ޗެޓްޖީޕީޓީ ބޭނުންކޮށްގެން އުފައްދަން އުޅުނު 250،000 ޑީޕްފޭކް ރިކުއެސްޓް ބޭރުކޮށްލައިފައިވާނެ ކަމަށް އެ ކުންފުނިން ހާމަކޮށްފިއެވެ.
އެ ކުންފުނިން ބުނީ އޯޕަން އޭއައިގެ ޑާލް-އީ އިމޭޖް ޖެނެރޭޓަރު ބޭނުންކޮށްގެން އެމެރިކާގެ ރިޔާސީ އިންތިޚާބާ ގުޅިގެން ސިޔާސީ ލީޑަރުންގެ ސިފަ ހިމެނޭ ގޮތަށް ފޭކް ފޮޓޯ އުފައްދައިގެން ނުބައި މަޢުލޫމާތު ފެތުރުމަށް ގިނަ ބަޔަކު މަސައްކަތްކުރި ނަމަވެސް، އެކަން ހުއްޓުވުމަށް ކުންފުނިން ކާމިޔާބުކަމާ އެކު މަސައްކަތްކޮށްފައިވާނެ ކަމަށެވެ.
އޯޕަން އޭއައިގެ އާ ރިޕޯޓެއްގައި ބުނެފައިވާ ގޮތުގައި، ޗެޓްޖީޕީޓީން ރައީސް ޖޯ ބައިޑަން، އިންތިޚާބީ ރައިސް ޑޮނަލްޑް ޓްރަމްޕް، ނައިބު ރައީސް ކަމަލަ ހެރިސް، އިންތިޚާބީ ނައިބު ރައީސް ވާންސް އަދި ގަވަރުނަރު ވޯލްޒްގެ ސިފަ ހިމެނޭ ފޭކް ފޮޓޯ އުފެއްދުމަށް 250،000 އަށްވުރެ ގިނަ ރިކުއެސްޓް ދޫކޮށްނުލައި ހުއްޓުވާލާފައިވެއެވެ.
މިއީ ކުރިން ތަޢާރަފުކުރި ސަލާމަތީ ފިޔަވަޅެއްގެ ސަބަބުން ކާމިޔާބުކުރެވުނު ކަމެއް ކަމަށާއި، މި ފިޔަވަޅުގެ ދަށުން ސިޔާސީ ލީޑަރުން ހިމެނޭގޮތަށް ހަޤީޤީ މީހުންގެ ފޮޓޯ އުފެއްދުމަށް ޗެޓްޖީޕީޓީ އިންކާރުކުރާ ކަމަށް ކުންފުނިން ބުނެފައިވެއެވެ.
މި އަހަރުގެ ފެށުނު ހިސާބުން ފެށިގެން އެމެރިކާގެ ރިޔާސީ އިންތިޚާބަށް އޯޕަން އޭއައިން ވަނީ ތައްޔާރުވާން ފަށާފައެވެ. އޭގެ ތެރޭގައި ނުބައި މަޢުލޫމާތު ފެތުރުމަށް އެ ކުންފުނީގެ ޓޫލްތައް ބޭނުންކުރުން ހުއްޓުވުމަށް ސްޓްރެޓެޖީއެއް އެކުލަވާލުން ހިމެނެއެވެ. އިންތިޚާބުގެ ދުވަހާ ހަމައަށް މިލިއަނެއްހާ ޖަވާބުގައި މި ވެބްސައިޓަށް ޑައިރެކްޓްކޮށްފައިވާ ކަމަށް އޯޕަން އޭއައިން ބުނެފައިވެއެވެ.
މީގެ އިތުރުން، އިންތިޚާބުގެ ދުވަހާއި އޭގެ ޖެހިގެން އައި ދުވަހު، އިންތިޚާބުގެ ނަތީޖާއާ ގުޅޭ ގޮތުން އެސޯސިއޭޓެޑް ޕްރެސް، ރޮއިޓާސް އަދި އެހެނިހެން ނޫސްތަކުން ޗެކްކުރުމަށް އެންގުމަށް ދެ މިލިއަން ޖަވާބު ޗެޓްބޮޓުން ދީފައިވާނެ ކަމަށް ވެސް އޯޕަން އޭއައިން ބުނެފައިވެއެވެ.
ސުވާލުކުރި ނަމަވެސް، ވަކި ކެންޑިޑޭޓަކަށް ތާއީދުކުރުމަށް ނުވަތަ ސިޔާސީ ވިސްނުމެއް ފާޅުކުރުމަށް ޗެޓްޖީޕީޓީ އިންކާރުކުރާ ގޮތަށް ހަދާފައިވާ ކަމަށް ވެސް އޯޕަން އޭއައިން ބުނެފައިވެއެވެ.
އޯޕަން އޭއައިއަކީ އާޓިފިޝަލް އިންޓެލިޖެންސް ދާއިރާގައި ކުރިއަރަމުން އަންނަ ކުންފުންޏެކެވެ. މި ކުންފުނިން ތަރައްޤީކޮށްފައިވާ ޗެޓްޖީޕީޓީ އަދި ޑާލް-އީ ފަދަ ޓެކްނޮލޮޖީތަކަކީ ޓެކްސްޓް އަދި ފޮޓޯ އުފެއްދުމުގައި ބޭނުންކުރެވޭ ވަރަށް ފުރިހަމަ ޓޫލްތަކެކެވެ. ނަމަވެސް މި ޓެކްނޮލޮޖީތައް ނަހަމަ ގޮތުގައި ބޭނުންކޮށްގެން ދޮގު މަޢުލޫމާތު ފެތުރުމާއި، ޑީޕްފޭކް އުފެއްދުމުގެ ފުރުސަތު އޮތުމާ އެކު، އޯޕަން އޭއައިން ވަނީ މި ކަންކަން ހުއްޓުވުމަށް އެކި ފިޔަވަޅުތައް އަޅާފައެވެ.