ބޭނުމަކީ ކްރިއޭޓަރުންނާއި ވިޔަފާރިތަކަށް އިޝްތިހާރުކުރުމުގެ އިތުރު ފުރުސަތުތައް ހޯދައިދިނުމާއި، އެޕްގައި ކްރިއޭޓަރުންގެ މަސައްކަތް ފެތުރުމަށް ފަސޭހަކުރުމެވެ. އަމިއްލަ ޕްރޮފައިލްތަކުގައި އިޝްތިހާރުކުރުމުގެ އިޚްތިޔާރު ނޯންނައިރު، ޕްރޮފެޝަނަލް އެކައުންޓްތަކަށް މި އިޚްތިޔާރު ލިބިގެންދެއެވެ. އަދި މި ބަދަލާއެކު، "ބޫސްޓް" ބަޓަން ފެންނަ އިތުރު އެކައުންޓްތަކެއް އުފެދިގެންދާނެކަމަށް ބެލެވެއެވެ.
މީގެއިތުރުން، އޭއައި އިން ހުށަހަޅާ ކްރިއޭޓަރުންގެ ޕޯސްޓުތައް ދެއްކުމަށް އިތުރު ޖާގަ ލިބިގެންދާނެއެވެ. ފޭސްބުކްގައި މިހާރު އެންމެ ގިނައިން އެންގޭޖްމަންޓް ލިބެމުންދަނީ އޭއައި އިން ހުށަހަޅާ ކްރިއޭޓަރުންގެ ޕޯސްޓުތަކަށެވެ.
މި ބަދަލު ގެނެވޭނީ މަރުހަލާތަކެއްގެ މަތިން ކަމަށް މާރީ ސްމިތް މައުލޫމާތު ދީފައިވެއެވެ. އޭނާ ހާމަކުރި ގޮތުގައި މިއީ އޯޑިއަންސް ސެޓިންގްސްއަށް އަންނަ ބޮޑު ބަދަލަކަށްވާތީ، ބައެއް ޔޫޒަރުންނަށް މިހާރު ވެސް މި ބަދަލުގެ ނޯޓިސް ލިބެމުންދާއިރު، އަނެއްބައި ފަރާތްތަކަށް އަންނަ އަހަރާ ހަމައަށް ވެސް މި ބަދަލު ނާންނާނެއެވެ.
އެހެންކަމުން، ފޭސްބުކް ފޮލޯވަރުން ބަހައްޓާނީތޯ ނުވަތަ އަމިއްލަ ޕްރޮފައިލެއްގެ ގޮތުގައި ބާއްވާނީތޯ ވިސްނުމަށް އެކަށީގެންވާ ވަގުތު ލިބިގެންދާނެއެވެ.
އެންމެ ގިނަބަޔަކު މިހާރުވެސް ބޭނުންކުރަމުންދާ ސޯޝަލް މީޑިއާ ޕްލެޓްފޯމް ފޭސްބުކްގެ ފުރަތަމަ އެޕް 2004ގައި ތައާރަފުކުރިއިރު، ހަމައެކަނި ބޭނުންކުރެވެނީ ރައްޓެހިންނާ ގުޅުން ބޭއްވުމަށެވެ. 2011ގައި "ސަބްސްކްރައިބް" ބަޓަން ތައާރަފުކުރުމާއެކު، ރައްޓެހިވުމަކާ ނުލައި ޕަބްލިކް ޕޯސްޓްތައް ބެލުމުގެ އިޚްތިޔާރު ފޯރުކޮށްދިނެވެ. 2022ވަނަ އަހަރު މި ފީޗާގެ ނަން "ފޮލޯ" އަށް ބަދަލުކުރެވުނެވެ.
މިއާއެކު، ދުނިޔޭގެ އެކި ކަންކޮޅުތަކުގައި ތިބި އާންމުންނަށް، މަޝްހޫރު މީހުންނާއި ސެލެބްރިޓީން ފަދަ އިންފްލުއެންސަރުންގެ ކަންކަން ފޮލޯކުރުމުގެ ފުރުސަތު ފަހިވެގެން ދިޔައެވެ.
އެހެންނަމަވެސް، 2024ވަނަ އަހަރުގެ ފަހުކޮޅު ފެށުނު މި ބަދަލާއެކު، ކުރިއަށް އޮތްތަނުގައި މި ފުރުސަތު ލިބޭނީ ހަމައެކަނި ޕްރޮފެޝަނަލް މޯޑަށް ބަދަލުކޮށްފައިވާ އެކައުންޓްތަކުންނެވެ.