ރިޔާޟް (11 ނޮވެންބަރު 2024): ސައޫދީ ސިފައިންގެ ޖެނެރަލް ކޮމާންޑަރު އަދި ޗީފް އޮފް ސްޓާފް ލެފްޓިނެންޓް ޖެނެރަލް ފައްޔާޒް ބިން ހާމިދު އައްރުވައިލީ, އީރާނަށް ވަޑައިގެން އީރާނު ސިފައިންގެ ޗީފް އޮފް ސްޓާފް މޭޖާ ޖެނެރަލް މުހައްމަދު ބާގިރީ އާ ތެހެރާނުގައި ބައްދަލުކުރައްވައިފިއެވެ.
ސައޫދީގެ ރަސްމީ ނޫސް އެޖެންސީ ބުނާގޮތުން އެ ގައުމުގެ ސިފައިންގެ ޖެނެރަލް ކޮމާންޑަރު އަދި ޗީފް އޮފް ސްޓާފް އީރާނަށް ވަޑައިގެންނެވީ ސައޫދީ ސިފައިންގެ އިސް އޮފިސަރުންގެ ވަފުދަކާއެކުގައެވެ.
ރިޕޯޓުތައް ބުނާގޮތުން ސައޫދީ އާއި އީރާނުގެ ސިފައިންގެ އިސްވެރިންގެ މަޝްވަރާތައް ބިނާކުރެއްވީ ދެގައުމުގެ ދެމެދުގައި އަސްކަރީ ގުޅުންތައް ވަރުގަދަކުރުމާ ބެހޭގޮތުންނާއި ދެ ގައުމު ގުޅިގެން އަސްކަރީ ތަމްރީނުތައް ބާއްވައި އަސްކަރީ އިތުބާރާއި ޔަގީންކަން ދެ ގައުމުގެ މެދުގައި ވަރުގަދަކުރުމާ ބެހޭގޮތުންނެވެ.
ސައޫދީ އާއި އީރާނާދެމެދު ޑިޕްލޮމެޓިކް ގުޅުންތައް މިހާރު ރަނގަޅު ނަމަވެސް އަސްކަރީ ފެންވަރުގައި މާބޮޑު ގުޅުންތަކެއް ނޯވެއެވެ. ސައޫދީ އާއި އީރާނުގެ މަސްއޫލުވެރިންނާ ހަވާލާދީ ރިޕޯޓުތައް ބުނާގޮތުން ސައޫދީ ސިފައިންގެ ވެރިޔާ އީރާނަށް ވަޑައިގަތުމަކީ ދެ ގައުމުގެ ދެމެދުގައި އަސްކަރީ ގުޅުންތައް ބަދަހިކުރުމުގެ އައު ސަފުޙާއެކެވެ. މިއީ ދެ ގައުމުގެ އަސްކަރީ ގުޅުންތަކުގެ ފުރަތަމަ މަރުހަލާއެވެ.
ސައޫދީ އާއި އީރާން އަސްކަރީ މައިދާނުގައި ގުޅުންތައް ބަދަހިކުރަން ފެށުމަކީ މިހާތަނަށް ވަރަށް ނާދިރު އަދި ނުވާނެކަމެއްކަމުގައި ބެލެވިފައި އޮތްކަމެކެވެ. ނަމަވެސް ދާދިފަހުން ސައޫދީ އާއި އީރާނުގެ ކަނޑުގެ ސިފައިން ގުޅިގެން ވަނީ ގަލްފުގައި އަސްކަރީ ތަމްރީންތަކެއް ވެސް ކުރިޔަށް ގެންގޮސްފައެވެ. އަދި ދެ ގައުމުގެ ދެމެދުގައި އަސްކަރީ މައުލޫމާތު ހިއްސާކުރުމުގެ ކަންތައް ވެސް މިހާރު ވަނީ ފެށިފައެވެ.
އެމެރިކާއިން މީގެ ފަސްވަރަކަށް އަހަރު ކުރިން ވަނީ މުސްލިމުންގެ އެންމެ ބޮޑު ދުޝްމަންކަމަށްވާ ޔަހޫދީ އިސްރާއީލު ހިމެނޭހެން ގަލްފުގެ އަރަބި ގައުމުތަކާއި މިސްރު އަދި އުރުދުން ހިމަނައިގެން އީރާނާ ދިމާކުރުމަށް ޚާއްސަކޮށް، އެމެރިކާގެ ކޮމާންޑުގެ ދަށުން އަރަބި އިސްރާއީލުގެ "ނޭޓޯ ޖަމާއަތެއް" އުފެއްދުމަށް ބޮޑެތި މަސައްކަތްތަކެއް ކޮށްފައެވެ.
މި މަސައްކަތްތަކުގެ ދަށުން އެމެރިކާގެ ފިއްތުންތަކާއެކު ގަލްފުގެ އަރަބި ދެ ގައުމު ކަމަށްވާ ޔޫއޭއީ އާއި ބަހްރައިން ވަނީ އިސްރާއީލަށް އިއުތިރާފުވެ އިސްރާއީލާ ސުލްހަވެ ޑިޕްލޮމެޓިކް ގުޅުންތައް އުފައްދާފައެވެ. ނަމަވެސް އީރާނާ ދިމާކުރުމަށްޓަކައި އަރަބި ނޭޓޯއެއް އުފެއްދުމަށް އެ ދެ ގައުމުގެ ވެސް އަދި އުރުދުންއާއި މިސްރުގެ ވެސް އެއްބާރުލުމެއް ނުލިބުނެވެ.
