ބ. އޭދަފުށީގައި 1،000 ހައުސިން ޔުނިޓު ހިމެނޭ ތިން ޓަވަރު އެޅުމަށް ޗައިނާގެ ކުންފުންޏަކާ ސަރުކާރުން މިއަދު ހަވާލުކޮށްފިއެވެ.
އޭދަފުށީގައި 15 ފަންގިފިލާގެ ތިން ޓަވަރު އިމާރާތްކުރުމުގެ މަޝްރޫއު ހަވާލުކުރީ ޗައިނާގެ ސައިނޯ ހައިޑްރޯ ކޯޕަރޭޓެޑް ލިމިޓެޑާއެވެ.
އެ އެއްބަސްވުމުގައި ސޮއިކުރުމަށް ރައީސް އޮފީހުގައި ބޭއްވި ރަސްމިއްޔާތުގައި ޗައިނާ ކުންފުނީގެ ފަރާތުން ސޮއި ކުރެއްވީ އެ ކުންފުނީގެ މެނޭޖަރު ޕެންގް ވާންޝޫއެވެ. އަދި ކޮންސްޓްރަކްޝަން މިނިސްޓްރީގެ ފަރާތުން ސޮއި ކުރެއްވީ މިނިސްޓަރު ޑރ. އަބްދުﷲ މުއްތަލިބެވެ.
މި ރަސްމިއްޔާތުގައި ވާހަކަ ދައްކަވަމުން މުއްތަލިބު ވިދާޅުވީ މި އެމްއޯޔޫއަކީ މިއަހަރުގެ މޭ މަހުގެ އަށްވަނަ ދުވަހު ސޮއިކުރި އެމްއޯޔޫއެއްގެ ދަށުން އޭދަފުށީ ކައުންސިލާއެކު ވަރަށްގިނަ މަސައްކަތްތަކެއްކޮށް، ސަރުކާރުން ކޮންޓްރެކްޓަރާއެކު މަޝްވަރާ ކުރުމަށް ފަހު ހެދި އެއްބަސްވުމެއް ކަމަށެވެ.
މިގޮތަށް މިކަން ކުރުމަށް އަޅުގަނޑުމެން ނިންމި މައިގަނޑު ސަބަބަކީ އޭދަފުއްޓަކީ ސަރުކާރުން ކަނޑައަޅާފައިވާ އާބަން ސެންޓަރަކަށް ވުމާއެކު އޭދަފުށީގެ ބިން އެންމެ ހެޔޮގޮތުގައި ބޭނުންކުރެވޭނެ ގޮތް ހެދުމަށް ކުރަންޖެހޭ މަސައްކަތުގެ ތެރެއިން ބިން އިތުރުކުރެވެން ނެތުމުން ވާޓިކަލް ޑިވޮލޮޕްމެންޓަކީ މުހިންމު ކަމެއް ކަމަށް ގަބޫލު ކުރެވޭތީ
މިނިސްޓަރު އަބްދުﷲ މުއްތަލިބު
މިނިސްޓަރު ވިދާޅުވީ މި މަޝްރޫގެ ދަށުން ތިން ރޫމްގެ 336 ފްލެޓާއި ދެ ރޫމްގެ 672 ފްލެޓް އޭދަފުށީގައި ގާއިމްކުރާނެ ކަމަށެވެ. އޭދަފުއްޓަކީ އާބަން ސެންޓަރެއްގެ ގޮތުގައި ކަނޑައަޅާފައިވާ ރަށަކަށް ވުމާ އެކު އެ ރަށަކީ އާބާދީއާއި ތަރައްގީ ބ. އަތޮޅުގައި އެއްފަސް ކުރެވޭނެ ނާރެހަކަށް ވާނެކަން މިނިސްޓަރު ވަނީ ފާހަގަކުރައްވާފައެވެ.
ބ. އޭދަފުށީގައި 15 ބުރީގެ 12 ހައުސިން ޔުނިޓު އެޅުމަށް ޗައިނާގެ ކުންފުންޏަކާއި ހަވާލުކުރުމަށް ބޭއްވުނު ރަސްމިއްޔާތުގެ ތެރެއިން ---- ފޮޓޯ/ ރައީސް އޮފީސް
މިނިސްޓަރު ވިދާޅުވީ އޭދަފުށީގެ ވަށައިގެން ގިނަ އަދަދެއްގެ ރިސޯޓްތައް އޮންނައިރު، އެ ރިސޯޓުތަކުގެ މަސައްކަތް ކުރާ މީހުންގެ އާއިލާތަކަށް ބޯހިޔާވަހިކަމުގެ ފުރުސަތު ހޯދައި ދިނުމަށް އޭދަފުށްޓަކީ އެންމެ ރަނގަޅު އެއް ރަށްކަން ފާހަގަކުރެވޭ ކަމަށެވެ.
މި މަޝްރޫއު ނިމުމާއެކު އޭދަފުށީގެ އާބާދީއާއި ވަޒީފާގެ ފުރުސަތުތަކާއި، އެ ރަށުގެ ވަށައިގެންވާ އެކި ރިސޯޓުތަކުގައި މަސައްކަތްކުރާ ދިވެހީންގެ އަދަދު ވެސް އިތުރުވާނެ ކަމަށް މުއްތަލިބު ވިދާޅުވިއެވެ.