ބޭންކް އޮފް މޯލްޑިވްސް (ބީއެމްއެލް)އިން ވިޔަފާރިތަކަށް ޚާއްސަ ޕްރިޕެއިޑް މާސްޓާކާޑެއް ތައާރަފުކޮށްފިއެވެ.
ހޮޓެލް ޖެންގައި މިއަދު ބޭއްވި ހަފުލާއެއްގައި ބީއެމްއެލްއިން ބުނީ މި ކާޑާއެކު، ކުދި ވިޔަފާރިތަކުން ފެށިގެން ބޮޑެތި ވިޔަފާރިތަކުން ވެސް ކުރާ މުއާމަލާތްތަކުގައި ނަގުދު ފައިސާގެ ބަދަލުގައި މާސްޓަކާޑް ޕްރީޕެއިޑް ކާޑު ބޭނުންކޮށްގެން މުއާމަލާތްތަކުގެ ތަފުސީލް ރައްކާތެރިކަމާއެކު ބެލެހެއްޓި، ނަގުދު ފައިސާއާ ނުލައި ވިޔަފާރިއާ ގުޅޭ ޚަރަދު ކުރުމަށް މަގުފަހިވާނެ ކަމަށެވެ.
ބީއެމްއެލް ބިޒްނަސް ޕްރީޕެއިޑް ކާޑުގެ ރުފިޔާ ކާޑާއި ޑޮލަރު ކާޑު ވެސް ލިބޭނެއެވެ. އެގޮތުން އެ ދެ ބާވަތުގެ ކާޑުން ވެސް ރާއްޖޭގެ ޕީއޯއެސް، ޕޭމަންޓް ގޭޓްވޭ އަދި އޭޓީއެމްތަކުގައި މުއާމަލާތު ކުރެވޭނެ ކަމަށް ބީއެމްއެލްއިން ބުންޏެވެ. އަދި ޑޮލަރު ކާޑުން ބޭރު ގައުމުތަކުގެ ޕީއޯއެސް މެޝިނާއި ޕޭމެންޓް ގޭޓްވޭތަކުގައި ބޭނުން ކުރެވޭނެއެވެ.
އެ ކާޑުތަކުން ދުވާލަކު އެއް ލައްކަ ދިވެހި ރުފިޔާ އަދި 50،000 ޑޮލަރުގެ މުއާމަލާތް ކުރެވޭނެއެވެ. އަދި ދެ ލައްކަ ރުފިޔާ ނުވަތަ 50،000 ޑޮލަރު ކާޑަށް ރީލޯޑް ކުރެވޭނެއެވެ. ކާޑުތަކުން ކޮށްފައިވާ މުއާމަލާތްތަކުގެ ތަފުސީލް އަދި ބެލެންސް އިިންޓަނެޓް ބޭންކިން އަދި މޯބައިލް އެޕް މެދުވެރިކޮށް ބެލޭނެއެވެ.
މި ޚިދުމަތާ ގުޅޭ ގޮތުން ބީއެމްއެލްގެ ސީއީއޯ އަދި މެނޭޖިން ޑިރެކްޓަރު މުޙައްމަދު ޝަރީފް ވިދާޅުވީ މާސްޓަކާޑާއެކު ވިޔަފާރިތަކަށް ޑިޖިޓަލް ބޭންކިން ސޮލިއުޝަނެއް ހޯދައިދެވޭކަމީ ލިބޭ ވަރަށް ބޮޑު އުފަލެއް ކަމަށެވެ.
"މި ތައާރަފު ކުރެވުނު ބިޒްނަސް ޕްރީޕެއިޑް މާސްޓަކާޑަކީ ވިޔަފާރިތަކަށް އެހީތެރިވުމުގެ އިތުރުން ވިޔަފާރިތަކުން ބޭނުންވާ ފަދަ ޒަމާނީ ޚިދުމަތްތައް ދިނުމަށް އެޅުނު މުހިންމު ފިޔަވަޅެއްވެސްމެ،" އޭނާ ވިދާޅުވިއެވެ.
ބީއެމްއެލްގެ ބޭންކިން ވިއުގައިގައި 20 އަތޮޅުގައި 39 ބްރާންޗް، 93 ސެލްފްސާވިސް ބޭންކިން ސެންޓަރު، 148 އޭޓީއެމް، އޭޖެންޓް ބޭންކިން ޚިދުމަތުގެ އިތުރުން އެންމެ ޒަމާނީ އޮންލައިން ބޭންކިން ޚިދުމަތް ހިމެނެއެވެ.