ޓެލްއަވީވު (17 ނޮވެންބަރު 2024): ޣައްޒާގެ ދިފާއުގައި ހިޒްބުﷲއަށް ދެން މާ ގިނަ ދުވަހު ހަރަކާތްތެރި ނުވެވޭނެކަމަށާއި އެޖަމާއަތުގެ "ދެފައި ބިންދާލެއްވިއްޖެ ކަމަށް" އިސްރާއީލު ސިފައިންގެ ވެރިޔާ ހާސީ ހަލޭވީ ބުނެފިއެވެ.
އިސްރާއީލާއި ލުބްނާނުގެ ސަރަހައްދީ ރޮނގުގެ ކައިރިއަށް ގޮސް އިސްރާއީލު ސިފައިންނާ މުޚާތަބުކޮށް ހާސީ ހަލޭވީ ބުނީ ހިޒްބުﷲގެ "ދެފައި ބިންދާލުމުގައި" އިސްރާއީލަށް ކާމިޔާބު ލިބިއްޖެކަމަށާއި ހިޒްބުﷲގެ ވެރިޔާ ހަސަން ނަސްރުﷲ އާއި އެޖަމާއަތުގެ އިސް ކޮމާންޑަރުން މަރާލުމުގައި އިސްރާއީލު ހޯދި ކާމިޔާބީއާއެކު ހިޒްބުﷲގެ ޗެއިން އޮފް ކޮމާންޑް މުޅިން ރޫޅާލެވިއްޖެ ކަމުގައެވެ.
"ހިޒްބުﷲގެ ހަނގުރާމަވެރިންގެ ގިނަ ބަޔަކު މަރާލެވި އެޖަމާއަތުގެ އަސްކަރީ އަދި މަދަނީ އިންފްރާސްޓްރަކްޗަރު ހަލާކުކޮށްލުމުގައި އިސްރާއީލު ވަނީ ބޮޑެތި ކާމިޔާބީތަކެއް ހޯދާފައި، މިކަމުގެ ސަބަބުން ދެން އެޖަމާއަތް ދެން މާގިނަ ދުވަހު ދެމިނޯންނާނެ،" ހަލޭވީ ބުންޏެވެ.
ހާސީ ހަލޭވީ ބުނިގޮތުގައި ހިޒްބުﷲ ދުއްވާލުމަށްފަހު ދެން ހަމާސް ވެސް އެއްކޮށް ބަލިކޮށްލެވޭނެއެވެ. މިހާރު އިސްރާއީލުގެ ލޯ ހުރީ ޔަމަނަށް ހަމަލާދީ ހޫޘީ ޖަމާއަތް ބަލިކޮށްލުމަށް ކަމަށާއި އެއަށްފަހު ދެން އިސްރާއީލު ދާނީ އީރާނާ ދިމާއަށްކަމަށް ވެސް ހަލޭވީ ބުންޏެވެ.
އީރާނާ ކުރިމަތިލައި އީރާން ބަލިކޮށްލުމުން ދެން އިސްރާއީލަށް އިސްވެ ހަމަލާދެވޭނެ އަދި ދޭން ކެރޭނެ އެއްވެސް ބާރެއް މެދުއިރުމަތީގައި ނޯންނާނެކަމަށް ހާސީ ހަލޭވީ ބުންޏެވެ. ހާސީ ހަލޭވީ މިހެން ބުނިއިރު ލުބްނާނަށް އެއްގަމުން އަރައި ހިޒްބުﷲގެ މުޖާހިދުން ލުބްނާނުގެ ލީތާނީ ކޯރުގެ ފަހަތަށް ޖެއްސުމަށް އިސްރާއީލު ރޭވި ޕްލޭންވަނީ މުޅިން ފެއިލްވެފައެވެ.
އެއްގަމު މަގުން ލުބްނާނަށް އަރައި ދެކުނު ލުބްނާނު ހިފުމަށް މީގެ ދެމަސް ކުރިން އިސްރާއީލު ސިފައިން ފެށި އެއްވެސް ކަމެއް ކާމިޔާބު ވެފައިނުވާކަމަށް ޚުދު އިސްރާއީލުގެ "ހާއާރެޓްސް" ނޫސްވެސް ބުނެއެވެ.
ލުބްނާނުގެ އެންމެ ބިންކޮޅެއްވެސް އިސްރާއީލު ސިފައިންނަށް ހިފިފައިނުވާއިރު ހިޒްބުﷲގެ ހަމަލާތައްވީ އިތުރަށް ވަރުގަދައެވެ. ހިޒްބުﷲ ވަނީ އިސްރާއީލު ސިފައިންގެ ސަތޭކަ ތިރީސް ވަރަކަށް ސިފައިން މަރާލައި އެތައް ސަތޭކަ ބަޔަކު ޒަޚަމްކޮށްލާފައެވެ. ނަމަވެސް އިސްރާއީލު ބުނަމުން ގެންދަނީ ހިޒްބުﷲ ގެ މިސައިލް ހަރުތަކަށް ބޮންއަޅައި އެހަރުތައް ހަލާކުކޮށްލާފައިވާ ކަމުގައެވެ.
