ލޮލުގެ ފަރުވާއަށް ބޭނުންކުރާ އަގުބޮޑު އިންޖެކްޝަނެއް، އަމިއްލަ ކުންފުންޏަކުން 500 ޑޮލަރަށް އެތެރެކޮށް، ނާޖާއިޒް ފައިދާ ނެގުމަށް ޓަކައި ބޮޑު އޮޅުވައިލުމެއްގެ ތެރެއިން މި ހުރިހާ ދުވަހު އާސަންދައަށް ބިލްކުރަމުން އައީ 23،000 ރުފިޔާކަން ހާމަވެފައިވާކަމަށް ނެޝަނަލް ސޯޝަލް ޕްރޮޓެކްޝަން އެޖެންސީގެ ސީއީއޯ ހީނާ ވަލީދު މިއަދު ވިދާޅުވެއްޖެއެވެ.
އެތައް ހާސް ރުފިޔާއެއް އަގުބޮޑުކޮށް ބިލްކޮށް ވިއްކަމުން އަންނަނީ ލޮލުގެ ފަރުވާއަށް ބޭނުންކުރާ "ލުސެންޓިސް" އިންޖެކްޝަނެވެ.
އާސަންދައިން މީގެކުރިން ކަވަރުކުރާ އެ އިންޖެކްޝަން މިހާރު އާސަންދައިން ކަވަރު ނުކުރާތީ ބަލިމީހާ އަމިއްލައަށް ގަންނަން 24،000 ރުފިޔާ ހޭދަކުރަންޖެހުނު ކަމަށް ބުނާ މެސެޖެއް ސޯޝަލް މީޑިއާގައި އައީ ދައުރުވަމުންނެވެ.
އެ މެސެޖު ހިއްސާކުރައްވައި، ހީނާ ވިދާޅުވީ އެއީ އާސަންދައިން ވިޔަފާރިކޮށް ނާޖާއިޒު ބޮޑެތި ފައިދާ ނަގައި އުސޫލުތަކުން ބޭރުން ކަންކުރުމުގެ ބޮޑު މިސާލެއް ކަމަށެވެ.
އެގޮތުން އާސަންދައިގެ ބޭހުގެ އަގު ރިވައިޒްކުރުމުގެ ތެރެއިން، "ލުސެންޓިސް" އިންޖެކްޝަންގެ އަގު ބެލިއިރު އެ ބޭސް ވިއްކަމުން އައީ ގަންނަން ލިބޭ އަގަށްވުރެ ބޮޑުކޮށްކަމަށް ފާހަގަވެފައިވާ ކަމަށް ހީނާ ވިދާޅުވިއެވެ.
އެގޮތުން 500 ޑޮލަރަށް އެ ބޭސް ގެނެސް، 23،000 ރުފިޔާ އާސަންދައަށް ބިލްކޮށްފައިވާކަން ފާހަގަކުރެވިފައިވާކަމަށް ހީނާ ވިދާޅުވިއެވެ.
އޭނާ ވިދާޅުވީ މިއީ ޑޮލަރެއްގެ އަގު 18 ރުފިޔާގެ ރޭޓުން ބެލިކަމުގައިވިޔަސް، އެންމެ އިންޖެކްޝަނަކުން 14،000 ރުފިޔާގެ ފައިދާއެއް ކަމަށެވެ.
ހީނާ ވިދާޅުވީ މި ބޭސް އެތެރެކުރަން ރަޖިސްޓާކޮށްފައި ވަނީ މުޅިން އެހެން ކުންފުންޏަކުން ކަމަށެވެ. ނަމަވެސް އެ ފަރާތުން އެއްވެސް ވަރަކަށް މި ބޭސްއެތެރެކޮށްފައިނުވާ ކަމަށް ވެސް ވިދާޅުވިއެވެ.
ލޮލުގެ ފަރުވާގެ ޚިދުމަތްދޭ މި ފަރާތުން ބޭސްވިއްކާފައި ވަނީ ބޭސް އެތެރެކުރުމަށް ރަޖިސްޓަރީނުކޮށް ޕްރިސްކްރިޕްޝަންއަށް. އެކަމަކު ސްކީމްގެ ތެރެއިން މިއިންޖެކްޝަނަށް އެންމެ ގިނައިން ބިލްކޮށްފައިވަނީ މި ފަރާތުން، ރައީސް އޮފީހުގެ ތަރުޖަމާނު ހީނާ ވަލީދު
ހީނާ ވިދާޅުވީ މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ)ގައި ރަޖިސްޓަރީކޮށްފައިނުވާ އިންޖެކްޝަންއަކަށް ބިލުކޮށްފައިވުމާއި، އަގުގެ ބޮޑު ތަފާތަކުން ބޮޑު ފައިދާއެއް ނަގަމުންދިޔަ އިރު އެކަން އާސަންދައަށް ނުވަތަ ނޭޝަނަލް ސޯޝަލް ޕްރޮޓެކްޝަން އެޖެންސީ (އެންއެސްޕީއޭ) އަށް އަންގައިފައިނުވާ ކަމަށެވެ.
އެކަން ހުއްޓުވުމަށް ފިޔަވަޅުއަޅައި، އެންސްޕާގެ ވެލްފެއާ އެހީގެ ދަށުން މިހާރު ވެސް ކޮންޓްރޯލް އަގެއްގައި، ބޭނުންވާ ފަރާތްތަކަށް އެ ބޭސް ހޯދުމަށް އެހީތެރިކަން ދެމުން އަންނަކަމަށް ހީނާ ވިދާޅުވިއެވެ. އަދި އެކަން އިތުރަށް ފުރިހަމަކުރުމުގެ މަސައްކަތް ވެސް ކުރަމުން އަންނަ ކަމަށް ހީނާ ވިދާޅުވިއެވެ.
އަމިއްލަ ފަރާތްތަކުން ވިޔަފާރީގެ ފައިދާގެ ބޭނުމަށް އާސަންދަ ބޭނުންކުރުމުގެ ނަތީޖާއެއްގެ ގޮތުން، ރައްޔިތުންނަށް ބޮޑެތި ގެއްލުން ލިބޭކަން ފާހަގަކުރައްވާ ހީނާ ވިދާޅުވީ އެހެން ދިމާވަނީ ޒަމާނުއްސުރެ އާސަންދަ ނިޒާމްގެ ތެރޭގައި ހުރި އެފަދަ އެތައް މައްސަލައެއް ނުބެލި ހުރުމުން ކަމަށެވެ.
އަދި އެއް ނިޒާމް، އަނެއް ނިޒާމުގެ ދެމެދު މަޝްވަރާ ނުކުރެވި، ބޮއްސުންލާން ދޫކޮށްލެވިފައި އޮތުމުގެ ސަބަބުން އެ ކަންކަމަށް މަގުފަހިވެފައިވާ ކަމަށް ވިދާޅުވިއެވެ.
ރައީސްގެ ލަފާފުޅުގެ ދަށުން، ﷲގެ އިރާދަފުޅާއެކު އަޅުގަނޑުމެން އެކަން ބަދަލުކޮށް އިސްލާޙު ކުރާނަން، ރައީސް އޮފީހުގެ ތަރުޖަމާނު ހީނާ ވަލީދު
ސަރުކާރުން މިހާރު ވަނީ އާސަންދަ ރިފޯމް ކުރުމުގެ މަސައްކަތް ފަށާފައެވެ. އެއާއެކު ބޮޑު އިސްރާފެއް ކުޑަކުރެވޭނެކަމަށް ސަރުކާރުން ބުންޏެވެ.