ގައުމިއްޔަތުގެ އިސްވަރު އޮފީހާއެކު ގައުމިއްޔަތަށް ހޭލުންތެރި ޒަމާނެއް އަންނާނެކަމަށާއި މަންމައެއްގެ ހައިސިއްޔަތުން އެކަމާ އުފާކުރާކަމަށް ފަސްޓް ލޭޑީ ސާޖިދާ މުހައްމަދު މިއަދު ވިދާޅުވެއްޖެއެވެ.
އެ ކަމަނާ މިފަދައިން ވިދާޅުވީ، ގައުމިއްޔަތު ކޮލެޖު، "ދިވެހި ގައުމިއްޔަތުގެ އިސްވަރު"ގެ އޮފީސް ހުޅުވުމަށް ޓަކައި ބޭއްވި ރަސްމިއްޔާތުގައި ވާހަކަ ދައްކަވަމުންނެވެ. މި ރަސްމިއްޔާތުގައި އެ އޮފީސް ހުޅުއްވައިދެއްވީ ވެސް އެކަމަނާއެވެ.
އެ ކަމަނާ ވިދާޅުވީ ގައުމިއްޔަތުގެ އިސްވަރުގެ އޮފީސް ހުޅުވުމާއެކު ގައުމިއްޔަތާ ގުޅުންހުރި މަސައްކަތްތައް އިތުރަށް ހަލުވިވެ، އިތުރަށް ހަރުދަނާވެގެންދާނެކަން ޔަގީން ކުރައްވާ ކަމަށެވެ.
ދިވެހި ގައުމިއްޔަތުގެ އިސްވަރު އޮފީހެއް ހުޅުވުމަކީ ދިވެހި ގައުމިއްޔަތަށް ހޭލުންތެރި އައު ޒަމާނެއް އައުންކަމުގައި އެ ކަމަނާ ސިފަ ކުރެއްވިއެވެ. އެކަމާ ގުޅިގެން ގައުމާމެދު ހެޔޮ ވިސްނުންތައް އުފެދި، އުފާވެރި މާދަމާއަކަށް ޖާގަ ތަނަވަސް ވެގެންދާނެ ކަމަށް އެ ކަމަނާ ވިދާޅުވިއެވެ.
"މަންމައެއްގެ ހައިސިއްޔަތުން އަޅުގަނޑު އުފާވަނީ އެހެންވެ. އިލްމީ ގޮތުން ދިވެހި ގައުމާ އެއްކޮޅަށް ވިސްނަން އެނގޭ ކަހަލަ، އަމިއްލަ ނަފްސާއި އަމިއްލަ ގައުމަށް ގަދަރުކުރަން އެނގޭ ޖީލެއް ބިނާވުމުގެ މަގުތައް ހުޅުވޭތީ" އެ ކަމަނާ ވިދާޅުވިއެވެ.
ގައުމިއްޔަތު ކޮލެޖުގެ ކައުންސިލްގައި ފަސް ބޭފުޅަކު ހިމެނެއެވެ. ފަސް ދާއިރާއަށް ފަސް އިސްވާރުން ކަނޑައަޅާފައިވާއިރު، އެއިން ކޮންމެ ދާއިރާއަކުން ވިޔުގައެއް އެކުލަވާލާނެ ކަމަށް ދިވެހިބަހާއި ސަގާފަތާއި ތަރިކައާބެހޭ ވަޒީރުވަނީ ވިދާޅުވެފައެވެ.
އެ ގޮތުން ދިވެހި ގައުމިއްޔަތުގެ އިސްވަރަކީ، ގައުމިއްޔަތުގެ ހުރިހާ ދާއިރާއަކަށް ލޯބިކުރާ ފަރާތްތަކުގެ ބައިވެރިވުން ހިމެނޭ މަރުކަޒެއް ކަމަށް ވެސް ވަޒީރު މިއަދު ވިދާޅުވިއެވެ.