އެމެރިކާއިން ރޭވި މިރޭވުންތަކުގެ ތެރެއަށް ސައޫދީ ވަންނާނެކަމަށް ބެލެވުނު ނަމަވެސް މިކަމުގެ ތެރެއަށް ވަނުމަށް ސައޫދީ ވަނީ ދެކޮޅު ހަދާފައެވެ.
އިސްރާއީލާ ގުޅުންތައް ގާއިމްކުރި ޔޫއޭއީ އާއި ބަހްރައިން ވެސް ވަނީ އީރާނާ ކުރިމަތިލުމަށް އިސްރާއީލާ ގުޅިގެން މަސައްކަތް ކުރުމަށް އޭރުވެސް ދެކޮޅު ހަދާފައެވެ. ރިޕޯޓުތައް ބުނާގޮތުން މި ރޭވުންގަނޑުގެ ތެރެއަށް ވަނުމަށް ސައޫދީ ދެކޮޅު ހެދީ އިސްލާމީ ދުނިޔޭގައި ސައޫދީގެ އަގު ވެއްޓިގެންދާނެކަމުގެ ބިރަށެވެ.
މި އަޑުތަކާއެކު ސައޫދީ ސަރުކާރުން ވަނީ ފަލަސްތީނުގެ މިނިވަން ދައުލަތެއް އުފެއްދުމުގެ ކުރިން އިސްރާއީލާ ގުޅުންތައް ގާއިމް ނުކުރާނެކަން ތަކުރާރުކޮށް ހާމަކޮށްފައެވެ.
މިއާއެކު ވެސް އަރަބި އިސްރާއީލުގެ ނޭޓޯއެއް ހަދައިގެން އީރާނާ ދިމާކުރުމުގެ ކަންތައް ކުރިޔަށްގެންދެވޭތޯ އެމެރިކާއާއި އިސްރާއީލު ބެލިއެވެ. ޔަހޫދީ މި ރޭވުންގަނޑު މަޑުޖެހުނީ ފަލަސްތީނުގެ މުޖާހިދުން މިދިޔަ އަހަރުގެ އޮކްޓޯބަރު ހަތެއްގައި އިސްރާއީލަށް ދިން ކުއްލި ހަމަލާތަކާ ގުޅިގެންނެވެ.
ޔަހޫދީން ޣައްޒާގެ އާންމުންނާ ދެކޮޅަށް ފެށި ގަތުލުއާންމުތަކުން އެނގުނު ކަންތައްތަކުގެ ތެރޭގައި އެމެރިކާއާއި ޔޫރަޕުން އިސްރާއީލުގެ ގަތުލުއާންމުތަކަށް ވާގިވެރިވާ މިންވަރާއި އިންސާނީ ހައްގުތަކުގެ ނަމުގައި ހުޅަނގުން ދައްކާ ދަޅަތަކަކީ ފުލޯކެއްކަން ހާމަވުން ހިމެނެއެވެ. އަދި އެމެރިކާއާއި ޔޫރަޕުން ޔަހޫދީ ޓެރަރިޒަމް ސްޕޮންސާ ކުރާ މިންވަރު ވެސް މުޅި ދުނިޔެއަށް ހާމަވެގެން ދިޔައެވެ.
ޣައްޒާގެ ގަތުލުއާންމުތަކާއެކު އީރާނުން ދެ ފަހަރެއްގެ މަތިން އިސްރާއީލަށް ހަމަލާދީފައިވާއިރު އީރާނުގެ އަސްކަރީ ގާބިލުކަމާއި ޖެހިލުން ކުޑަކަން ވެސް ވަނީ ހާމަވެފައެވެ. އަދި ހަމާސް އާއި ހިޒްބުﷲ ފަދަ މުޖާހިދުންގެ ޖަމާއަތްތައް ބަލިކުރުމުގެ ގާބިލުކަން އިސްރާއީލުގެ ކިބާގައި ނެތްކަން ވެސް ވަނީ ހާމަވެފައެވެ.
އީރާން ދެފަހަރުމަތިން އިސްރާއީލަށް ދިން ހަމަލާތަކުގެ ރައްދުގައި ވެސް އީރާނުގެ ނިއުކްލިޔާ މަރުކަޒުތައް ފަދަ ހައްސާސް އެއްވެސް ތަނަކަށް ހަމަލާދޭން އިސްރާއީލަށް ކެރިފައެއް ނުވެއެވެ. އަދި އިސްރާއީލަކީ ހޫޘީން ފަދަ ޖަމާއަތްތަކުން ދޭ ހަމަލާތައް ވެސް އަރާ ގައުމެއްކަމާއި އާންމުން މެރުން ފިޔަވައި އެހެންކަމަކުން އިސްރާއީލަށް ކުރި ނުލިބޭކަން ވެސް ވަނީ ހާމަވެގެން ގޮސްފައެވެ.
މި ހަގީގަތްތަކާއެކު މުޅި މެދުއިރުމަތީގެ އަސްކަރީ ހަގީގަތްތައް ވެސްވަނީ ބަދަލުވެފައެވެ. އަދި މެދުއިރުމަތީގެ އަސްކަރީ ހަގީގަތްތައް އޮތީ އެމެރިކާއާއި އިސްރާއީލު ދަޅަދައްކައި ހުޅަނގުގެ މީޑިއާ ތަކުން ޕްރޮޕަގެންޑާ ކުރި ގޮތަށް ނޫންކަން ވެސް ވަނީ ހާމަވެފައެވެ.
އީރާނާ އަސްކަރީ ގޮތުން ގާތްވުމަށް ސައޫދީ ނިންމި ސަބަބުތަކުގެ ތެރޭގައި މި ހަގީގަތްތައް ހިމެނޭކަމަށް އަލްޖަޒީރާގައި ވާހަކަ ދެއްކެވި މުހައްލިލުން ވިދާޅުވިއެވެ.