ގާޑިއަން އިން ''އެކްސް'' ބޮއިކޮޓްކޮށްފި

އިނގިރޭސިވިލާތުގެ މަޝްހޫރު ނޫހެއް ކަމަށްވާ، ދަ ގާޑިއަން އިން ސޯޝަލް މީޑިއާ ޕްލެޓްފޯލް "އެކްސް" ބޮއިކޮޓްކޮށްފިއެވެ.

ކުރިން "ޓުވިޓާ" ގެ ގޮތުގައި ބޭނުންކުރަމުން އައި "އެކްސް" އަކީ މަހުޖަނު އީލޮން މަސްކުގެ ޕްލެޓްފޯމެކެވެ.

ގާޑިއަންއިން ބުނީ އެ ފިޔަވަޅު އެޅުމަށް ވިސްނަމުން އަންނަތާ ދުވަސްކޮޅެއް ވެއްޖެ ކަމަށާއި އަދި އެގޮތަށް ނިންމީ ކަނާއަތު ފިޔައިގެ ހަރުކަށި ސިޔާސީ ހިޔާލުތަކާއި ނަސްލީ އިމްތިޔާޒަށް ހިތްވަރު ލިބޭ ކޮންޓެންޓް ފެތުރުމަށް އެކްސްއިން މަސައްކަތް ކޮށްފައިވާތީ ކަމަށެވެ.

އެ މީޑިއާއިން އިތުރަށް ބުނީ އެމެރިކާގެ ރިޔާސީ އިންތިޚާބުގެ ކެމްޕޭނުން ފެށިގެން އެކަން ފާހަގަކުރެވުނު ކަމަށާއި އެކްސްއަކީ "ވިހަ" މީޑިއާ ޕްލެޓްފޯމެއް ކަމަށެވެ. އެ ޕްލެޓްފޯމްގެ ވެރިޔާ މަސްކް އެ ޕްލެޓްފޯމުގެ ނުފޫޒު ބޭނުންކޮށްގެން ސިޔާސީ ކަންކަން ވަކި ގޮތަކަށް ބައްޓަން ކުރަން މަސައްކަތް ކުރި ކަމަށްވެސް ގާޑިއަންއިން ބުނެފައިވެއެވެ.

އެމެރިކާގެ އިންތިޚާބުގައި މަސްކް ތާއީދު ކުރެއްވީ، އިންތިޚާބު ކާމިޔާބު ކުރެއްވި ކުރީގެ ރައީސް ޑޮނަލްޑް ޓްރަމްޕަށެވެ. ކަނާއަތު ފިޔައިގެ ހަރުކަށި ސިޔާސީ ވިސްނުމެއް ގެންގުޅޭކަމުގެ ތުހުމަތުތައް ޓްރަމްޕަށް އޮންނަނީ އަމާޒުވެފައެވެ.

"ދި ގާޑިއަންގެ އެއްވެސް އެޑިޓޯރިއަލް އެކައުންޓަކުން މީގެ ފަހުން ސޯޝަލް މީޑިއާ ސައިޓް، 'އެކްސް" ގައި ޕޯސްޓް ނުކުރާނެކަން ދި ގާޑިއަންގެ ކިޔުންތެރިންގެ ސަމާލުކަމަށްޓަކައި ދަންނަވަން." ދި ގާޑިއަން މީޑިއާ ކުންފުނިން ނެރެފައިވާ ބަޔާނުގައިވެއެވެ.

އެކްސް ބޭނުންނުކުރި ނަމަވެސް އެކްސް ޔޫޒަރުންނަށް އަދިވެސް ގާޑިއަންގެ ލިޔުންތައް އެ ޕްލެޓްފޯމްގައި ހިއްސާކުރެވޭނެ ކަމަށާއި، ނޫހުގެ ނޫސްވެރިން ވެސް ބައެއް ފަހަރު އެހެން ސޯޝަލް ނެޓްވޯކްތައް ބޭނުންކުރާ ފަދައިން ޚަބަރުތައް ހޯދުމުގެ ބޭނުމުގައި އެކްސް ބޭނުންކުރާނެ ކަމަށް ގާޑިއަންއިން ބުނެއެވެ.

ގާޑިއަންއިން އެ ފިޔަވަޅު އަޅާފައިވާއިރު، އެކްސްގައި އިޝްތިހާރުކުރާ އެޕަލް، ކޮކާކޯލާ އަދި ޑިޒްނީ ފަދަ ކުންފުނިތަކުން މިދިޔަ އަހަރު ވަނީ އެކްސް ގައި އިޝްތިހާރުކުރުން ވެސް ހުއްޓާލާފައެވެ. ދުނިޔޭގައި ބާއްވާ އެންމެ ބޮޑު އެއް ފިލްމް ފެއާ، ބާލިން ފިލްމް ފެސްޓިވަލުން ވެސް މިދިޔަ މަހު ވަނީ އެ ކުންފުނިން ވެސް އެކްސް ބޭނުން ކުރުން މިހާރު ހުއްޓާލާފައިވާ ކަމަށް ބުނެފައެވެ.

މަސްކް 2022 ގައި އެކްސް ގަތީ 44 ބިލިއަން ޑޮލަރަށެވެ. އެ ޕްލެޓްފޯމަށް އެކްސްގެ ނަން ދިނީ އޭނާގެ އެހެން ވިޔާފާރިތަކުގެ ނަންތަކާވެސް ގުޅުވާފައެވެ.