ކުރީގެ ނައިބު ރައީސް ފައިސަލް ނަސީމް މިއަދު މެންދުރު ށ. ފޯކައިދޫއަށް ވަޑައިގެންފިއެވެ.
ފައިސަލް ފޯކައިދޫއަށް ވަޑައިގެންނެވުމުން އެ ރަށުގެ ކުދި ބޮޑު ވަރަށް ގިނަ އަދަދެއްގެ ރައްޔިތުންވަނީ ބަނދަރަށް ނުކުމެ އެ މަނިކުފާނަށް ވަރަށް ހޫނު މަރުޙަބާއެއް ދަންނަވާފައެވެ.
އެ މަނިކުފާނުގެ މި ދަތުރުފުޅަކީ، ށ. އަތޮޅު ކައުންސިލްގެ ހޭންޑް ބޯލް މުބާރާތް 2024ގެ ގުރޫޕް ސްޓޭޖުގެ މެޗުތައް ފައްޓަވައި ދެއްވައި ޝަރަފްވެރިކޮށްދެއްވުމަށް ކުރައްވާ ދަތުރުފުޅެކެވެ.
ފައިސަލް ވަނީ، ބަނދަރުމަތީގައި ފޯކައިދޫގެ ރައްޔިތުންނާއި ބައްދަލުކުރައްވާފައެވެ. މި ބައްދަލުކުރެއްވުމުގައި ރަށުގެ އާއްމު ރައްޔިތުން ވަނީ، އެރައްޔިތުންގެ ކަންބޮޑުވުންތައް ފައިސަލާ ހިއްޞާކުރައްވާފައެވެ.
ޚާއްޞަކޮށް ތަރައްޤީގެ މަޝްރޫތައް ހުއްޓިފައިވުމުގެ ކަންބޮޑުވުން ރައްޔިތުން ފާޅުކުރެއްވިއެވެ. އެއާއެކު އޭނާވަނީ ސްކޫލު ދަރިވަރިންގެ އަޚުލާޤު ރަނގަޅު ކުރުމަށާއި، ތަޢުލީމީ ނަތީޖާ ރަނގަޅުކުރުމަށް ބާރު އެޅުއްވުމަށް ބައްދަލުކުރެއްވި ބެލެނިވެރިންގެ ކިބައިން އެދިވަޑައިގަތެވެ.
ފައިސަލް ފޯކައިދުއަށް މިއަދު މެންދުރުވަޑައިގެންނެވީ، ށ. ފޯކައިދޫ ކައުންސިލުން ދެއްވި ދައުވަތަކަށެވެ.