އެމެރިކާގެ ރިޔާސީ އިންތިޚާބުގައި ޑޮނަލްޑް ޓްރަމްޕް ހޯދިކާމިޔާބާއެކު، ބިޓްކޮއިންގެ އަގު އާ ރެކޯޑަކަށް އަރައިފިއެވެ. މިއަދު ހެނދުނު ބިޓްކޮއިންގެ އަގު 82,413 ޑޮލަރަށް އަރާފައިވާއިރު، މިއީ މިހާތަނަށް ފެނިފައިވާ އެންމެ މަތީ އަގެވެ.
ކްރިޕްޓޯ ކަރަންސީތަކަށް ފަހި ސިޔާސަތުތަކެއް ގެންގުޅުއްވާނެ ކަމަށް ޓްރަމްޕް ވިދާޅުވެފައިވާތީ، އޭނާގެ ކާމިޔާބާއެކު ބިޓްކޮއިންގެ އަގަށް މިފަދަ ބޮޑު ކުރިއެރުމެއް އައިސްފައިވާ ކަމަށް މާހިރުން ދެކެއެވެ. އިންތިޚާބީ ކެމްޕޭނުގައި ޓްރަމްޕް ވަނީ އެމެރިކާ ކްރިޕްޓޯގެ ވެރިރަށަށް ހެއްދެވުމަށާއި، ޤައުމީ ފެންވަރެއްގައި ބިޓްކޮއިން ރައްކާކުރައްވާނެ ކަމަށް ވަޢުދުވެ ވަޑައިގެންފައެވެ.
ސިޓީ އިންޑެކްސްގެ ސީނިއަރ މާކެޓް އެނަލިސްޓް މެޓް ސިމްޕްސަން ވިދާޅުވި ގޮތުގައި ކޮންގްރެސްގެ ދެ މަޖިލީހުގައިވެސް ރިޕަބްލިކަނުން އަޣުލަބިއްޔަތު ހޯދުމާއެކު، ކްރިޕްޓޯ އިންވެސްޓަރުން އުއްމީދު ކުރަނީ ޑިޖިޓަލް ކަރަންސީތަކާ ގުޅޭ ޤަވާއިދުތައް ލުއިކުރެވޭނެ ކަމަށެވެ.
ކްރިޕްޓޯ އިންޑަސްޓްރީން ވަނީ 119 މިލިއަން ޑޮލަރަށްވުރެ ގިނަ އަދަދެއް ކްރިޕްޓޯއަށް ތާއީދުކުރާ ކޮންގްރެސް ކެންޑިޑޭޓުންނަށް ހޭދަކޮށްފައެވެ. މި ކެންޑިޑޭޓުންގެ ތެރެއިން ގިނަ ބަޔަކު ވަނީ އިންތިޚާބުގައި ކާމިޔާބު ހޯދާފައެވެ.
ނަމަވެސް، ޓްރަމްޕްގެ ކުރިމަތީގައި މިވަގުތު އިސްކަންދޭންޖެހޭ އެހެން ކަންކަން ހުރުމާއެކު، ކްރިޕްޓޯއާ ގުޅޭ ބަދަލުތައް ގެނައުމަށް ވަގުތު ނަގާފާނެ ކަމަށް ސިމްޕްސަން ވިދާޅުވިއެވެ.
އެހެންނަމަވެސް، ސެކިއުރިޓީސް އެންޑް އެކްސްޗޭންޖް ކޮމިޝަންގެ ޗެއަރ ގެރީ ގެންސްލަރ ވަޒީފާއިން ވަކިކުރައްވާނެ ކަމަށް ޓްރަމްޕް ވިދާޅުވެފައިވާތީ، ކްރިޕްޓޯ އިންވެސްޓަރުން އުފާވެފައިވާ ކަމަށް ބެލެވެއެވެ.