ގައުމީ ޔުނިވާސިޓީ (އެމްއެންޔޫ)ގެ އަންނަ އަހަރުގެ ފެބްރުއަރީ އިންޓޭކަށް އެޕްލިކޭޝަން ހުށަހަޅަން މިއަދު ހުޅުވާލައިފިއެވެ.
އެ ޔުނިވާސިޓީން ބުނި ގޮތުގައި، އެ ކޯސްތަކަށް ވަނުމަށް ފުރުސަތު ހުޅުވައިލާފައި އޮންނާނީ އަންނަ ޖެނުއަރީ ތިން ވަނަ ދުވަހުގެ މެންދުރު 14:00އާ ހަމައަށެވެ.
އެގޮތުން، އެ އިންޓޭކަށް އެޕްލިކޭޝަން ހުށަހެޅުމަށް ހުޅުވާލާފައިވާ ބައެއް ކޯސްތަކުގެ ތެރޭގައި އެޑްވާންސް ސެޓްފިކެޓް އިން އިފޮމޭޝަން ޓެކްނޮލިޖީއާއި މާސްޓާ އޮސް ނާސިންއާއި ސެޓްފިކެޓް ލެވެލް އިން ނާސިންއާއި ސެޓްފިކެޓް ތްރީ އިން ވެލްޑިން އެންޑް ޝީޓް މެޑަލް ހިމެނެއެވެ.
މި ކޯސްތަކުގެ އިތުރުން ވެސް އެހެން ކޯސްތަކަށް ކުރިމަތިލާން ހުޅުވާލަފައިވެއެވެ. އެ ކޯސްތަކުގެ މައުލޫމާތު އެމްއެންޔޫގެ ވެބްސައިޓު މެދުވެރިކޮށް ބަލާލެވޭނެ ކަމަށް އެމްއެންޔޫއިން ބުނެފައިވެއެވެ.
އެގޮތުން، ޖާގަ ހުރި ކޯސްތަކުގެ ލިސްޓަށް ބަދަލު އަންނަ މިންވަރަކުން އެ ވެބްސައިޓުގައި ހާމަކުރަމުންދާނެ ކަމަށް އެ ޔުނިވާސިޓީން ބުނެފައިވެއެވެ.
މި ކޯސްތަކަށް އެޕްލައި ކުރެވޭނީ ޕޯޓަލް މެދުވެރިކޮށް، އޮންލައިކޮށެވެ. އޭގެއިތުރުން، ކޯސްތަކާ ގުޅުން ހުރި އިތުރު މައުލޫމާތު އެމްއެންޔޫގެ މެއިލްއަށް މެއިލް ކޮށްގެންނާއި 1445 އަށް ގުޅައިގެން ލިބޭނެއެވެ.