އިންޑިއާގެ އެންމެ ބޮޑު މަހުޖަނުންގެ ތެރޭގައި ހިމެނޭ މުކޭޝް އަމްބާނީގެ ދަރިފުޅު އަނަންތު އަމްބާނީ މިއަދު ހދ. މަކުނުދޫއަށް ޖެޓްސްކީއެއްގައި ޒިޔަރާތްކޮށްފިއެވެ.
އޭނާ މިވަގުތު ޗުއްޓީ ހޭދަކުރަމުން ދަނީ މަކުނުދޫ ފަޅުގައި އޮންނަ ލަގްޒަރީ ރިސޯޓެއް ކަމުގައިވާ ސޮނެވާ ސީކްރެޓްގައެވެ. މި ރިސޯޓު ހުޅުވީ މިދިޔަ އެޕްރިލް މަހުއެވެ.
އޭނާ ޖެޓްސްކީގައި މަކުނޫއާ ކައިރިކުރި އިރު މަކުނުދޫން އޭނާއާ ދިމާވީ މުހައްމަދު ޝާނިފާއެވެ. "ސަން"އާ ވާހަކަ ދައްކަމުން ޝާނިފް ބުނި ގޮތުގައި އޭނާއަށް އަނަންތު ފެނުނީ މޫދުން އަރައިގެން އަންނަނިކޮށެވެ.
އޭނާ ބުނީ، އަނަންތު އޭނާއާއި އޭނާ ގާތުގައި ތިބި މީހުންނާ ވާހަކަ ދެއްކި ކަމަށެވެ.
އަނަންތު އަމްބާނީ މަކުނުދޫގައި -- ފޮޓޯ/ މުހައްމަދު ޝާނިފް
"އަނަންތަކީ ޖަނަވާރަށް ވަރަށް ލޯބިކުރާ މީހެއް. އޭނާ ގަތީ ކުކުޅަކާ ތިން މުސަޅު. ދޫނި ވެސް ގަންނަން ބޭނުންވި. އެކަމަކު އެ ގޭގައި އެވަގުތު މީހުން ނޫޅޭތީ ނުގަނެވުނީ،" ޝާނިފް ބުންޏެވެ.
ޝާނިފް ބުނީ، އަނަންތު ރަށަށް އެރުމުން އޭނާގެ ފަހަތުން ބޮޑީގާޑުންގެ ޓީމެއް އައި ކަމަށެވެ. އަދި ފަހުން ރިސޯޓުން ވެސް ލޯންޗު އައިކަމަށް އޭނާ ބުންޏެވެ.
"ވަރަށް ގިނަ އެއްޗިސް ގަންނަން ބޭނުންވި އަދި ރަށުތެރެ ވެސް ބަލައިލަން ބޭނުންވި އެކަމަކު އަޅުގަނޑަށް ގަބޫލުކުރެވެނީ ވަގުތުގެ ގޮތުން ކަމަށް މަޑު ނުކުރެވުނީ،" އޭނާ ބުންޏެވެ.
އަނަންތުއާ ދިމާވި ވަގުތުކޮޅު އޭނާއަކީ ހިތްހެޔޮ މީހެއްކަން ފާހަގަވިކަމަށް ޝާނިފް ބުންޏެވެ. އަދި ދެވެން އޮތް އެންމެ ރަނގަޅު މެހެމާނުދާރީ އޭނާއަށް ދިންކަމަށް ޝާނިފް ބުންޏެވެ.
އަނަންތު އަމްބާނީއަށް ގިނަ ބައެއްގެ ސަމާލުކަން ހުއްޓުނީ މިފަހުން ބޭއްވި ބޮޑު ކައިވެނި ހަފުލާގެ ސަބަބުންނެވެ. މި ކައިވެނި ހަފުލާއަށް ދުނިޔޭގެ އެކި ކަންކޮޅުތަކުން މީހުން ދިޔައެވެ.