މި ވެރިކަމަށް އެއް އަހަރު ވާން ގާތްވެފައިވާއިރު މި މުއްދަތުގެ ތެރޭގައި މަސައްކަތް ކުރެއްވީ އެ މަނިކުފާނުގެ ބައްޕާފުޅު ލިޔުއްވައިފައިވާ ފޮތުގައިވާ ކަންކަމަށް ތަބާވެ، "ރައްޔިތުންގެ ފަޅީގައި" ހުންނަވައިގެންކަމަށް މިރޭ ރައީސް ޑރ. މުޙައްމަދު މުއިއްޒު ވިދާޅުވެއްޖެއެވެ.
ޖުމްހޫރީ ދުވަހުގެ މުނާސަބާއާ ގުޅިގެން މިރޭ ބޭއްވި ރަސްމީ ޖަލްސާގައި އެ ރައީސް ވަނީ، އެ މަނިކުފާނުގެ ބައްޕާފުޅު މަރްހޫމު އައްޝައިޚް ހުސައިން އަބްދުއްރަހްމާން ލިޔުއްވި "ދައުލަތާއި ވެރީންނާއި މަސްއޫލިއްޔަތު އަދި ކިޔަމަންވުމުގެ މަފްހޫމް" ގެ އެކި ސަފްހާތަކުން އެކި ވާހަކަފުޅުތައް ވަނީ ހިއްސާކުރައްވައިފައެވެ.
"އަޅުގަނޑުގެ ބައްޕަ މި ފޮތް ލިޔުއްވީމައެއް ނޫން. އެހެންނަމަވެސް މި ފޮތް ބައްލަވައިފައިވާ، ކިޔުއްވައިފައިވާ ކޮންމެ ބޭފުޅަކު ވެސް ގަބޫލުފުޅުކުރައްވާނެ މި ފޮތަކީ ވެރިކަމާ ގުޅޭ ގޮތުން، ރައްޔިތުންނާ ވެރިންނާ އޮތް ގުޅުމާ ބެހޭ ގޮތުން މަސްއޫލިއްޔަތު ވެރިން އަދައިކުރަންޖެހޭ ގޮތާ ބެހޭގޮތުން، އިލްމީ ނަޒަރަކުން، ދީނީ ނަޒަރަކުން އިސްލާމީ ތާރީޚުގެ އަލީގައި އަދި ރާއްޖޭގެ ގާނޫނާއި ގާނޫނު އަސާސީއަށް ރިއާޔަތްކޮށް ވަރަށް އިލްމީ ގޮތެއްގައި، ވަރަށް ވަށައިޖެހޭ ގޮތަށް ލިޔުއްވައިފައިވާ ފޮތެއް،" ރައީސް ވިދާޅުވިއެވެ.
އެ މަނިކުފާނު ވިދާޅުވީ މި ފޮތުގައި، ވެރިޔަކު ހޮވައި، އެ ވެރިއަކު ޒިންމާތައް ރަނގަޅަށް އަދައިކުރޭތޯ ޔަގީންކުރުމަށް ބަލަންވީ ހުރިހާ ކަމެއް ބަޔާންކޮށްފައިވާ ކަމަށެވެ.
ޖުމްހޫރީ ދުވަހުގެ ރަސްމީ ޖަލްސާގައި ރައީސް ޑރ. މުއިއްޒު ވާހަކަފުޅުދައްކަވަނީ -- ފޮޓޯ: ރައީސް އޮފީސް
ބައްޕާފުޅުގެ ފޮތުގެ ޖުމްލައެއް ވިދާޅުވަމުން އެ މަނިކުފާނު ވިދާޅުވީ ވެރިކަން ކުރުމަކީ ލިބޭ މޮޅެއް ނޫންކަމަށެވެ. އެއީ ވެރިކަން ކުރާ މީހާއަށް ލިބޭ މުދާގަނޑެއް ވެސް ނޫންކަމަށެވެ. އެއީ ލިބޭ ވަރަށް ބޮޑު ޒިންމާއަކާއި އަމާނާތެއް ކަމަށް ވިދާޅުވިއެވެ.
އެއާއެކު އެ މަނިކުފާނު ވިދާޅުވީ އެ މަނިކުފާނު ގަބޫލުފުޅުކުރައްވަނީ އެ ފޮތުގައިވާ ހަމަތައް ކަމަށެވެ.
"އަޅުގަނޑު ގަބޫލުކުރަނީ އެ ގޮތް. އެގޮތުގެ މަތީން މަސައްކަތްކުރެވޭތޯ އަޅުގަނޑު މިދިޔަ އަހަރެއްހާ ދުވަހު މަސައްކަތް މި ކުރީ،" ރައީސް ވިދާޅުވިއެވެ.
އެ މަނިކުފާނު ވިދާޅުވީ މި ވެރިކަމަށްވީ އެއް އަހަރުގައި މަސައްކަތްކުރެއްވީ ރައްޔިތުންގެ ފަޅީގައި ހުންނަވައިގެން ކަމަށެވެ. އަދި މަސައްކަތް ކުރެއްވީ ރައްޔިތުން އެދޭ އަމާޒު ހާސިލްކުރައްވަން ކަމަށް ވިދާޅުވިއެވެ.
"އެހެންވެގެން ގިނަ ދުވަސްތަކެއް ވަންދެން އަތްނުލާ ހުރި ބޮޑެތި މައްސަލަތައް ހައްލުކުރެވޭތޯ އަޅުގަނޑު ބަލަމުން މި އަންނަނީ. ވަރަށް ގިނަ ކަންތައްތަކެއް ފަސޭހައަކަށް ޓަކައި، ކޮމްފޯޓް ޒޯންގައި ތިބުމަށް ޓަކައި މިދިޔަ ޒަމާންތަކުގައި އަޅައިނުލެވި ހުރި ގިނަ ކަންތައްތަކެއް އެބަހުރި،" ރައީސް ވިދާޅުވިއެވެ.
ޑުރަގްގެ މައްސަލަތަކާއި، ގޭންގު މާރާމާރީއާއި، ވޭޕު މަނާކުރުމާއި މެޑިކަލް މާފިއާއާއި ޑޮލަރުގެ ކަޅު ބާޒާރުގެ މައްސަލަ ހައްލުކުރަން މަސައްކަތް ފެއްްޓެވީ އެހެންވެކަމަށް ރައީސް ވިދާޅުވިއެވެ.
އެ މަނިކުފާނު ސިފަކުރެއްވި ގޮތުގައި މިއީ ބުރަ ބޮޑު މަސައްކަތްތަކެކެވެ. ނަމަވެސް ރައްޔިތުންގެ އެއްބާރުލުމާއެކު މި ކަންކަން ކުރިއަށް އޮތް މުއްދަތުގައި ހައްލުވާނެކަމަށް ރައީސް ވިދާޅުވިއެވެ.