ޚާރިޖީ ދާއިރާގައި 42 އަހަރަށްވުރެ ދިގު މުއްދަތަކަށް ޚިދުމަތް ކުރައްވާފައިވާ ފޮރިން މިނިސްޓްރީގެ ކުރީގެ ސްޓޭޓް މިނިސްޓަރު އަހުމަދު ޚަލީލަށް ޖަޕާނުގެ ސަރުކާރުން ދޭ "އޯޑާ އޮފް ދަ ރައިޒިން ސަން"ގެ ޝަރަފު އަރުވައިފިއެވެ.
އެއީ ޖަޕާނަށް ޝަރަފުވެރި ޚިދުމަތެއް ކޮށްދީފައިވާ ބޭފުޅުންނަށް ދޭ އެންމެ މަތީ އެއް ޝަރަފުގެ ގޮތުގައި އެ ގައުމުގެ ރަސްގެފާނުގެ ފަރާތުން ދެއްވާ ޝަރަފެކެވެ.
މިއީ ޖަޕާނާއި ރާއްޖެއާ ދެމެދު އޮތް ގުޅުން ވަރުގަދަ ކުރުމަށް އޭނާ ކޮށްދެއްވާފައިވާ ޚިދުމަތަށް އެރުވި ޝަރަފެކެވެ.
މި ކަމާ ގުޅިގެން ކުރީގެ ރައީސް އިބްރާހީމް މުހައްމަދު ސާލިހު އެކްސްގައި ވިދާޅުވީ ޖަޕާނުގެ ރަސްގެފާނު އަރުވާ އެންމެ މަތީ އެއް ޝަރަފު ޚަލީލަށް ލިބިވަޑައިގަތުމުން އެ ކަން ފާހަގަ ކުރައްވައިފައެވެ.
ކުރީގެ ފޮރިން މިނިސްޓަރު އަބްދުﷲ ޝާހިދު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ ޚަލީލަށް ޖަޕާނުގެ "އޯޑާ އޮފް ދަ ރައިޒިން ސަން" ލިބިވަޑައިގަތުމުން އެ ކަމާ އިންތިހާއަށް އުފާކުރައްވާ ކަމަށް ވިދާޅުވެފައެވެ.
ޚަލީލަކީ މި ސަރަހައްދުގެ އެންމެ ތަޖުރިބާކާރު އަދި އެންމެ ކުޅަދާނަ އެއް ޑިޕްލޮމެޓު ކަމަށާއި، އޭނާއަކީ ޒުވާން ފޮރިން ސާވިސް އޮފިސަރުންނަށް ނަމޫމާއެއް ކަމަށް ޝާހިދު ވިދާޅުވެފައިވެއެވެ.
އަޙުމަދު ޚަލީލަކީ ރާއްޖެއާއި ޖަޕާނާ ދެމެދު ޚާރިޖީ ގުޅުން ގާއިމް ކުރުމުގައި ވަރަށް މުހިންމު ދައުރެއް އަދާ ކުރެއްވި ބޭފުޅެކެވެ.
މިދިޔަ ސަރުކާރުގައި އޭނާއަށް ވަނީ ޚާރިޖީ ޚިދުމަތުގެ އެންމެ މަތީ ޝަރަފު ވެސް އަރުވައިފައެވެ.
ޚަލީލް ޚާރިޖީ ދާއިރާގައި ޚިދުމަތް ކުރައްވަމުން ގެންދަވާތާ މިހާރު 42 އަހަރަށްވުރެ ދިގު މުއްދަތެއް ވެފައިވާއިރު، މެދުކެނޑުމެއްނެތި މި ދާއިރާގެ އެންމެ އާދައިގެ މަގާމުތަކުން ފެށިގެން އެންމެމަތީ ފަންތީގެ ގިނަ މަގާމުތަކުގައި ހުންނަވައިގެން، ގިނަގުނަ ޚިދުމަތްތަކެއް، ދިގު މުއްދަތެއްގައި ކޮށްދެއްވާފައިވާ މަދު ބޭފުޅުންގެ ތެރޭގައި އޭނާ ހިމެނި ވަޑައިގަންނަވައެވެ.
އަޙްމަދު ޚަލީލް ރާއްޖޭގެ ޚާރިޖީ ދާއިރާގެ ޚިދުމަތާ ގުޅިވަޑައިގަތީ، 22 ޑިސެންބަރު 1981ގައެވެ. އެ ބޭފުޅާ ފުރަތަމަ އަދާކުރެއްވީ، ޑިޕާޓްމަންޓް އޮފް އިމިގްރޭޝަން އެންޑް އެމިގްރޭޝަންގެ އިނގިރޭސި ސެކްރެޓެރީގެ ވަޒީފާއެވެ. ޚަލީލް، ޚާރިޖީ ދާއިރާގައި އެންމެ ގިނަ ދުވަހު ޚިދުމަތް ކުރެއްވީ، އދ. ގައި ހުންނަ ދިވެހިރާއްޖޭގެ ދާއިމީ މިޝަންގައެވެ. މިގޮތުން، ނިއުޔޯކްގެ ދާއިމީ މިޝަންގައި 17 އަހަރަށްވުރެ ދިގު މުއްދަތެއްގައި އަޙްމަދު ޚަލީލް ވަނީ ޚިދުމަތް ކުރައްވާފައެވެ.
އަދި، ރާއްޖެއިން ޖަޕާނަށް ކަނޑައަޅުއްވާފައި ހުންނަވާ ސަފީރު ކަމުގެ މަގާމު ވެސް ހަތް އަހަރު ދުވަހު ފުރުއްވާފައިވެއެވެ. އޭގެފަހުން، މިނިސްޓްރީ އޮފް ފޮރިން އެފެއާޒްގެ ސެކްރެޓެރީ، ބައިލެޓްރަލްގެ މަގާމާއި ފޮރިން މިނިސްޓްރީގެ ސްޓޭޓްގެ މަގާމު ވެސް އަދާ ކުރައްވާފައިވެއެވެ. އެބޭފުޅާ ވަނީ ފާހަގަކޮށްލެވޭ މުހިންމު ގިނަ މަސައްކަތްތަކެއް ކުރައްވައި، ގިނަ ކާމިޔާބީތަކެއް ރާއްޖެއަށް ހޯއްދަވައި ދެއްވާފައެވެ.