ދައުލަތުގެ ޚަރަދުގައި ބިންހިއްކުމާއި، ބަނދަރު ހެދުމާއި އެ ނޫން ވެސް މަަޝްރޫތައް ކުރިއަށް ގެންދާއިރު އެ މަޝްރޫއުތަކުން މަންފާ ލިބޭނެ ގޮތަށް ކަންކަން ކުރިއަށް ގެންދިއުމަށް ވިސްނަން ޖެހޭކަމަށް އިމާރާތްކުރުމާއި ބިނާރާ ބެހޭ ވަޒީރު ޑރ. އަބްދުﷲ މުއްތަލިބް މިރޭ ވިދާޅުވެއްޖެއެވެ.
ވަޒީރު މިފައިން ވޮިދާޅުވީ އެސްއެސްޓީވީގެ ބާރު ހަތަރެއް ޕްރޮގްރާމުގައި ވާހަކަދައްކަވަމުންނެވެ.
ވަޒީރު ވިދާޅުވީ ސަރުކާރުން ކުރިއަށްގެންދަނީ ދެ ވައްތަރެއްގެ މަޝްރޫތަކެއް ކަމަށެވެ. އެއީ ސަރުކާރަށް ސީދާކޮށް އިގްތިސާދީ ގޮތުން މަންފާ ލިބޭ މަޝްރޫތަކާއި އެ މަޝްރޫތަކުގެ ސަބަބުން ރައްޔިތުންގެ ދިރިއުޅުމަށް ފަސޭހަވާ މަޝްރޫތައް ކަމަށެވެ.
އޭގެ މިސާލެއްގެ ގޮތުން ސިނަމާލޭ ބްރިޖުގެ މަޝްރޫއަށް އިޝާރާތްކުރައްވާ ވަޒީރު ވިދާޅުވީ ބްރިޖަކީ މިވަގުތު ޓޯލް ނަގާ ބްރިޖެއް ނޫން ކަމަށެވެ. ބްރިޖުން ސީދާ ދައުލަތަށް މަންފާއެއް ނުލިބުނެއްކަމަކު ބްރިޖު ހުޅުވިގެން ދިއުމާއެކު އިގްތިސާދީ ގޮތުން ހުޅުމާލެއަށް ބޮޑު ކުރިއެރުމެއް އައިކަން ވަޒީރު ވަނީ ފާހަގަކުރައްވާފައެެވެ.
މިއާއެކު ވަޒީރު ވިދާޅުވީ ބޯހިޔާވަހިކަމުގެ މަޝްރޫތަކަކީ ކުލީގެ ގޮތުގައި ލިބޭ ފައިސާއިން ދައުލަތަށް އާމްދަނީ ލިބޭ މަޝްރޫތައް ކަމަށެވެ.
ނަމަވެސް ރަށްރަށުގައި ހަދާ ބަނދަރުތަކުގެ ސަބަބުން ފަސޭހަވެގެންދަނީ ރައްޔިތުންނަށް ކަމަށާއި ބައެއް ރައްރަށުުގައި މަސްވެރިކަން ކުރާ ފަރާތްތަކަށް ފަސޭހަވެގެން ގޮސްފާނެ ކަމަށެވެ. ނަމަވެސް ގިނަ ރަށްރަށުގައި މިކަންކަން ކުރެވިފައި ވަނީ ރައްޔިތުންނަށް ހަމައެކަނި އަރާފޭބުމަށް ފަސޭހައަކަށް ކަމަށް ވިދާޅުވިއެވެ.
"އެއްވެސް ރަށެއްގަ މިހާތަނަށް ބަނދަރުން އާމްދަނީ ހޯދުމަށް އެއްވެސް ކަމެއް ކޮށްފައެއް ނެތް. އެހެން ނަމަވެސް އަޅުގަނޑުމެން ކުރިއަށްދާއިރު ބަލަންޖެހޭ ކަމެއްމީ ކައުންސިލްތަކުންވެސް. ބަނދަރުތަކާ ތަންތަން ބެލެހެއްޓުމަކީ ކައުންސިލްތަކުގެ ޒިންމާއަކަށް ވާއިރު އެތަންތަނުން އާމްދަނީ ލިބޭނެ ގޮތަކަށް ކަންތައްތައް ކުރިއަށް ގެންދިއުން." ވަޒީރު މުއްތަލިބް ވިދާޅުވިއެވެ.
އެއާއެކު ވަޒީރު ވިދާޅުވީ ބަނދަރު ކުޑަވުމުން އަނެއްކާ ވެސް ހަމަ އެ ބަނދަރު ބޮޑުކުރަން ޚަރަދުކުރަން ޖެހެނީ ސަރުކާރަށް ކަމަށެވެ.
މި ވަގުތު ވެސް 88 ވަރަކަށް ރަށުގެ ބަނދަރު މަސައްކަތް ކުރަން އެދިފައިވާއިރު ޕީއެސްއައިޕީ ބަޖެޓަކުން އަބަދު އެފަދަ ކަންކަމަށް ޚަރަދުކުރުމަކީ ދަތިކަމަކަށް ވާނެ ކަމަށް މިނިސްޓަރު ވިދާޅުވިއެވެ.