އެކްސް ހިލޭ ބޭނުންކުރާ ފަރާތްތަކަށް ވެސް ގްރޮކްގެ ޚިދުމަތް ތައާރަފުކުރަން ނިންމައިފިއެވެ.
މި ނިންމުމާއި އެއްގޮތަށް، އެލޮން މަސްކްގެ އެކްސް އޭއައި ކުންފުނިން ތައާރަފުކުރި އޭއައި ޗެޓްބޮޓް، ގްރޮކް، މިހާރު ވަނީ އެކްސް ހިލޭ ބޭނުންކުރާ ފަރާތްތަކަށް ވެސް ވަކި ސަރަޙައްދުތަކެއްގައި ތައާރަފުކުރަން ފަށާފައެވެ.
މިދިޔަ އަހަރުގެ ފަހުކޮޅު ތައާރަފުކުރެވުނު ގްރޮކް، މިހާތަނަށް ލިބުނީ ހަމައެކަނި އެކްސްގެ ޕްރީމިއަމް މެމްބަރުންނަށެވެ. އެހެންނަމަވެސް، މިހާރު ވަނީ ހިލޭ ބޭނުންކުރާ ފަރާތްތަކަށް ވެސް ވަކި ޝަރުތުތަކަކާއެކު ގްރޮކް ބޭނުންކުރުމުގެ ފުރުސަތު ހުޅުވާލާފައެވެ.
ޓެކްކްރަންޗްގެ ރިޕޯޓެއްގައި ބުނެފައިވާ ގޮތުގައި، ގްރޮކް ހިލޭ ބޭނުންކުރެވޭނީ މަދުވެގެން ހަތް ދުވަސް ވެފައިވާ އަދި ފޯނު ނަންބަރެއް ގުޅާލާފައިވާ އެކައުންޓްތަކަށެވެ. އަދި ދެ ގަޑިއިރުގެ ތެރޭގައި ގްރޮކް-2 މޮޑެލްއަށް 10 ސުވާލު އަދި ގްރޮކް-2 މިނި މޮޑެލްއަށް 20 ސުވާލު ކުރެވޭނެއެވެ. މީގެ އިތުރުން، ދުވާލަކު ތިން ފަހަރު ފޮޓޯ ތަހުލީލުކުރުމުގެ ފުރުސަތު ލިބޭނެއެވެ.
ގްރޮކް-2 އަދި ގްރޮކް-2 މިނީ މޮޑެލްތަކަކީ މިއަހަރުގެ ފަހުކޮޅު ތައާރަފުކުރެވުނު އައު މޮޑެލްތަކެކެވެ. ގްރޮކް-2 އަކީ އެކްސްއޭއައިގެ އެންމެ ފުރިހަމަ އޭއައި ޗެޓްބޮޓް ކަމަށްވާއިރު، މި މޮޑެލްއަށް އެކްސްއިން ސީދާ ރިއަލްޓައިމް މައުލޫމާތު ލިބޭނެއެވެ. އަދި މިނީ ވާޝަންއަކީ ސްޕީޑާއި ޖަވާބުގެ ފެންވަރު ހަމަހަމަކޮށްދޭ މޮޑެލްއެއް ކަމަށް ކުންފުނިން ބުނެފައިވެއެވެ.