ޒަކާތު ހައުސްއިން ދެމުންދާ 'ފުދުންތެރިކަން ނެތް ފަރާތްތަކަށް ދެވޭ ބޭސްފަރުވާގެ އެހީ' ޚިދުމަތަށް އަންނަ ހޯމަ ދުވަހުން ފެށިގެން އެދެވޭނީ ވަންގަވް ޕްލެޓްފޯމް މެދުވެރިކޮށް ކަމަށް އެ އިދާރާއިން މިއަދު ބުނެފިއެވެ.
ޒަކާތު ހައުސްއިން ނެރުނު އިއުލާނެއްގައި ވަނީ އަންނަ ހޯމަ ދުވަހުގެ ފަހުން، ބޭސްފަރުވާ ޚިދުމަތަށް އެދޭ އެއްވެސް ފޯމެއް އެ އިދާރާގެ ކައުންޓަރުން ނުވަތަ އީމެއިލް މެދުވެރިކޮށް ބަލައިނުގަންނާނެ ކަމަށެވެ.
ޒަކާތު ހައުސްއިން ބުނީ ވަންގަވްއަށް ޚިދުމަތްތައް ބަދަލު ކުރުމުގެ އެންމެ ބޮޑު އެއް ބޭނުމަކީ ރައްޔިތުންނަށް ވީހާވެސް ލުއި ފަސޭހަ އަދި އަވަސް ގޮތަކަށް ޚިދުމަތް ދިނުން ކަމަށެވެ.
ވަންގަވްއަކީ ސަރުކާރުގެ ޚިދުމަތްތައް އެއް ތަނަކުން ގެނެސްދިނުމަށް އުފައްދައިފައިވާ ޑިޖިޓަލް ޕްލެޓްފޯމެކެވެ.
މިދިޔަ މަހު ޒަކާތު ހައުސްއިން އާންމުކޮށްފައިވާ ތަފާސްހިސާބުން ދައްކާ ގޮތުގައި މި އަހަރުގެ އެހާތަނަށް ޒަކާތު ފަންޑުން ބޭސްފަރުވާއަށް ޖުމްލަ 16.7 މިލިއަން ރުފިޔާ ދޫކޮށްފައިވެއެވެ.
ޒަކާތު ފަންޑުން ބޭސްފަރުވާއަށް އެހީ ފޯރުކޮށްދިން ކަންކަމުގެ ތެރޭގައި ކެންސަރު ބައްޔާއި، ހިތުގެ އޮޕަރޭޝަނާއި ކިޑްނީ ބަލިތަކާއި، ސިކުނޑީގެ އޮޕަރޭޝަނަށް ހިމެނެއެވެ.