ކުރީގެ ރައީސް އަބްދުﷲ ޔާމީން އަބްދުލްގައްޔޫމް ފަތުރުވެރިކަމަށް ވ. އާރަށް ކުއްޔަށް ދޫކުރުމުގެ މައްސަލައިގައި ދައުލަތުން ސުޕްރީމް ކޯޓަށް ހުށަހެޅި މައްސަލަ ބަލަން އެ ކޯޓުން ތާވަލުކޮށްފިއެވެ.
ސުޕްރީމް ކޯޓުގެ ތާވަލުގައިވާ ގޮތުން، އެ މައްސަލައިގެ ޝަރީއަތް އެ ކޯޓުން ތަވާލުކޮށްފައި ވަނީ މިމަހުގެ 20ވަނަ ދުވަހުގެ ހެނދުނު 9:00އަށެވެ.
އެ މައްސަލަ ބައްލަވާނީ ތިން ފަނޑިޔާރުންނެވެ. އެއީ ފަނޑިޔާރު އައިޝާ ޝުޖޫން މުހައްމަދާއި ފަނޑިޔާރު ޑރ. އަޒްމިރަލްދާ ޒާހިރުގެ އިތުރުން ފަނޑިޔާރު ޑރ. މުހައްމަދު އިބްރާހިމެވެ.
އެ މައްސަލައިގައި ދައުލަތުން ސުޕްރީމް ކޯޓުގައި އެދުނީ އެ ހެކިތަކާ ގުޅޭ ގޮތުން ދެ ފަރާތުން ބަހުސްކޮށް، ހެކިތައް ބަލައިގަތުމާ މެދު ދަށު ކޯޓުން އަލުން ގޮތެއް ކަނޑައަޅަން އަންގައިދިނުމަށެވެ.
ދިވެހި ރާއްޖޭގެ ސުޕްރީމް ކޯޓް: އާރަށު މައްސަލަ: ދައުލަތުން ހުށަހެޅި އާ ހެކިތަކުގެ މައްސަލަ ބަލަން ސުޕްރީމް ކޯޓުގައި ތާވަލުކޮށްފި -- ސަން ފޮޓޯ/ ފަޔާޒު މޫސާ
އެގޮތުން، އެ މައްސަލަ ސުޕްރީމް ކޯޓުން ބަލައިގަނެފައި އޮތްވައި، ކްރިމިނަލް ކޯޓުން މިދިޔަ ސެޕްޓެމްބަރު 16ގައި ވަނީ އަޑުއެހުމެއް ބާއްވާފައެވެ.
ނަމަވެސް، ޔާމީންގެ ފަރާތްޕުޅުން ވަނީ މި މައްސަލައިގައި ހިމެނޭ ހެކީގެ މައްސަލަ ސުޕްރީމް ކޯޓުގައި އޮއްވައި ޝަރީއަތުގެ ކުރިން ހުށަހަޅާ ހުށަހެޅުންތަކާ ގުޅޭ ގޮތުން ގޮތެއް ނިންމުމަކީ ފުށުއަރާ ކަމެއްގެ ގޮތުގައި ފާހަގަކޮށްފައެވެ.
އެހެންވެ، ދަށު ކޯޓުގައި މި މައްސަލަ ބައްލަވާ ގާޒީ އަލީ ނަދީމް ވަނީ އެދުވަހުގެ އަޑުއެހުން ނިންމާލައިފައެވެ. މައްސަލައިގެ އަޑުއެހުމެއް ދެން ބާއްވާނީ މި މައްސަލައިގައި ހިމެނޭ ހެކީގެ މައްސަލަ ސުޕްރީމް ކޯޓުން ނިންމުމުން ކަމަށް ގާޒީ އޭރު ވިދާޅުވިއެވެ.
ސުޕްރީމް ކޯޓުން މި މައްސަލައިގައި ގޮތެއް ނިންމަން ދެން ދަށު ކޯޓުގެ ޝަރީއަތް ވަނީ މަޑުޖައްސާލައިފައެވެ.