އިންޑިޔާގެ ހުޅަނގު ބެންގާލް ސްޓޭޓުގެ ވެރިރަށް ކޮލްކަތާގައި އަންހެން ޑޮކްޓަރެއް ރޭޕުކޮށް މަރައިލި ކުށުގެ ތުހުމަތުގައި ހައްޔަރު ކޮށްފައިވާ މީހާގެ ޝަރީއަތް ފަށައިފިއެވެ. އެ މައްސަލައިގެ ފުރަތަމަ އަޑުއެހުން އިއްޔެ ކުރިއަށް ގެންގޮސްފައިވާއިރު، ޝަރީއަތް ވަނީ ސިއްރުކޮށްފައެވެ.
ޑޮކްޓަރު މަރާލި މައްސަލައިގައި ތުހުމަތު ކުރެވޭ ސަންޖޭ ރޯއީ ވަނީ ކޯޓަށް ހާޒިރުވެފައެވެ. އަދި މަރާލި ޑޮކްޓަރުގެ ބައްޕަވެސް ކޯޓަށް ހާޒިރުވެފައިވާ ކަމަށް ފުލުހުންނާ ހަވާލާދީ އިންޑިއާގެ މީޑިއާތަކުން ރިޕޯޓުކޮށްފައިވެއެވެ.
ޑޮކްޓަރުގެ މަރުގެ ތުހުމަތުގައި ރޯއިއާ ދެކޮޅަށް ހުސްވި ހަފުތާގައި ދަޢުވާ އުފުލުމުން، އޭނާ ވަނީ އެ ދަޢުވާއަށް އިންކާރު ކޮށްފައެވެ. އަދި، ފްރޭމު ކޮށްފައިވާ ކަމަށާއި އޭނާއަކީ މައުސޫމު މީހެއް ކަމަށް ވަކާލާތު ކުރަމުންދާ ކަމުގައި ވެސް އިންޑިޔާގެ މީޑިޔާތަކުން ރިޕޯޓު ކުރިއެވެ. އިއްޔެގެ ޝަރީއަތަށްފަހު ކޯޓުން ނިކުމެވެސް އޭނާ ވަނީ އެ ތުހުމަތަށް ދެކޮޅު ހަދާފައެވެ.
"މިއަދު ވެސް އެމީހުން އަހަރެން ވާހަކަ ދައްކަން ފުރުސަތުދީފައެއް ނުވޭ. އަހަރެން އެއްވެސް ކަމެއް ނުކުރަން. އަހަރެން ވަނީ ފްރޭމްކޮށްފައި." ނޫސްވެރިންނާ ވާހަކަ ދައްކަމުން ރޯއީ ބުންޏެވެ.
ރޯއި އަކީ ފުލުހުންގެ އިދާރާގައި ވޮލަންޓިޔަރެއްގެ ގޮތުގައި މަސައްކަތް ކުރި މީހެކެވެ. ރޯއިގެ އިތުރުން، ޑޮކްޓަރުގެ މަރާ ގުޅިގެން އިތުރު ބަޔަކު ވެސް ވަނީ ފުލުހުންގެ ބެލުމުގެ ދަށަށް ގެންގޮސްފައެވެ. އޭގެ ތެރޭގައި މި މައްސަލައިގެ ތަހުގީގުގައި ބައިވެރިވި ފުލުހުންގެ އިސް އޮފިސަރަކާއި، ޑޮކްޓަރުގެ ހަށިގަނޑުގެ ޓެސްޓުތައް ހަދާފައިވާ ހަސްފަތާލުގެ އިސް އޮފިޝަލަކު ހިމެނެއެވެ. އެ ދެ މީހުން ހައްޔަރު ކޮށްފައި ވަނީ ހެކި ނައްތާލަން މަސައްކަތް ކުރުމުގެ ތުހުމަތުގައެވެ.
ރޯއީގެ މައްޗަށް ދައުވާކޮށްފައި ވަނީ ބާރަތިޔާ ނިޔާ ސަންހިތާގެ 64ވަނަ މާއްދާ (ރޭޕް) އާއި 66ވަނަ މާއްދާ (މީހަކު މަރާލުމުން ލިބޭ އަދަބު ނުވަތަ މެރުމުގެ މަގުސަދުގައި ދޭ ހަމަލާއެއްގެ ސަބަބުން މީހެއްގެ ފުރާނަ ނުރައްކާ ހާލަތަށް ދިއުމުން ދޭ އަދަބު) އަދި 103ވަނަ މާއްދާ (މަރުގެ އަދަބު) އެވެ.
ކޮލްކަތާގެ ސަރުކާރުގެ ހޮސްޕިޓަލެއް ކަމަށްވާ އާރްޖީ ކާރް ހޮސްޕިޓަލް ތެރޭގައި، މިދިޔަ އޮގަސްޓު މަހުގެ މަހު ނުވަވަނަ ދުވަހު، އުމުރުން 31 އަހަރުގެ ޑޮކްޓަރު ރޭޕްކޮށް މަރާލާފައި ވަނީ ދިގު ޝިފްޓަކަށްފަހު އަރާމު ކޮށްލަން ސެމިނާ ރޫމަށް ދިޔަ ފަހުންނެވެ.
މައްސަލައިގައި ތުހުމަތުވާ ރޯއީ ކޮލްކަތާ ޕޮލިހުން ހައްޔަރުކުރީ ޑިއުޓީގައި ހުރި އަންހެން ޑޮކްޓަރުގެ ހަށިގަނޑު އާރްޖީ ކާރު ހޮސްޕިޓަލުގެ ސެމިނާ ރޫމް ތެރެއިން ފެނުނުތާ އެއް ދުވަސް ފަހުން އޮގަސްޓް މަހުގެ 10 ވަނަ ދުވަހުއެވެ.
އެ މައްސަލައާ ގުޅިގެން މަސައްކަތުގެ މާހައުލުގައި އަންހެނުންނަށް ރައްކާތެރިކަން ކަށަވަރުކޮށްދިނުމަށް ގޮވާލައި އެތައް ހާސް ބަޔަކު ވަނީ ސިލްސިލާކޮށް މުޒާހަރާކޮށްފައެވެ.
ޑޮކްޓަރުގެ މަރަށް އިންސާފު ހޯދައިދިނުމަށް ގޮވައިލައި ދުނިޔޭގެ އެކި ކަންކޮޅުތަކުގައި ވެސް ބޮޑެތި މުޒާހަރާތަކެއް ބާއްވާފައިވެއެވެ. އެ މުޒާހަރާތައް އިންތިޒާމު ކުރި ފަރާތުން ބުނީ 25 ގައުމެއްގެ 130 އަށްވުރެ ގިނަ ރަށުގައި ބޭއްވި މުޒާހަރާތަކުގައި އިންޑިޔާ ދަރިކޮޅުގެ އެތަކެއް ހާސް ބަޔެއްގެ އިތުރުން އެ ގައުމުތަކުގެ ރައްޔިތުން ވެސް ބައިވެރިވި ކަމުގައެވެ.