ކ. ހުރާގައި ދިރިއުޅެމުން އަންނަނިކޮށް ނިޔާވި، އަނބިމީހާ އައިޝަތު ޝިފާގެ ހަނދާނުގައި އޭނާގެ ފިރިމީހާ މުޙައްމަދު ޝާހިދު އެ ރަށު ސުކޫލުގައި މިސްކިތެއް އިމާރާތްކޮށްދީފިއެވެ.
ހުރާ ސުކޫލުން ކޮށްފައިވާ ޕޯސްޓެއްގައި ބުނީ، އެ ސުކޫލުގެ މުވައްޒަފުންނާއި ދަރިވަރުންނާއި ޒިޔާރަތްކުރާ ފަރާތްތައް ނަމާދުކުރުމަށް 'މަސްޖިދުއް ޝިފާ'ގެ ނަމުގައި މިސްކިތެއް ގާއިމުކޮށްދީފައިވާ ކަމަށެވެ. އެހެންވެ، އެ ސުކޫލުގެ ފަރާތުން ޝާހިދަށް ވަނީ ޝުކުރު އަދާކޮށްފައެވެ.
ޝާހިދު 'ސަން'އަށް ކިޔައިދިން ގޮތުގައި، އުމުރުން 25 އަހަރުގައި އޭނާގެ އަނބިމީހާ ނިޔާވީ އުމްރާއަށް ދާން ފައިސާ ދައްކާފައި އޮތްވައި ކަމަށެވެ.
މަސްޖިދުއް ޝިފާގައި ދަރިވަރުންތަކެއް ކިޔަވަނީ: ނިޔާވި އަނބިމީހާގެ ހަނދާނުގައި ޝާހިދު އިމާރާތް ކުރީ މިސްކިތެއް --- ފޮޓޯ/ ހުރާ ސްކޫލް
އެގޮތުން، އެ މިސްކިތް އެޅީ އަނބިމިހާއަށް އަބަދުވެސް ސަވާބާއި ދަރުމަ ލިބި، ލިބި ހުންނާނެ ކަމެއް ކޮށްދިނުމުގެ މަގުސަދުގައި ކަމަށް ޝާހިދު ބުންޏެވެ. ސުކޫލު އެޅީ، ހަމައެކަނި ނަމާދު ކުރުމަށް ބޭނުން ކުރެވޭ ގޮތަށް ނޫން ކަމަށާއި ގުރުއާން ކުލާސްތައް ވެސް ނެގޭ ގޮތަށް ކަމަށް ޝާހިދު ބުންޏެވެ.
"އަޅުގަނޑު ވިސްނާފައި ހަމަ އެންމެ ފުރަތަމަ ސިކުނޑިއަށް އައީ މިކަން ކޮށްފިއްޔާ ސުކޫލުގައި ބޭނުންކުރެވޭ ކަހަލަ ގޮތަކަށް. ދެން ހަމަ އަޅުގަނޑު އެ ގޮތަށް ވިސްނާފައި ހެދި އެއްޗެއް އެއީ. އަޅުގަނޑު ވަރަށް ލޯބިވާ މީހެއް އަންހެނުންނަކީ" ޝާހިދު ކިޔައިދިނެވެ.
ޝާހިދު ބުނި ގޮތުގައި، ޝިފާ ނިޔާވީ ސިކުނޑީގައި އުފެދުން ޓިއުމަރެއްގެ ސަބަބުންނެވެ. ނަމަވެސް، އެކަން އެމީހުންނަށް އެނގުނީ ޝިފާ ނިޔާވުމުގެ ހަފުތާއެއް ފަހުންނެވެ.
އެފަދަ ކުއްލި މަރެއްގައި ލޯބިވާ އަނބިމީހާ ވަކިވިއިރު، އެ ކައިވެންޏަށް ހަ އަަހަރާއި ހަތަރު އަހަރުގެ ކުއްޖަކު ލިބިފައިވެއެވެ.