ޑެސްޓިނޭޝަން މާކެޓިން ބަޖެޓަށް ފައިސާ އިތުރުކުރުން މުހިންމުކަމަށް ވިދާޅުވެ، މަރުކަޒީ ބޭންކް، އެމްއެމްއޭގެ ގަވަރުނަރު އަހުމަދު މުނައްވަރު އިއްޔެ ލަފައެއް ދެއްވައިފިއެވެ.
ރައްޔިތުންގެ މަޖިލީހުގެ ބަޖެޓު ދިރާސާކުރާ ކޮމިޓީގައި ގަވަރުނަރު ވިދާޅުވީ، ޑެސްޓިނޭޝަން މާކެޓިން އަކީ ވަރަށް މުހިންމު ކަމެއް ކަމަށާއި އެކަމަށް ބަޖެޓު އިތުރުކުރުން މުހިންމު ކަމަށެވެ.
އެގޮތުން، މިދިޔަ އަހަރުތަކާ ބަލާއިރު، އެކަމަށް ބަޖެޓު އިތުރުކޮށްފައި ނެތް ކަމަށާއި އަންނަ އަހަރު ވެލާނާ އިންޓަނޭޝަނަލް އެއާޕޯޓު (ވީއައިއޭ) ތަރައްގީކޮށް ނިންމައި، ހުޅުވިގެން ދާއިރު ފަތުރުވެރިކަމުގެ ދާއިރާ ކުރިއެރުވުމަށް ފަތުރުވެރިންނަށް ފަސޭހައިން ދަތުރުކުރެވޭނެ ގޮތްތަކެއް ހަމަޖަސައްސަން ޖެހޭ ކަމަށް މުނައްވަރު ވިދާޅުވެފައިވެއެވެ.
ޑެސްޓިނޭޝަން މާކެޓިން އަކީ ވަރަށް މުހިންމުކަމެއް ކަމަށް އަޅުގަނޑު ފާހަގަކުރަން. އަދި، މިއަށް ބަޖެޓު އިތުރުކުރުން ވެސް މުހިންމު ކަމަށް އަޅުގަނޑު ފާހަގަކުރަން. މި އަންނަ އަހަރު އަޅުގަނޑުމެންގެ އެއާޕޯޓު ހުޅުވިގެންދާއިރު، އެކްސްޕޭންޝަނަށް ބެޑްތަކެއް އިތުރުވެގެން ދާއިރު، އެކްސްޕޭންޑު ކުރުމަށްޓަކައި ޚާއްސަ ގޮތެއްގައި އިންޑަސްޓްރީއާ ގުޅިގެން އަޅުގަނޑު ގަބޫލުކުރާ ގޮތުން ވެއްޖިއްޔާ ފަތުރުވެރިންނަށް ފަސޭހަ ކަމާއެއްކޮށް ދަތުރުކުރެވޭނެ ގޮތްތަކަށް އަޅުގަނޑުމެން ޓްރެވަލްސް އިތުރުކުރަން ޖެހޭ ކަމަށް އަޅުގަނޑު ފާހަގަކުރަން
އެ ކޮމިޓީގައި އޭވިއޭޝަން ދާއިރާ ފުޅާކޮށް، ޑައިރެކްޓު ކަނެކްޓިވިޓީ އިތުރުކުރުމަށް ގަވަރުނަރު ވަނީ ލަފާދެއްވާފައެެވެ.
ފާހަގަކޮށްލެވޭ ގޮތުގައި، މި ވަގުތު ރާއްޖޭގައި އަންނަނީ 174 ރިސޯޓާއި 902 ގެސްޓުހައުސްތައް ހިންގަމުންނެވެ.