މޮރިޝަސްގެ ކުރިއަށް އޮތް އާންމު އިންތިޚާބު ނިމެންދެން އެގައުމުގައި ސޯޝަލް މީޑިއާ ބޭނުންކުރުން މަނާކޮށްފިއެވެ.
އަލް ޖަޒީރާއިން ރިޕޯޓުކޮށްފައިވާ ގޮތުގައި އެ ގައުމުގެ އާންމު އިންތިޚާބު މި މަހުގެ 10 ވަނަ ދުވަހު ނިމޭއިރު، ސޯޝަލް މީޑިއާ އަލުން ބޭނުންކުރެވޭނީ މި މަހުގެ 11 ވަނަ ދުވަހުގެ ފަހުންނެވެ.
މޮރިޝަސްއިން އިއްޔެ އެގޮތަށް ނިންމީ ސިއްރުން ފޯނު ކޯލުތައް އަޑުއެހުމުގެ ބޮޑު މައްސަލައަކާއި، އިންތިޚާބުގައި ބަލި ނުވާނެކަން ކަށަވަރު ކުރުމަށް ވެރިކަން ކުރާ ޕާޓީން ރޭވުމެއް ގެންގުޅޭ ކަމަށް އިދިކޮޅުން ތުހުމަތު ކުރަމުން ދަނިކޮށެވެ.
މޮރިޝަސްގެ މުވާސަލާތީ ރެގިއުލޭޓަރުން ވަނީ އެގައުމުގައި އިންޓަނެޓްގެ ޚިދުމަތްދޭ ހުރިހާ ފަރާތްތަކުން ވެސް، ނޮވެމްބަރު 11ގެ ނިޔަލަށް އެއްވެސް ބަޔަކަށް ސޯޝަލް މީޑިއާއަށް ނުވަދެވޭނެކަން ޔަގީންކޮށްދިނުމަށް އަންގައިފައެވެ.
ބޮޑުވަޒީރު ޕްރަވިންދު ޖުގްނައުތުގެ އޮފީހުން ބުނީ އޯޑިއޯ ކްލިޕްތަކެއް އާންމުވުމާ ގުޅިގެން ގައުމީ ސަލާމަތާއި ނަޒާހަތްތެރިކަން ދެމެހެއްޓުމަށްޓަކައި ސޯޝަލް މީޑިއާ މަނާކުރުމަކީ ކޮންމެހެން އަޅަންޖެހޭ ފިޔަވަޅެއް ކަމަށެވެ.
ސޯޝަލް މީޑިއާ ބޭނުންކުރުން މަނާކޮށްފައި މިވަނީ މިދިޔަ މަހުގެ މެދުތެރެއިން ފެށިގެން މަތީ ފަންތީގެ ސިޔާސީ ބޭފުޅުންނާއި ފުލުހުންނާއި ވަކީލުންނާއި ނޫސްވެރިންނާއި މަދަނީ ޖަމިއްޔާގެ މެމްބަރުންނާ ގުޅޭ 20 ވަރަކަށް ފޯނު ކޯލު، ޓިކްޓޮކްގައި ލީކުވެފައިވަނިކޮށެވެ.
ލީކުވި އެއް ފޯނު ކޯލުގައި، މޮރިޝަސްގެ ޕޮލިސް ކޮމިޝަނަރާއި ފޮރެންސިކް ޑޮކްޓަރެއް ކަމަށް ބެލެވޭ ދެ މީހަކު ވާހަކަ ދައްކާ އަޑު އިވެއެވެ. އަދި ފުލުހުން އަނިޔާކުރި ފަހުން މަރުވި މީހެއްގެ ރިޕޯޓް ބަދަލުކުރުމަށް، ޕޮލިސް ކޮމިޝަނަރު ކަމަށް ބެލެވޭ މީހާ ބުނާ އަޑުއިވެއެވެ.
މޮރިޝަސްގެ އިދިކޮޅު ފަރާތްތަކުން ތުހުމަތު ކުރާ ގޮތުގައި ސަރުކާރުން ސޯޝަލް މީޑިއާ މަނާކުރީ އިންތިޚާބުން ބަލިވެދާނެތީ، ސިޔާސީ ސަބަބުތަކަށް ޓަކައެވެ.