ދުނިޔޭގެ އެންމެ އަގުބޮޑު ޓެކްނޮލޮޖީ ކުންފުނި ކަމުގައިވާ އެޕަލްގެ އާ ޓެކްނޮލޮޖީތަކުން ކުންފުނީގެ ފައިދާއަށް ނޭދެވޭ އަސަރުކޮށްފާނެކަމަށް ބުނެ އިންވެސްޓަރުންނަށް މުހިންމު އިންޒާރެއް ދީފިއެވެ.
އާ ޓެކްނޮލޮޖީތަކާއެކު އުފެއްދުންތެރިކަން އިތުރުކުރަމުންދާއިރު، އާޓިފިޝަލް އިންޓެލިޖެންސް (އޭއައި) އަދި ވާޗުއަލް ރިއަލިޓީ (ވީއާރު) ބޭނުންކޮށްގެން އުފައްދާ އުފެއްދުންތަކުން ލިބޭ ފައިދާ، އައިފޯނުން ލިބޭ ފައިދާއާ އެއްވަރު ނުވެދާނެކަމަށް އެޕަލްއިން ބުނެފައިވެއެވެ.
އެޕަލްއިން މި އިންޒާރު ދީފައިވަނީ ކުރިއަށް އޮތް އަހަރުތަކުގައި އެ ކުންފުނީގެ މާލީ ހާލަތަށް އަންނާނެ ބަދަލުތަކާ ގުޅޭގޮތުން ނެރުނު ބަޔާނެއްގައެވެ. އާ އުފެއްދުންތަކާއި ޚިދުމަތްތަކުގެ ސަބަބުން މިހާރު ލިބެމުންދާ އާމްދަނީއަށް ބަދަލު އަތުވެދާނެކަމަށް އެބަޔާނުގައި ބުނެފައިވެއެވެ. މިކަމުގެ ސަބަބުން ކުންފުނީގެ މުޅި ވިޔަފާރިއަށާއި، ހިންގުމަށާއި، މާލީ ދުޅަހެޔޮކަމަށް އަސަރުކުރުމަކީ އެކަށީގެންވާ ކަމެއް ކަމަށް އެޕަލްއިން ފާހަގަކޮށްފައިވެއެވެ.
އޭއައި ދާއިރާގައި ވާދަވެރިންނާ ވާދަކުރުމަށްޓަކައި އެޕަލްއިން ވަނީ މި ދާއިރާއަށް އިންވެސްޓްކުރަން ފަށާފައެވެ. މީގެ ތެރެއިން "އެޕަލް އިންޓެލިޖެންސް" ގެ ނަމުގައި އޭއައި ބޭނުންކޮށްގެން ތައްޔާރުކޮށްފައިވާ ފީޗާތަކެއް ވަނީ ފާއިތުވި ހަފުތާގައި ތަޢާރަފުކޮށްފައެވެ. ނަމަވެސް މި ފީޗާތަކުގެ ބޮޑު ބައެއް ބޭނުންކުރެވެން ފަށާނީ 2025ވަނަ އަހަރުގެ އޭޕްރީލް މަހުގައެވެ.
ކުރިއަށް އޮތްތަނުގައި އެޕަލްގެ އުފެއްދުންތަކުގައި އިތުރަށް އޭއައި ބޭނުންކުރުމަށް ވަނީ ރާވައިފައެވެ. މީގެ ތެރޭގައި ސިރީގައި އޯޕަންއޭއައިގެ ޗެޓްޖީޕީޓީ ޓެކްނޮލޮޖީ ބޭނުންކުރުން ހިމެނެއެވެ. މި އަޕްގްރޭޑާއެކު ސިރީ އާއި މުއާމަލާތްކުރުން ފަސޭހަވެ، އިތުރަށް ރެސްޕޮންސިވްވާނެކަމަށް ބެލެވެއެވެ.
އެހެންނަމަވެސް، އެޕަލްގެ ވީއާރު މަސައްކަތްތައް ދަނީ ގޮންޖެހުންތަކާ ކުރިމަތިލަމުންނެވެ. 3,500 ޑޮލަރުގެ އަގުގައި ވިއްކަމުންދާ އެޕަލްގެ ހައި އެންޑް ވީއާރު ހެޑްސެޓް ކަމުގައިވާ ވިޝަން ޕްރޯ، މި އަހަރުގެ ނިޔަލަށް އުވާލަން ޖެހިދާނެކަމަށް ރިޕޯޓުތަކުން ދައްކައެވެ. މި އުފެއްދުމުގެ އަގުބޮޑުކަމުގެ ސަބަބުން މާކެޓުގައި މިއުފެއްދުމަށް ޝައުގުވެރިކަން ކުޑަވެ، ވިއްކުން ދަށްވެފައިވާކަމަށް ބެލެވެއެވެ.
އޭއައި އަދި ވީއާރު އާ ހަރުފަތްތަކަށް އަރަމުންދާއިރު، މާލީ އަދި ހިންގުމުގެ ރިސްކުތަކާ މެދު އެޕަލްއިން ވިސްނަމުންދާކަން ފާހަގަކުރެވެއެވެ.
އައިފޯނުން އެއްކިބާވެ، އާ އުފެއްދުންތެރިކަމާއި ފައިދާ އެއްހަމައެއްގައި ގެންދިއުމަކީ ކުންފުންޏަށް ކުރިމަތިވެފައިވާ ގޮންޖެހުމެކެވެ. މި އާ ގޮންޖެހުންތަކާއި ފުރުސަތުތަކާ އެޕަލްއިން ކުރިމަތިލާނެ ގޮތަކަށް އިންވެސްޓަރުންނާއި ކަސްޓަމަރުން ބަލަމުންދާނެއެވެ.