ހިޒްބުﷲގެ ހަމަލާތަކާ ގުޅިގެން އިސްރާއީލުގެ އުތުރުގެ އެތަށް އަވަށެއްގައި ދިރިއުޅޭ ޔަހޫދީ ވަޒަންވެރިން އެތަންތަން ދޫކޮށް ރެފިއުޖީންގެ ގޮތުގައި ރައްކާތެރި ތަންތަނަށް ގޮސްފައިވާތީ ހިޒްބުﷲގެ ހަމަލާތައް ހުއްޓުވައި އެތަންތަނަށް އަނބުރައި މީހުން ގެންނާނެކަމަށްވެސް އިސްރާއީލުގެ ސިފައިން ވައުދުވިއެވެ. ނަމަވެސް މިކަންވެސްވަނީ ފަނަފުލުން ގޮސްފައެވެ.
ހިޒްބުﷲގެ ހަމަލާތައްވަނީ އިތުރަށް ވަރުގަދަކޮށްފައެވެ. ހިޒްބުﷲގެ ހަމަލާތަކުގެ ސަބަބުން އިސްރާއީލުގެ އުތުރުގެ އިތުރު އަވަށްތަށް ދޫކޮށް ރެފިއުޖީންގެ ގޮތުގައި އިތުރު އެތަށް ހާސްބަޔަކުވަނީ ފާއިތުވެދިޔަ ދެމަސްތެރޭގައި ރައްކާތެރި ތަންތަނަށް ގޮސްފައެވެ.
ހިޒްބުﷲގެ ލީޑަރު ހަސަން ނަސްރުﷲ އާއި އެޖަމާއަތުގެ ގިނަ އަދަދެއްގެ ކޮމާންޑަރުން ޝަހީދުކޮށްލުމުން އެޖަމާއަތް އިނދަޖެހޭނެކަމަށް އިސްރާއީލު ލަފާކުރިނަމަވެސް ނަތީޖާ ފެންނަނީ މިއާ ދިމާ އިދިކޮޅަށެވެ. ނަސްރުﷲ ޝަހީދުކޮށްލުމުން ހިޒްބުﷲ އިސްރާއީލަށް ދޭ ހަމަލާތައް ވީ އިތުރަށް ވަރުގަދައެވެ.
ކުރިޔާ ޚިލާފަށް މިހާރު އިސްރާއީލުގައި ހިޒްބުﷲގެ ހަމަލާތައް ނާރާ އެންމެ ސިޓީއެއްވެސް ނެތެވެ. ހިޒްބުﷲ ކޮންމެ ދުވަހަކު އެތައް ސަތޭކަ ރޮކެޓާއި މިސައިލުން އިސްރާއީލުގެ ސިޓީތަކާއި އަވަށްތަކަށް ގިނަ ހަމަލާތަކެއް ދޭއިރު މި ހަމަލާތަކުން ރައްކާތެރިވުމަށްޓަކައި އިސްރާއީލުގެ ސްކޫލްކުދިންނާއި ޔުނިވާސިޓީތަކުގެ ކުދިން ކިޔަވާ ގަޑިތަކުގައި ފަސް ހަފަހަރު ބިންގަރާސްތަކަށް ވަންނަން ނުޖެހޭ އެންމެ ދުވަހެއްވެސް މިހާރު ނުދެއެވެ.
ހިޒްބުﷲގެ ގިނަ ހަމަލާތައް އަމާޒުކުރަނީ އިސްރާއީލުގެ އިގްތިސާދީ ވެރިރަށްކަމަށްވާ ހައިފާ އަށެވެ. ހިޒްބުﷲގެ ހަމަލާތަކުގައި ހައިފާގެ އެތަންމިތަނުގައި އަލިފާން ގަނޑުތައް ރޯނުވާ އެންމެ ދުވަހެއްވެސް ނުދާކަމަށް އިސްރާއީލުގެ އެތެރެއިން ލިބޭ ޚަބަރުތައް ބުނެއެވެ.
ހޫޘީންގެ ހައިޕާސޮނިކް މިސައިލް ހަމަލާތައް ވެސް އިސްރާއީލަށް ވަރަށް ގިނައިން އަމާޒުވާއިރު އިސްރާއީލުގެ ދިފާއީ ނިޒާމުތަކަށް މި މިސައިލްތައް މަތަ ނުކުރެވެއެވެ. އަދި މި ހަމަލާތަކަށް އިސްރާއީލަށް ރައްދުވެސް ނުދެވެއެވެ. އިސްރާއީލުގެ ބަދަލުގައި އެމެރިކާއާއި އިނގިރޭސިވިލާތުން ހޫޘީންގެ އަމާޒުތަކަށް ކިތަންމެ ވަރަކަށް ހަމަލާދިން ނަމަވެސް ހޫޘީން ގެ ހަމަލާތައް ހުއްޓުވުމުގައި އެމެރިކާވެސްވަނީ ނާކާމިޔާބުވެފައެވެ.