ރާއްޖެއަށް ވިޔަފާރީގެ ބޭނުމަށް ބުޅާ އެތެރެކުރުން، ވަކި މުއްދަތަކަށް މަނާކުރާން ނިންމާފައިވާ ކަމަށް ދަނޑުވެރިކަމާއި ދިރޭތަކެއްޗާ ބެހޭ ވަޒީރު ޑރ. އާއިޝަތު ރަމީލާ ވިދާޅުވެއްޖެއެވެ.
ދައުލަތުގެ މީޑިއާގެ ރާއްޖެ މިއަދު ޕްރޮގްރާމުގައި ވާހަކަދައްކަވަމުން، މިނިސްޓަރު ރަމީލާ ވިދާޅުވީ، ޖަނާވަރުންގެ ރައްކާތެރިކަމާ ބެހޭ ބިލު މުރާޖާކުރުމަށް ފަހު އެޓާނީ ޖެނެރަލް (އޭޖީ) އޮފީހަށް ފޮނުވާފައިވާ ކަމަށާއި އެ ބިލުގައި އޮޅުކޮށްގެން ގެންގުޅޭ ޖަނާވާރުތައް ރާއްޖެއަށް އެތެރެކުރުން ކޮންޓްރޯލްޑް މެކޭނިޒަމެއްގެ ތެރެއަށް ފައްތާނެ ގޮތް އޮންނާނެ ކަމަށެވެ.
މިދިޔަ ހޮނިހިރު ދުވަހު ހުޅުމާލޭ ދެވަނަ ފިޔަވަހީގައި ހުޅުވި، 'އޮޅު ހިޔާ'އަށް ހުރިހާ ބުޅާތަކެއް ނެގުމުން، އެތަނުގައި ގެންގުޅޭ ބުޅާތައް އެޑޮޕްޓުކުރަން އާންމުންނަށް ހުޅުވާލާނެ ކަމަށް ރަމީލާ ވިދާޅުވިއެވެ. އެކަމަށް ފުރުސަތު ހުޅުވާލާ މުއްދަތުގައި ވިއްކުމަށް ގެންނަ ބުޅާތައް އެތެރެކުރުން ވަގުތީ ގޮތުން މަނާކުރަން މިނިސްޓްރީގެ މިހާރުގެ ޕްލޭންގައި ހިމަނައިފައިވާ ކަމަށް ރަމީލާ ވިދާޅުވިއެވެ.
އޮޅު ހިޔާ ހުޅުވުމުގެ ރަސްމިއްޔާތުގެ ތެރެއިން މިނިސްޓަރު ރަމީލާ އާއި ރައީސް މުއިއްޒާއި ނައިބު ރައީސް ---- ފޮޓޯ/ ރައީސް އޮފީސް
އޭރުން ބުޅާ، ޕެޓްގެ ގޮތުގައި ނަގާނީ ފެސިލިޓީން. އެކަމަކު އަމިއްލަ ފަރާތަކުން ޕެޓްގެ ގޮތުގައި ގެނައުން މައްސަލައެއް ނޫން. އެކަމަކު ވިއްކުމަށް ބުޅާ އެތެރެކުރުން ކޮންމެވެސް ވަރަކަށް ހޯލްޑް ކުރާނަންދަނޑުވެރިކަމާއި ދިރޭތަކެއްޗާ ބެހޭ ވަޒީރު ޑރ. އާއިޝަތު ރަމިލާ
އޭގެއިތުރުން، ބުޅާ ފެސިލިޓީއަކީ ވަގުތީ ތަނެއް ކަމަށާއި ބުޅާތަކަށް ހަތަރު ފަންގިފިލާގެ ދާއިމީ އިމާރާތެއް އެޅުމުގެ މަސައްކަތް އަންނަ އަހަރު ފަށާނެ ކަމަށް އޭނާ ވިދާޅުވިއެވެ. އެކަމަށް ފިނޭންސް މިނިސްޓްރީގެ ހުއްދަ ވެސް ލިބިފައިވާ ކަމަށާއި އޮޅުކޮށްގެން ބުޅާ ގެންގުޅޭ ބަޔަކު، ތަނަކަށް ދާން ޖެހޭ ހަލާތްތަކުގައި އެނބުރި އެތަނަކުން އަންނަންދެން ބުޅާތައް އެ އިމާރާތުގައި ބަލަހައްޓައިދޭނެ ކަމަށް ރަމީލާ ވިދާޅުވެފައިވެއެވެ.
އިތުރަށް ވާހަކަދައްކަވަމުން ރަމީލާ ވިދާޅުވީ، މި ހަފުތާގައި ފުރަތަމަ ބެޗުގެ ބުޅާތައް ފެސިލިޓީއަށް ގެންދަން ފަށާނެ ކަމަށާއި މާލެ ސަރަހައްދުގައި 4،000އަށް ވުރެ ގިނަ ބުޅާ އުޅޭކަން ފާހަގަކުރެވިފައިވާ ކަމަށެވެ.
އޮޅު ހިޔާ ހުޅުވުމުގެ ރަސްމިއްޔާތުގެ ތެރެއިން --- ފޮޓޯ/ ރައީސް އޮފީސް
އެގޮތުން، އެ ބުޅާތަކުގެ ހާލަތު ތަފާތު ކަމަށްވާއިރު، އެއްފަހަރާ ހުރިހާ ބުޅާތައް ނެގުމަކީ ރައްކާތެރި ކަމެއް ނޫން ކަމަށް އޭނާ ވިދާޅުވިއެވެ. އަދި، އެކަން ކުރާނީ ބެޗުތަކަކަށް ބަހާލައިގެން ކަމަށްވާއިރު، ފެސިލިޓީތަށް ގެންދިޔުމަށް ފަހު އެބުޅާތައް އެތަނުގައި ރަޖިސްޓްރީ ކުރާނެ ކަން މިނިސްޓަރު ވަނީ ފާހަގަކުރައްވާފައެވެ.
އެއަށްފަހު، ބުޅާތަކަށް ސިއްޙީ ގޮތުން ދިމާވެފައި ހުރި މައްސަލަތައް ދެނެގަންނައިރު، އާބާދީ އިތުރުވިޔަ ނުދިނުމަށް ނުވިހާ އޮޕަރޭޝަން ކުރުމަށް ވެސް ނިންމާފައިވާ ކަމަށް މިނިސްޓަރު ވަނީ ވިދާޅުވެފައެވެ.
ރަމީލާ ވިދާޅުވި ގޮތުގައި، ބުޅާތައް ފެސިލިޓީއަށް ގެންދިޔުމުގައި އަމަލުކުރާނެ ޚާއްސަ ޕްލޭނެއް ވަނީ ހަދާފައެވެ.